ރައީސް މުއިއްޒު ރަސްގެތީމަށް: ކައުންސިލް އިދާރާ ހުޅުވައިދެއްވައި، ރައްޔިތުންނާ ބައްދަލުކުރައްވަނީ

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން މިއަދު ރަސްގެތީމަށް ވަޑައިގެންފިއެވެ. ރަސްގެތީމަށް ވަޑައިގަތުމާއެކު ރައީސަށް ވަނީ ހޫނު މަރުޙަބާއެއް ކިޔާފައެވެ.

މި ދަތުރުފުޅުގައި ރައީސް މުއިއްޒު ރަސްގެތީމުގައި އަލަށް އިމާރާތްކުރެވުނު ކައުންސިލް އިދާރާ ރަސްމީކޮށް ހުޅުއްވައިދެއްވާނެއެވެ. މީގެއިތުރުން، ރަސްގެތީމު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި ރަށުގެ މުއައްސަސާތަކުގެ އިސްވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ.

ރައްޔިތުންނާ ބައްދަލުކުރެއްވުމަށްވެސް ވަނީ ހަމަޖެހިފައެވެ. މި ބައްދަލުވުމުގައި ރަސްގެތީމުގައި ބޭންކް އޮފް މޯލްޑިވްސްގެ އޭޓީއެމް ބެހެއްޓުމުގެ މަސައްކަތް ކައުންސިލާ ހަވާލުކުރެއްވުން އޮންނާނެކަމަށް ވެއެވެ.

ރައީސް މުއިއްޒުގެ މި ދަތުރުފުޅަކީ 3 ދުވަހުގެ ދަތުރުފުޅެކެވެ. މި ދަތުރުފުޅުގައި ޖުމްލަ 11 ރަށަކަށް ވަޑައިގަންނަވާނެއެވެ. ރަސްގެތީމަށްފަހު ދެން ވަޑައިގަންނަވާނީ ރ. އަނގޮޅިތީމަށެވެ.

ރައީސް މުއިއްޒުގެ މި ދަތުރުފުޅަކީ ރ. އަތޮޅުގެ ރައްޔިތުންނާ ގާތުން ބައްދަލުކުރައްވައި، ރަށްރަށުގެ ތަރައްޤީއާ ގުޅޭ މަޝްރޫޢުތައް ބައްލަވާލެއްވުމަށް ކުރައްވާ ދަތުރުފުޅެކެވެ.