ރައީސް މުޢިއްޒު އެސްޓޯނިއާގެ ތާރީޚީ ދަތުރުފުޅު ނިންމަވާލައްވައި ރާއްޖެ ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް ކުރެއްވި ތާރީޚީ ދަތުރުފުޅު ނިންމަވާލައްވައި މާލެ ވަޑައިގެންފިއެެވެ. މިއީ ދިވެހި ރައީސަކު އެސްޓޯނިއާއަށް ކުރެއްވި ފުރަތަމަ ރަސްމީ ދަތުރުފުޅެވެ.

ވެލާނާ އިންޓަރނޭޝަނަލް އެއަރޕޯޓުގައި ރައީސަށް މަރުޙަބާ ދެންނެވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އެވެ.

އެސްޓޯނިއާގެ ރައީސް ޑރ. އަލާރް ކަރިސްގެ ދަޢުވަތަކަށް ކުރެއްވި މި ދަތުރުފުޅުގައި، ރައީސް މުޢިއްޒު ވަނީ އެ ޤައުމުގެ އިސް ވެރިންނާ ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރެއްވުމާ ބެހޭ ގޮތުން މަޝްވަރާކުރައްވާފައެވެ. މި ދަތުރުފުޅުގައި ދެ ޤައުމުގެ މެދުގައި ތިން ފަހުމުނާމާއެއްގައި ވަނީ ސޮއިކުރެވިފައެވެ.

ރައީސް މުޢިއްޒުގެ މި ދަތުރުފުޅަކީ ދިވެހިރާއްޖެ ޑިޖިޓަލައިޒް ކުރެއްވުމަށާއި، މޫސުމީ ބަދަލުތަކާ ގުޅޭ މަސައްކަތްތަކަށް އިތުރު ކުރިއެރުން ހޯދުމަށް މަގުފަހިވި ދަތުރުފުޅެކެވެ. އަދި ބައިނަލްއަޤްވާމީ މައިދާނުގައި ދެ ޤައުމުގެ މެދުގައި އެއްބާރުލުން އިތުރުކުރުމަށް މަގުފަހިވި ދަތުރުފުޅެކެވެ.