Ads by Exprox

ޚަބަރު

ސަރުކާރުގެ ޚިދުމަތްތައް އެއް ވިއުގައަކުން ޑިޖިޓަލައިޒްކޮށް، ކުރު މުއްދަތެއްގައި ކޮރަޕްޝަން ނައްތާލެވޭނެ: ރައީސުލްޖުމްހުރިއްޔާ

ސަރުކާރުގެ ޚިދުމަތްތައް އެއް ވިއުގައަކުން ޑިޖިޓަލައިޒްކޮށް، ކުރު މުއްދަތެއްގައި ކޮރަޕްޝަން ނައްތާލެވޭނެ: ރައީސުލްޖުމްހުރިއްޔާ

ރައީސުލްޖުމްހޫރިއްޔާ އުނގޫފާރުގެ ރައްޔިތުންނާ ބައްދަލުކުރެއްވުން، ފޮޓޯ: ރައީސް އޮފީސް

މިފްތާޙް މުޙައްމަދު

މިފްތާޙް މުޙައްމަދު

22 ޖެނުއަރީ 2025، 09:33

22 ޖެނުއަރީ 2025، 09:33

ހުލާސާ

  • ޚިދުމަތްދޭ ނިޒާމު ޑިޖިޓަލައިޒްކުރުމަކީ ކޮރަޕްޝަން ހުއްޓުވުމަށް އެޅޭ މުހިންމު ފިޔަވަޅެއްކަމަށް ރައީސް ވިދާޅުވި.
  • މިކަމަށް ޑިޖިޓަލް އައިޑެންޓިޓީ ކާޑެއް ތަޢާރަފް ކުރައްވާނެ.

ސަރުކާރުގެ ޚިދުމަތްތައް އެއް ވިއުގައަކުން ޑިޖިޓަލައިޒްކުރުމާއެކު، ކުރު މުއްދަތެއްގައި ކޮރަޕްޝަން ނައްތާލެވޭނެކަމަށް ރައީސުލްޖުމްހުރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ކަމަށް އަލިއަޅުވާލައި ވާހަކަފުޅު ދެއްކެވީ، ރ. އުގޫފާރުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ޙިދުމަތްތައް ޑިޖިޓަލައިޒްކުރުމުގެ މުހިންމުކަމަށް އަލިއަޅުވާލައި ރައީސުލްޖުމްހޫރިއްޔާ ވިދާޅުވި ގޮތުގައި، އެ މަނިކުފާނު އެސްޓޯނިއާއަށް ކުރެއްވެވި ދަތުރުފުޅުން އެނގުނު އެންމެ މުހިންމު އެއްކަމަކީ، ޚިދުމަތްދޭ ނިޒާމު ޑިޖިޓަލައިޒްކުރުމަކީ ކޮރަޕްޝަން ހުއްޓުވުމަށް އެޅޭ މުހިންމު ފިޔަވަޅަކަށް ވެގެންދާނެކަމެއް ކަމަށެވެ.

އެގޮތުން، އެސްޓޯނިއާއަކީ ދުނިޔޭގެ ނިސްބަތުން ކޮރަޕްޝަން އެންމެ މަދު އެއް ޤައުމުކަމަށް ހެދުނީ، އެ ޤައުމުގެ ޚިދުމަތްތައް ޑިޖިޓަލް ނިޒާމެއްގެ ތެރެއިން ދޭން ފެށުމުންކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި އެފަދަ ނިޒާމެއް ރާއްޖޭގައި ޤާއިމްކުރެވިއްޖެނަމަ، އެ ނިޒާމުގެ ތެރެއިން ކޮރަޕްޝަނަށް ހުޅުވިފައިވާ ދޮރުތައް ބަންދުކުރެވޭނެކަމަށް އެ މަނިކުފާނު ވަނީ ވިދާޅުވެފައެވެ.

އެހެންކަމުން، އެސްޓޯނިއާގައި މިކަންކޮށްފައިވާ ފަދައިން، ރައީސުލްޖުމްހޫރިއްޔާގެ ވިސްނުންފުޅަކީ ދިވެހިރާއްޖޭގައި ވެސް ޑިޖިޓަލް އައިޑެންޓިޓީ ކާޑެއް ތަޢާރަފްކުރެއްވުންކަމަށް އެ މަނިކުފާނު ވިދާޅުވިއެވެ. 

