ޚަބަރު
ދުވާފަރުގައި ޤާއިމްކުރުމަށް ނިންމާފައިވާ ބީއެމްއެލް ބްރާންޗުން ޖޫން މަހު ޚިދުމަތް ލިބެން ފަށާނެ: ރައީސުލްޖުމްހޫރިއްޔާ
ބީއެމްއެލްއިން އަތޮޅުތެރޭގެ ރަށެގައި ޤާއިމްކޮށްފައިވާ ސެލްފް ސާރވިސް ބޭންކިންގް ސެންޓަރެއް---
ހުލާސާ
ރ. ރަސްގެތީމާއި، ރ. ވާދޫގައި އޭޓީއެމް ސެންޓަރެއް ޤާއިމްކުރުމުގެ އެއްބަސްވުމުގައި އަންގާރަ ދުވަހު ސޮއިކޮށްފައިވޭ.
މި އަހަރުގެ މާރިޗު މަހުގެ ނިޔަލަށް 17 ރަށެއްގައި އޭޓީއެމް ބެހެއްޓުމަށް ސަރުކާރުން ނިންމާފައިވޭ.
ރ އަތޮޅުގެ ދުވާފަރުގައި ޤާއިމްކުރުމަށް ނިންމާފައިވާ، ބޭންކް އޮފް މޯލްޑިވްސް (ބީއެމްއެލް) ބްރާންޗުގެ މަސައްކަތް ނިމި، އެ ތަނުން މި އަހަރުގެ ޖޫން މަހުގެ ތެރޭގައި ޚިދުމަތް ދޭން ފަށާނެކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، މިހާރު ރ އަތޮޅަށް ކުރައްވަމުން ގެންދަވާ ދަތުރުފުޅުގައި އަންގާރަ ދުވަހުގެރޭ އުނގޫފާރުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ.
މި މަޝްރޫޢު ކުރިޔަށް ގެންދެވި، މި އަހަރުގެ ޖޫން މަހުގެ ތެރޭގަ ދުވާފަރުގަ މި ބްރާންޗު ޤާއިމްކޮށް ޚިދުމަތްދޭން ފަށާނެ.
ދުވާފަރުގައި ބީއެމްއެލްގެ ބްރާންޗު ޤާއިމްކުރުމާ ގުޅޭ ގޮތުން ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، މި މަޝްރޫޢަކީ ދުވާފަރުގެ ރައްޔިތުން އެންމެ އެދޭ އެއް ކަންތައް ކަމަށާއި، އެހެންކަމުން މިކަން ހަޤީޤަތަކަށް ހެއްދެވުމަށް ބީއެމްއެލްއާއެކު މަސައްކަތްކުރައްވަމުންދާ ކަމަށެވެ.
އެގޮތުން މި މަޝްރޫޢާ ގުޅޭ މަސައްކަތްތައް ބީއެމްއެލްއިން މިހާރު ފަށާފައިވާކަމާއި، މިކަމާ ގުޅިގެން ދުވާފަރު ކައުންސިލާއެކު ވަރަށް އަވަހަށް އެއްބަސްވުމަކަށް އަންނާނެކަމަށް އެ މަނިކުފާނު ވަނީ ވިދާޅުވެފައެވެ.
ބީއެމްއެލްއާ ކައުންސިލާއެކީގަ، އެކަމާ ގުޅޭ އެގްރީމެންޓަކަށް ވަރަށް އަވަހަށް، އަޅުގަނޑަށް ޤަބޫލުކުރެވޭ ގޮތުގައި، މިއަންނަ ހަފްތާގައި އަންނާނެ. އަދި އެ ބްރާންޗުގެ މަސައްކަތްތައް މިހާރު ފެށިފައިވާކަން، ޖަލްސާއަށް އައުމުގެ ކުރިން ބީއެމްއެލްއިން އަޅުގަނޑު ޔަޤީންކުރިން.
ދުވާފަރުގައި ޤާއިމްކުރުމަށް ނިންމާފައިވާ ބޭންކިންގ ޚިދުމަތުގެ އަދާހަމަ މަޢުލޫމާތު ދެއްވަމުން ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ބޭންކިން ޚިދުމަތް ރާއްޖެއަށް ފުޅާކުރެއްވުމުގެ ސިޔާސަތުގެ ދަށުން، ރ. ރަސްގަތީމާއި، ރ. ވާދޫގައި އޭޓީއެމް ބެހެއްޓުމުގެ މަސައްކަތް ވެސް ވަނީ ފައްޓަވާދެއްވާފައެވެ.
އެގޮތުން، ރައީސުލްޖުމްހޫރިއްޔާ ރ. ރަސްގެތީމުގެ ރައްޔިތުންނާ ބައްދަލުކުރެއްވުމަށް އަންގާރަދުވަހު އޮތް ޖަލްސާގެ ތެރެއިން، އެ ރަށުގައި އޭޓީއެމް ބެހެއްޓުމަށް އެރަށު ކައުންސިލާއި ބޭންކް އޮފް މޯލްޑިވްސް އާ ދެމެދު ވަނީ އެއްބަސްވުމެއްގައި ސޮއިކޮށްފައެވެ.
މީގެ އިތުރުން، ރ. ވާދޫގައި އޭޓީއެމް ބެހެއްޓުމުގެ މަސައްކަތް އެރަށު ކައުންސިލާވެސް ވަނީ އަންގާރަދުވަހު ހަވާލުކޮށްފައެވެ.
ރައީސުލްޖުމްހޫރިއްޔާގެ ރިޔާސީ ވަޢުދުފުޅުތަކުގެ ތެރެއިން، ސަރުކާރުން ވަނީ މިއަހަރުގެ ނިޔަލަށް ރާއްޖޭގެ ހުރިހާ ރަށެއްގައި އޭޓީއެމްގެ ޚިދުމަތް ދިނުމަށާއި، މި އަހަރުގެ މާރިޗު މަހުގެ ނިޔަލަށް 17 ރަށެއްގައި އޭޓީއެމް ބެހެއްޓުމަށް ނިންމާފައެވެ.
