ކޮރަޕްޝަންގެ ވަބާ ނައްތާލެވޭނީ ޤާނޫނު ތަންފީޒުކުރުމުގައި ހަމަހަމަކަމާއެކު ޢަމަލުކޮށްގެން: ރައީސުލްޖުމްހޫރިއްޔާ

ކޮރަޕްޝަންގެ ވަބާ ރާއްޖެއިން ނައްތާލެވޭނީ ޤާނޫނު ތަންފީޒުކުރުމުގައި އެންމެންގެ މައްޗަށް ހަމަހަމަކަމާއެކު ޢަމަލުކޮށްގެންކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ، މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ ޚިޔާނާތުގެ މައްސަލަތަކާ ގުޅިގެން އެކުލަވާލާފައިވާ އިމިޔުނިޓީ އަދި އެއްބާރުލުންދިނުމުގެ އެއްބަސްވުންތައް ނިމުމަކަށް ގެނައުމަށް ޕްރޮސިކިއުޓަރ ޖެނެރަލް (ޕީޖީ) ނިންމުމާ ގުޅިގެންނެވެ.

އެމްއެމްޕީއާރްސީގެ ޚިޔާނާތުގެ ބޮޑު މައްސަލައިގައި ބައެއް ފަރާތްތަކަށް ތަފާތު އިމްތިއާޒްތަކެއް ލިބިދީ އެމީހުންގެ މައްޗަށް އިތުރު ދަޢުވާ ނުކުރުމަށް އެއެްބަސްވެ ކުރީގެ ޕްރޮސިކިއުޓަރ ޖެނެރެލް ހައްދަވާފައިވާ އެއްބަސްވުންތައް ބާޠިލް ކުރައްވައި އެމީހުންގެ މައްޗަށް ތުޙުމަތުކުރެވޭ މައްސަލަތައް ތަޙްޤީޤު ކުރައްވަވައި އެއޮފީހަށް ފޮނުވުމަށް ކަމާބެހޭ އިދާރާތަކަށް ޕްރޮސިކިއުޓަރ ޖެނެރަލް އެންގެވުމާގުޅިގެން މަރުޙަބާ ދަންނަވަން. 

މައްސަލަ އަލުން ތަޙުޤީޤުކުރުމަށް ނިންމުމާ ގުޅިގެންރައީސުލްޖުމްހޫރިއްޔާ ވިދާޅުވިއެވެ.

ޕީޖީގެ މި ނިންމެވުމަށް މަރުހަބާ ދަންނަވަމުން ރައީސުލްޖުމްހޫރިއްޔާ ވިދާޅުވީ، ކޮރަޕްޝަންގެ ވަބާއަކީ ޒަމާނުއްސުރެން މި ޤައުމަށް ކުރިމަތިވެފައި އޮތް ވަބާއެއް ކަމަށާއި، އެ ވަބާ ނައްތާލެވޭނީ ހަމަހަމަކަމާއެކު ޤާނޫނު ތަންފީޒުކުރެވިގެން ކަމަށެވެ. 

ޒަމާނުއްސުރެން މިޤައުމަށް ކުރިމަތިވެފައިވާ ކޮރަޕްޝަންގެ ވަބާ މިޤައުމުން ނައްތާލެވޭނީ އެފަދަ މައްސަލަތަކުގައި ހިމެނޭކަމަށް ތުހުމަތުކުރެވޭ ހުރިހާ ފަރާތަކާމެދުވެސް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު ޢަމަލުކުރެވިގެން.

ކޮރަޕްޝަން ނައްތާލުމަށް ގޮވާލަމުން ރައީސުލްޖުމްހޫރިއްޔާ ވިދާޅުވިއެވެ

މި މައްސަލަތައް ތަޙުޤީޤުކުރަން ނިންމުމަށްފަހު ޕީޖީ ފާހަގަކުރައްވާފައިވަނީ، އެ މައްސަލަތަކުގައި ހިމެނޭ ފަރާތްތަކާމެދު އެއްބަސްވުންތަކެއް  ހަދާފައިވަނީ ޚިޔާނާތުގެ މައްސަލައިގެ ތަޙުޤީޤު ކުރިއަށްގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައެވެ. ނަމަވެސް އެ ފަރާތްތަކުން މައްސަލައިގެ ތަޙުޤީޤަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ނުދޭކަމަށް ތަޙުޤީޤީ އިދާރާތުން މަޢުލޫމާތު ދީފައިވާތީކަމަށް ޕީޖީ ވަނީ ފާހަގަކުރައްވާފައެވެ.

މި ތަޙުޤީޤާ ގުޅިގެން ދައުލަތާއެކު ހަދާފައިވާ އެއްބަސްވުންތައް ނިމުމަކަށް ގެނަސްފައިވާ ފަރާތްތަކުގެ ތެރޭގައި ހިމެނެނީ، ކުރީގެ ނައިބު ރައީސް، ހ. ސާމަރާ، އަޙްމަދު އަދީބު ޢަބްދުލްޣަފޫރާއި، މ. ލޭންޑް އޮފް ގާރޑެން، އަޙްމަދު އިޝްފާޙް ޢަލީއާއި، މ. ސެސްނާ، މުޙައްމަދު ޢައްލާމް ލަޠީފްގެ އިތުރުން ގ. އޮއިވާލި، މުޙައްމަދު ޙުސައިންއެވެ.

އަދި ހ. އާހަމަ، ޢަބްދުالله ޒިޔަތާއެކު ހަދާފައިވާ އެއްބަސްވުން 2022 ވަނަ އަހަރުގެ އޯގަސްޓު މަހުގެ ތެރޭގައި ނިމުމަކަށް ގެނަސްފައިވާކަމަށް ވެސް ޕީޖީ އޮފީހުން ވަނީ ފާހަގަކުރައްވާފައެވެ.