ބޯޓު ބިލްޑިންގް އިންޑަސްޓްރީއިން މީހުން ބިނާކުރުމަށް ޙާއްސަ މަރުކަޒެއް އިންނަމާދޫގައި ތަރައްޤީ ކުރަނީ

އޮޑިދޯނިފަހަރު ބަނުމުގެ ދާއިރާ ނުވަތަ ބޯޓު ބިލްޑިންގް އިންޑަސްޓްރީއިން މީހުން ބިނާކުރުމަށް ޙާއްސަ މަރުކަޒެއް ރ. އިންނަމާދޫގައި ތަރައްޤީ ކުރައްވަން ގަސްތުކުރައްވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހާމަކުރައްވައިފިއެވެ.

އެ މަނިކުފާނު މިހެން ވިދާޅުވީ، މި އިންޑަސްޓްރީއަކީ ދިވެހީން ކުރިއަރާ ދިއުމަށް މަގުފަހިވެފައި އޮތް ސިނާޢީ ދާއިރާއަކަށް ހައްދަވައިދެއްވާނެކަމުގެ ޔަޤީންކަން ދެއްވަމުން، އިންނަމާދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ. 

ރައީސުލްޖުމްހޫރިއްޔާ ވިދާޅުވީ، އެ މަނިކުފާނު ވެވަޑައިގެންފައިވާ ވަޢުދުފުޅާ އެއްގޮތަށް، މި ސިނާޢަތް ކުރިއެރުވުމުގެ ގޮތުން، ޢަމަލީ ސިފައެއްގައި ގޮންޖެހުންތަކަށް ޙައްލު ހޯއްދެވުމުގެ މަސައްކަތް ވަރަށް އަވަހަށް ފަށްޓަވާނެކަމަށެވެ. 

އެގޮތުން އެ ސިނާޢަތް ކުރިއެރުއްވުމުގެ ގޮތުން، އެ މަސައްކަތުގައި ޝަމީލްވާ ފަރާތްތަކަށް ކުރިމަތިވެފައިވާ މާލީ ދަތިކަމާއި، ހުނަރު ހުރި ދިވެހީން މަދުކަމުގެ މައްސަލައާއި، ބިމުގެ ދަތިކަމުގެ މައްސަލައަށް ޙައްލުހޯއްދެވުމަށް މަސައްކަތް ކުރައްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ. 

ބޯޓު ބިލްޑިންގް ދާއިރާއިން ކުރިއަށް ދިއުމަށް ބޭނުންވެފައި ތިބި ދިވެހިންނަށް ކުރިމަތިވެފައި އޮތް މާލީ ދަތިކަން ޙައްލު ކުރެއްވުމުގެ ގޮތުން، ލުއި ގޮތެއްގައި، ރަހުނަކާ ނުލައި، ބޭންކިންގް ނިޒާމުގެ ތެރެއިން ލޯނު ނެގޭނެ އިންތިޒާމު ހަމަޖައްސަވައިދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

އަދި މި ދާއިރާގައި ބިދޭސީންގެ ޝާމިލްވުން މަދުކޮށް، މި ދާއިރާއިން ދިވެހީންގެ ހުނަރު ތަރައްޤީ ކުރެއްވުމަށް ރ. އިންނަމާދޫގައި މި މަސައްކަތަށް ތަމްރީނުދޭ ޚާއްޞަ މަރުކަޒެއް ތަރައްޤީ ކުރައްވަން ގަސްތުކުރައްވާކަން ވަނީ ހާމަކުރައްވާފައެވެ. ރައީސުލްޖުމްހޫރިއްޔާ ވިދާޅުވީ، ބޯޓު ބިލްޑިންގް ސިނާޢަތަކީ ދިވެހީންނަށް ޚާއްޞަ، އަދި ހަމަ އެކަނި ދިވެހި މަސައްކަތްތެރިން ހަރަކާތްތެރިވާ ދާއިރާއަކަށްވެ، ތަމްރީނު ވެފައިވާ ދިވެހިން އިތުރުވެގެންދާ މަންޒަރު ދެކެވަޑައިގަންނަވަން ބޭނުންފުޅުވާކަމަށެވެ.

މީގެ އިތުރުން، ބޯޓު ބިލްޑިންގް ސިނާއަތަށް ދިމާވެފައި އޮތް ބިމުގެ ދަތިކަން ޙައްލު ކުރެއްވުމަށް، ބިމާ ބެހޭ ސިޔާސަތުގެ ތެރެއިން، ދިގު މުއްދަތަކަށް ބިންތައް ކުއްޔަށް ދޫކުރެވޭނެ މަގުތައް ކައުންސިލްތަކަށް ފަހިކޮށްދެއްވައި، އެ ދާއިރާގައި އިންވެސްޓް ކުރުމުގެ އިތުބާރު ވަރުގަދަކުރުމަށްޓަކައި ކުރަންޖެހޭ ކަންކަން ހަމަޖައްސަވައިދެއްވާނެ ކަމުގައި ވިދާޅުވިއެވެ. 

އަދި، މި ސިނާއަތް ކުރިއެރުވުމުގެ މަސައްކަތް މުޅި ރާއްޖެއަށް ފުޅާކުރައްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.