ހުރިހާ ދާއިރާއަކުން އެންމެ މަތީ ފަންތީގައި ޚިދުމަތް ލިބޭ ރަށަކަށް އުނގޫފާރު ވެގެންދާނެ: ރައީސުލްޖުމްހޫރިއްޔާ

ހުރިހާ ދާއިރާއަކުން އެންމެ މަތީ ފަންތީގައި ޚިދުމަތް ލިބޭ ރަށަކަށް އުނގޫފާރު ވެގެންދާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ރ. އުނގޫފާރު އަރބަން ސެންޓަރެއްގެ ގޮތުގައި ތަރައްޤީކުރެއްވުމަށް އަދުގެ ސަރުކާރުން ކުރައްވަމުން ގެންދަވާ މަސައްކަތްތަކަށް އަލިއަޅުވާލައްވައި، އެ ރަށުގެ ރައްޔިތުންނާ ބައްދަލު ކުރެއްވުމުގެ ގޮތުން އަންގާރަދުވަހުގެރޭ ބޭއްވި ޙާއްސަ ޖަލްސާގައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގެ ތަރައްޤީގެ މާސްޓަރ ޕްލޭނަކީ ދެމެހެއްޓެނިވި ތަރައްޤީއަށް ކުރިއަށްގެންދަވާ މަސައްކަތެއްކަމަށެވެ. އަދި މި ތަރައްޤީއިން އެއްވެސް ރަށެއް ބާކީ ނުކުރައްވާނެކަމަށާއި، މިއީ މުޅި ރާއްޖޭގެ އެންމެހާ ރައްޔިތުންނަށް އެންމެ މަތީ ފެންވަރުގައި ހުރިހާ ޚިދުމަތެއް ދިނުމަށް ކުރިއަށްގެންދަވާ މަސައްކަތެއްކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ. 

އަދި މި ވިސްނުމުގެ ތެރެއިން ރާއްޖޭގެ 7 ރަށެއް އެންމެ މަތީ ފެންވަރުގެ ޚިދުމަތްތައް ދިނުމުގެ ވިސްނުމުގައި އާބަން ސެންޓަރެއްގެ ގޮތުގައި ތަރައްޤީކުރުމަށް ކަނޑައަޅުއްވާފައިވާއިރު، އުނގޫފާރަކީ އެ ތަނުން އެއް ރަށްކަމުގައި އެ މަނިކުފާނު ވިދާޅުވިއެވެ. އެހެންކަމުން މިކަން ހާސިލްކުރުމަށް އެ މަނިކުފާނުގެ ދައުރުގައި މަސައްކަތްޕުޅު ކުރައްވާނެ ކަމުގައި ވިދާޅުވިއެވެ.

އެގޮތުން، މޫސުމީ ގޮތުން ދިމާވި ގޮންޖެހުންތަކާ ގުޅިގެން އެ ރަށުގެ ބިން ހިއްކުމުގެ މަސައްކަތްތައް މިވަގުތު މަޑުޖެހިފައިވީ ނަމަވެސް، އެ ފުރުސަތު ލިބުމާއެކު ވަޢުދުވެވަޑައިގެންފައި ވާ ގޮތަށް އެ މަސައްކަތް ފުރިހަމަކޮށް ނިންމަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވަވާފައެވެ.  

މީގެ އިތުރުން، ބޯހިޔާވަހިކަމަށް ސަރުކާރުން ހިންގާ މަޝްރޫޢުތަކުގެ ތެރެއިން، އެ މަިނކުފާނުގެ ދަޢުރުގައި 500 ހައުސިންގް ޔުނިޓު އުނގޫފާރުގައި އަޅައިދެއްވާނެކަމަށް ވިދާޅުވިއެވެ. މި މަޝްރޫއު ހިންގުމަށް ބޭނުންވާ ބިމާއި ފަންނީ މަސައްކަތް ނިމުނުހާ އަވަހަށް އެމަސައްކަތް ފަށާނެކަމަށާއި، އެއީ ރަށުގެ ރއްޔިތުންނާއި އެރަށަށް ހިޖުރަކުރާނެ ފަރާތްތަކާއި ސަރުކާރުގެ ބޭނުންތަކަށް އަދި ތަރައްޤީއަށް މުހިންމުކަމެއްގެގޮތުގައި ރައީސް ފާހަގަކުރެއްވިއެވެ.

އަދި ރަށުގެ ތަޢުލީމީ ދާއިރާއަށް އޮތް ތަޞައްވުރު ޙިއްސާކުރައްވަމުން އެ މަނިކުފާނު ވިދާޅުވީ، އަރބަން ސެންޓަރެއްގެ ފެންވަރުގައި ރަށް ތަރައްޤީވެގެން އަންނައިރު، 1 ދަންފަޅިއަށް ކިޔަވައިދެވޭނެ ގޮތަށް ތަޢުލީމީ ދާއިރާއަށް ބޭނުންވާ ތަރައްޤީ ގެނެސްދެއްވާނެ ކަމުގައެވެ. 

ހަމަ މި ފަދައިން ރަށުގެ ސިއްހީ ދާއިރާގެ ޚިދުމަތް ވެސް އެންމެ މަތީ ފަންތިއަށް ގެންދެވުމުގެ މަސައްކަތް ކުރައްވާނެކަމުގެ ޔަޤީންކަން ދެއްވިއެވެ. އެގޮތުން، 3 އަހަރު ދުވަހުގެ ޕްލޭނެއްގެ ދަށުން އުނގޫފާރު ރީޖަނަލް ހޮސްޕިޓަލަކީ ޓަރޝަރީ ފެންވަރުގެ ހޮސްޕިޓަލަކަށް މުޅިން އެއްކޮށް ބަދަލު ކުރެވިގެންދާނެކަން ރައީސުލްޖުމްހޫރިއްޔާ ވިދާޅުވިއެވެ.