އެސްޓޯނިއާގެ ދަތުރުގައި ހާސިލްކުރެވުނު ކަންކަމުން ހިތްވަރު ލިބިއްޖެ: ރައީސުލްޖުމްހޫރިއްޔާ

އެސްޓޯނިއާގެ ރައީސް ޑޮކްޓަރ އަލާރް ކަރިސްގެ ދަޢުވަތަކަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ ޤައުމަށް ކުރެއްވެވި ދަތުރުފުޅަކީ ވަރަށް އުއްމީދީ ދަތުރުފުޅެއްކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.  

ރައީސުލްޖުމްހޫރިއްޔާ މިހެން ވިދާޅުވީ، އެ މަނިކުފާނު އެސްޓޯނިއާއަށް ކުރެއްވެވި ދަތުރު ނިންމަވާލައްވަމުން، އެ ޤައުމުގެ ވެރިރަށް، ޓެލިން އިން ފުރާވަޑައިގަންނަވަމުން 'އެކްސް' ގައި އިނގިރޭސި ބަހުން ކުރެއްވެވި ޕޯސްޓެއްގައެވެ.

އެ މަނިކުފާނުގެ ޕޯސްޓުގައި ފާހަގަކޮށްފައިވާ ގޮތުން، އެ ދަތުރުފުޅުން ހާސިލްވި ކަންކަމަކީ ރާއްޖޭގެ ޑިޖިޓަލް ނިޒާމް ހަރުދަނާކުރެއްވުމަށް އެ މަނިކުފާނަށް ހިތްވަރު ލިބިލެއްވި ކަންތައްތަކެކެވެ.

އެސްޓޯނިއާއަށް ކުރި ދަތުރު ނިންމާލުމަށްފަހު އަޅުގަނޑު ޓެލިން އިން މި ފުރަނީ ވަރަށް އުއްމީދާއެކު. މި ދަތުރުގައި ހާސިލްވިކަންކަމުން ހިތްވަރު ލިބިއްޖެ.

ރައީސުލްޖުމްހޫރިއްޔާގެ ޕޯސްޓުގައި ވެއެވެ.

ދަތުރުގެ ކާމިޔާބީއަށް އަލިއަޅުވާލައްވަމުން ރައީސުލްޖުމްހޫރިއްޔާ އިތުރަށް ވިދާޅުވީ، އެ މަނިކުފާނުގެ ދަތުރުފުޅަކީ އެސްޓޯނިއާއާއެކު އޮތް ސިޔާސީ ގުޅުމުގެ އައު ދައުރެއްގެ ފެށުން ކަމަށާއި، އެ ދަތުރުފުޅުގައި ސޮއިކުރެވުނު އެމްއޯޔޫތަކާއި، ބޭއްވުނު ފައިދާހުރި ގިނަ ބައްދަލުވުންތަކުން، ޑިޖިޓަލައިޒޭޝަން، ތިމާވެށި އަދި ސިޔާސީ މަޝްވަރާގެ ދާއިރާތަކުން ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށެވެ.

ރައީސުލްޖުމްހޫރިއްޔާގެ ޕޯސްޓުގައި އެ މަނިކުފާނު ވަނީ އެސްޓޯނިއާގެ ސަރުކާރާއި، އެ ޤައުމުގެ ރައްޔިތުންނާއި އަދި ޙާއްސަކޮށް ރައީސް ކަރިސް ބެހެއްޓެވި ގާތްކަމާއި، ދެއްވެވި މެހެމާންދާރީ އަދި ކިޔުއްވި ހޫނު މަރުހަބާއަށް އިޙްލާސްތެރި ޝުކުރެއް އަދާކުރައްވާފައެވެ.  

މީގެ އިތުރުން، އެސްޓޯނިއާގެ އީޖާދީ އަދި ޑިޖިޓަލް ބަދަލަކީ އިންޤިލާބެއް ކަމަށާއި، އަދި އެއީ ހަރުދަނާ އަދި ދެފުށް ފެންނަ ވެރިކަމެއް ހިންގުމުގައި ދުނިޔޭގެ ފެންވަރުގައި ވެސް ފާހަގަކޮށްލެވޭ ނަމޫނާއެއްކަމަށް ރައީސުލްޖުމްހޫރިއްޔާ ވިދާޅުވިއެވެ. އެހެންކަމުން އެ ކަންކަން ދަސްކުރުމަށް ލިބުނު ފުރުސަތަކީ ދިވެހިރާއްޖެ އެކަމަށް ޝުކުރުވެރިވާކަމެއްކަމަށް ރައީސުލްޖުމްހޫރިއްޔާ ވިދާޅުވިއެވެ.