އެންމެ ފުރަތަމަ ކަމެއްގެ ގޮތުގައި ޑިޖިޓަލް އައިޑީ ކާޑު ނިޒާމެއް އަޅުގަނޑުމެން ތަޢާރަފްކުރާނަން. ޑިޖިޓަލް އައިޑީ ކާޑު ހަދާނީ އެސްޓޯނިއާގައި އެކަން ކޮށްފައިވާ ފެންވަރުގައި. އޭގެ ޒަރިއްޔާއިން ދެން ހުރި ހުރިހާ ކަމެއް ކުރެވޭނެ. ފުރިހަމައަށް އިންޓަގްރޭޓް ކުރެވިފައިވާ ވިއުގައަކުން ގުޅާލެވިފައިވާ ނިޒާމެއްގެ ތެރެއިން އެކަން ކުރާނީ. މިކަން ކުރާނީ ކުރިއަށް އޮތް ހަތަރު އަހަރަށް ބަހާލައިގެން ތަފްޞީލީ ޕްލޭނަކާއި އެކު ހާމަކަން ބޮޑުގޮތެއްގައި.

ޑިޖިޓަލް އައިޑީ ކާޑުގެ ތަޞައްވަރު ކިޔައިދެއްވަމުން ރައީސުލްޖުމްހޫރިއްޔާ ވިދާޅުވިއެވެ.

ރާއްޖޭގައި މިހާރު ވެސް ގިނަ މުވައްސަސާތަކުން ޑިޖިޓަލް ޚިދުމަތްތައް ދެމުން އަންނަ ކަމަށާއި، ނަމަވެސް މިކަން އެއް ވިއުގައަކުން ގުޅާލާފައި ނެތުމަކީ ރަގަޅު ގޮތެއް ނޫންކަމުގައި އެ މަނިކުފާނު ފާހަގަ ކުރެއްވެވިއެވެ. އަދި މިކަމުގައި ސަރުކާރުގެ އިދާރާތަކުން އެއްބާރުލުން ދެއްވުމަށް އެ މަނިކުފާނު އެދިލެއްވިއެވެ. 

މިކަމަށް ބޭނުންވަނީ އެއްބާރުލުން. މިކަން ކުރާނީ ދެފުށް ފެންނަ ގޮތަށް. ކައުންސިލްތަކުގައިވެސް ހުރިހާ މުޢައްސަސަތަކުގައިވެސް. މިކަމަކީ ކުރުމުއްދަތެއްގެ ތެރޭގައި ޚިދުމުތުގެ ނިޒާމުގެ ތެރެއިން ކޮރަޕްޝަން ބޮޑުތަނުން ނައްތާލެވޭނެ ކަމެއް. މިކަމަށް ބޭނުންވަނީ ދިވެހި ހުރިހާ ރައްޔިތުންގެ އެއްބާރުލުން.

ޑިޖިޓަލައިޒް ކުރުމުގެ މުހިންމުކަން ކިޔާދެއްވަމުން ރައީސުލްޖުމްހޫރިއްޔާ ވިދާޅުވިއެވެ.

ޑިޖިޓަލް ޓްރާންސްފޯމޭޝަނަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިސްކަންދެއްވާ ކަމެކެވެ. އަދި ޑިޖިޓަލް އިޤްތިޞާދެއް ޤާއިމުކުރައްވައި، 2030 ވަނަ އަހަރު އަންނަންވާއިރަށް، ރާއްޖޭގެ އުފެއްދުންތެރިކަމުގެ ނިސްބަތުގެ 30 އިންސައްތަ ހިއްސާކުރަނީ، ޑިޖިޓަލް އިޤްތިޞާދަކުން ކަމަށް ހެދުމަކީ އެމަނިކުފާނުގެ ވަޢުދުފުޅެކެވެ. މިއީ 2040 ވަނަ އަހަރު އަންނަ އިރު ދިވެހިރާއްޖެއަކީ ތަރައްޤީވެފައިވާ ޤައުމަކަށް ހެއްދެވުމަށް އެމަނިކުފާނު ގެންގުޅުއްވާ ތަޞައްވަރުގެ މުހިންމު ބަހާއެކެވެ.

މި ލިޔުން ކިޔާލުމުން

Ads by MSS