ތުރުކީގެ ސްކީ ރިޒޯޓެއްގައި ހިނގި އަލިފާނުގެ ހާދިސާއާ ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ

ތުރުކީގެ ސްކީ ރިޒޯޓެގައި ހިނގި އަލިފާނުގެ ހާދިސާއާ ގުޅިގެން، ތުރުކީގެ ރައީސް ޠައްޔިބު އުރުދުޣާނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

ރައީސުލްޖުމްހޫރިއްޔާގެ ހަމްދަރުދީގެ މެސެޖުގައި، އަލިފާނުގެ ހާދިސާއާ ގުޅިގެން އެތައް ބައެއްގެ ފުރާނަ ގެއްލި ގިނަ ބަޔަކަށް އަނިޔާވެފައިވާކަމުގެ ޚަބަރު އެއްސެވީ ކުއްލި ހައިރާންކަމާއި ފުންހިތާމައާ އެކުގައި ކަމުގައި ވިދާޅުވެފައިވެއެވެ.

އެ މަނިކުފާނުގެ މެސެޖުގައި، މި ހާދިސާގައި މަރުވި މީހުންގެ އާއިލާތަކަށާއި ތުރުކީވިލާތުގެ ސަރުކާރަށާއި ރައްޔިތުންނަށް، ޚާއްޞަގޮތެއްގައި މި ހާދިސާގެ ސަބަބުން އަސަރުކުރި ފަރާތްތަކަށް ވަރަށް އިޚްލާޞްތެރިކަމާއެކު ތަޢުޒިޔާ ވިދާޅުވެފައިވެއެވެ.

ތުރުކީގެ ކަރްޓަލްކަޔާ ރިޒޯޓުގައި ހިނގި އަލިފާނުގެ ހާދިސާއާ ގުޅިގެން  66 މީހުން މަރުވެ 51 މީހަކަށް އަނިޔާވެފައިވެއެވެ.

މި ހާދިސާ ހިނގުމަށް މެދުވެރިވި ސީދާ ސަބަބެއް އަދި އެނގިފައި ނުވިނަމަވެސް، އަލިފާންގަނޑު އެހާ ބޮޑަށް ފެތުރުނީ ހޮޓަލުގެ އެކްސްޓީރިއާގައި ބޭނުންކޮށްފައިވާ ލަކުޑިތަކުގެ ސަބަބުންކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ. 

ކަރްޓަލްކަޔާއަކީ ތުރުކީގައި މާޝްހޫރު ސްކީ ރިޒޯޓެކެވެ. މިއީ އެ ޤައުމުގެ ވެރިރަށް އިސްތާންބުލްއާ ގާތްގަނޑަކަށް 300 ކިލޯމީޓަރު ދުރުގައި އޮންނަ ހިސާބެކެވެ. އަދި މި ދުވަސްވަރަކީ އެ ޤައުމަށް ސްކޫލު ޗުއްޓީކަމުން، މިއީ ސްކީ ރިޒޯޓުތަކަށް ބާރުބޮޑު ދުވަސްކޮޅެކެވެ.