ޚަބަރު
ވާދޫގެ ތަރައްޤީގެ މަޝްރޫޢުތައް މިއަހަރު ނިންމާނެ: ރައީސް މުޢިއްޒު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރ. ވާދޫގެ ތަރައްޤީއަށް ރާވާފައިވާ ގިނަ މަޝްރޫޢުތައް މިއަހަރު ނިންމަވާނެކަމަށާއި، ދެން އެރަށަށް ވަޑައިގަންނަވާނީ އެމަޝްރޫޢުތަކުގެ ނިމުން ފާހަގަކުރެއްވުމަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ވާދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް މުޢިއްޒު ވާހަކަފުޅު ފައްޓަވަމުން ވިދާޅުވީ، ރިޔާސީ އިންތިޚާބުގައި ވެވަޑައިގެންނެވި ވަޢުދުތައް ފުރިހަމަކޮށްދެއްވާނެކަމުގެ ޔަޤީންކަން ދެއްވަމުންނެވެ. އަދި ވާދޫއަކީ އަބަދުވެސް އަމިއްލަ އިސްނެގުމާއެކު ވަރަށް އުފެއްދުންތެރި ވިސްނުމާއެކު ގިނަ ކަންތައްތަކެއް ކުރާރަށެއްކަންވެސް ފާހަގަކުރެއްވިއެވެ.
ވާދޫގެ ތަރައްޤީއަށް ރާވާފައިވާ މަޝްރޫޢުތަކުގެ ތެރޭގައި ގޯތި ދޫކުރުމާއި، ކުނި މެނޭޖްކުރުމާއި، ރަށްގިރުމުގެ މައްސަލަ ހައްލުކުރުން ހިމެނެއެވެ. މީގެ އިތުރުން ސްކޫލަށް ބޭނުންވާ އިތުރު ކޮމްޕިއުޓަރ ލެބާއި ސްޓާފްރޫމް ހެދުމާއި، ސިއްޙީ ދާއިރާ ތަރައްޤީކުރުމާއި، ބިން ހިއްކުމާއި، ފުލުހުންގެ ޚިދުމަތް ފުޅާކުރުން ފަދަ މަޝްރޫޢުތައްވެސް ހިމެނެއެވެ.
ރައީސް މުޢިއްޒު ވިދާޅުވީ، ވާދޫގައިވެސް ހުރިހާ ދާއިރާއަކުން ކުރަން ހުރި މަސައްކަތްތައް އަމަލީގޮތުން ހިނގައި މިއަހަރު ބައެއް މަޝްރޫޢުތައް ނިމޭނެކަމަށެވެ. އަދި 2028 ވަނަ އަހަރުގެ ނިޔަލަށް މުޅި ރާއްޖޭގެ ކަރަންޓުގެ ޚިދުމަތުގައި މަދުވެގެން %33 އިއާދަކުރަނިވި ހަކަތައަށް ބަދަލުކުރުމަށް ކުރާ މަސައްކަތުގެ ދަށުން ވާދޫގެ ހުރިހާ ހަކަތައެއް އިއާދަކުރަނިވި ހަކަތައަށް ބަދަލުކުރަން ބޭނުންވާކަމަށްވެސް ވިދާޅުވިއެވެ.
ރައީސް މުޢިއްޒު ވަނީ ސަރުކާރު އޮންނާނީ ރައްޔިތުންގެ ފަޅީގައިކަމަށާއި، ތަރައްޤީއަށް ފުރިހަމަ އެއްބާރުލުން ދެއްވާނެކަމުގެ ޔަޤީންކަން ދެއްވާފައެވެ. އަދި ދެން ވާދޫއަށް ވަޑައިގަންނަވާނީ ގިނަ މަޝްރޫޢުތަކެއް ނިމި އެކަން ފާހަގަކުރުމަށްކަމަށް އުންމީދުކުރައްވާކަމަށްވެސް ވިދާޅުވިއެވެ.