ޚަބަރު
އައިޑީ ކާޑާއި ޕާސްޕޯޓުގެ ޚިދުމަތް ރ. އަތޮޅަށް ފުޅާކޮށްފި

އުނގޫފާރުގައި ޕާސްޕޯޓުގެ ޚިދުމަތް ފެށުން، ފޮޓޯ: ރައީސް އޮފީސް
ހުލާސާ
އުނގޫފާރުން ދިވެހި ރައްޔިތެއްކަން އަންގައިދޭ ކާޑު ޕްރިންޓުކޮށް ދޫކުރުމާއި، ޕާސްޕޯޓު ދޫކުރުމުގެ އިންތިޒާމް މިހާރުވަނީ ހަމަޖެހިފައި.
ދިވެހި ރައްޔިތެއްކަން އަންގައިދޭ ކާޑާ ޕާސްޕޯޓުގެ ޚިދުމަތް ރައްޔިތުންނާ ގާތުން ފޯރުކޮށްދިނުމުގެ ސިޔާސަތުގެ ދަށުން، ރ އަތޮޅަށް މި ޚިދުމަތްތައް ފުޅާކޮށްފިއެވެ.
މި ޚިދުމަތްތައް ރ އަތޮޅުގައި އިފްތިތާޙުކުރެއްވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ އަތޮޅުގެ ބައެއް ރަށްރަށަށް އަންގާރަދުވަހު ފެއްޓެވި ދަތުރުފުޅުގެ ތެރެއިންނެވެ.
އެގޮތުން ރ. އަތޮޅުގެ ރައްޔިތުންނަށް ޙާއްސަކޮށް ފެއްޓެވި މި ޙިދުމަތްތައް ލިބިލައްވާނީ، އެ އަތޮޅާއި، ކައިރި އެހެން އަތޮޅުތަކުގެ ރައްޔިތުން ވެސް ބޭސްފަރުވާގެ ކަންކަމަށް އާންމުކޮށް ޒިޔާރަތްކޮށްއެޅޭ، އެ އަތޮޅުގެ ވެރިކަންކުރާ އުނގޫފާރުންނެވެ.
މި ޚިދުމަތާއެކު، އެ ރަށުން ދިވެހި ރައްޔިތެއްކަން އަންގައިދޭ ކާޑު ޕްރިންޓުކޮށް ދޫކުރުމާއި، ޕާސްޕޯޓު ދޫކުރުމުގެ އިންތިޒާމް މިހާރުވަނީ ހަމަޖެހިފައެވެ.
މި ޚިދުމަތްތައް ރަސްމީކޮށް ފައްޓަވާދެއްވީ، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ، ޢަލީ އިޙްސާނާއި، ރ. އަތޮޅު ކައުންސިލުގެ ރައީސް، ޙުސެއިން ނާސިފެވެ. އަދި ޕާސްޕޯޓުގެ ޚިދުމަތް އިފްތިތާޙުކުރެއްވުމުގައި ޑެޕިއުޓީ ކޮންޓްރޯލަރ އޮފް އިމިގްރޭޝަން، އަޙުމަދު އަޝްފާން ވެސް ބައިވެރިވެ ވަޑައިގެންނެވިއެވެ.
މިކަމާ ގުޅިގެން މޯލްޑިވްސް އިމިގްރޭޝަނުން ހާމަކުރައްވާފައިވާ ގޮތުގައި، މިއަދުން ފެށިގެން "އިމުގާ" މެދުވެރިކޮށް ހުށަހަޅާ އެޕްލިކޭޝަންތަކަށް އުނގޫފާރުން ޕާސްޕޯޓާއި ހަވާލުވެވޭނެ އިންތިޒާމު ވަނީ ހަމަޖެހިފައެވެ. އެހެންކަމުން އުނގޫފާރުން ޕާސްޕޯޓާއި ހަވާލުވުމަށް ބޭނުންފުޅުވާނަމަ، އެޕްލިކޭޝަން ހުށަހަޅުއްވާއިރު، "ކަލެކްޝަން ޕޮއިންޓް"ގެ ގޮތުގައި އިހްތިޔާރުކުރައްވަން ޖެހިވަޑައިގަންނަވާނީ "ރ. އުނގޫފާރު އިމިގްރޭޝަން އޮފީސް" އެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާއި އެއްގޮތަށް ދިވެހި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމަށް ކުރިއަށްދާ މަސައްކަތުގެ ތެރެއިން، މިރޭ ރ. އުނގޫފާރުގައި ބޭއްވި ހާއްސަ ހަފްލާއެއްގައި ރައީސުލްޖުމްހޫރިއްޔާ ވަނީ ރ. އަތޮޅުން ޕާސްޕޯޓުގެ ޚިދުމަތް… pic.twitter.com/Tn8ckLStYM
— Maldives Immigration (@ImmigrationMV) January 21, 2025
އަދި އުނގޫފާރަކީ އާރބަން ސެންޓަރެއްގެ ގޮތުގައި ސަރުކާރުން ތަރައްޤީ ކުރުމަށް ނިންމާފައިވާ 7 ރަށުގެ ތެރެއިން ރަށެއްކަމުން، އިތުރު ގިނަ ޚިދުމަތްތަކެއް ކުރިޔަށްއޮތްތާންގައި އެ ރަށުން ލިބޭނެ އިންތިޒާމު ހަމަޖެހިގެން ދާނެކަމަށް، ރައީސުލްޖުމްހޫރިއްޔާ އެ ރަށުގެ ރައްޔިތުންނާ މުޙާތަބުކުރައްވާ ރޭ ދެއްކެވި ވާހަކަފުޅުގައި ވަނީ ވިދާޅުވެފައެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރެއްވުމުގެ މަސައްކަތް ސަރުކާރުން ފެއްޓެވީ މިދިޔަ ނޮވެމްބަރުމަހުގެ 16 ވަނަ ދުވަހުއެވެ.
މި ސިޔާސަތުގެ ދަށުން، މާލެ ސިޓީގެ ހުރިހާ ސަރަޙައްދެއްގެ އިތުރުން، ލ. އަތޮޅާއި ދ. އަތޮޅަށް މި މަސައްކަތް މިހާރު ވަނީ ފުޅާކޮށްފައެވެ. އެގޮތުން، ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ. ކުޑަހުވަދޫ އަދި ލ. ފޮނަދޫއިން ޕާސްޕޯޓުގެ ޚިދުމަތް ފޯރުކޮށްދިނުމުގެ މަސައްކަތް މިދިޔަ ނޮވެމްބަރުމަހު ވަނީ ފައްޓަވާފައެވެ.
މީގެ އިތުރުން، ކުޅުދުއްފުށި ސިޓީގައި ވެސް މިދިޔަ ނޮވެންބަރުމަހު އައިޑީ ކާޑުގެ ޚިދުމަތް ފަށާފައިވެއެވެ. މި ސިޓީގައި ޕާސްޕޯޓުގެ ޚިދުމަތް ފަށަފައިވާތާ އަހަރުތަކެއް ވެއްޖެއެވެ.
ސަރުކާރުން އާންމުކޮށްފައިވާ މަގުޗާޓުގައިވާ ގޮތުން، މި އަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައިވެސް ކަނޑައެޅޭ ވަކި ސަރަޙައްދުތަކުގައި އައިޑީ ކާޑާއި ޕާސްޕޯޓުގެ ޚިދުމަތް ޤާއިމުކުރުމަށް ވަނީ ނިންމާފައެވެ.