ރައީސް މުޢިއްޒު ރ. ކިނޮޅަހަށް ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ރ. ކިނޮޅަހަށް ވަޑައިގެންފިއެވެ. ކިނޮޅަހަށް ވަޑައިގަތުމާއެކު އެ ރަށުގެ ރައްޔިތުން ވަނީ ރައީސްއަށް ހޫނު މަރުޙަބާއެއް ދަންނަވާފައެވެ.

މިދިޔަ އަންގާރަ ދުވަހު ފެށި މި ދަތުރުފުޅަކީ ރ. އަތޮޅުގެ 11 ރަށަކަށް ކުރައްވާ 3 ދުވަހުގެ ދަތުރުފުޅެކެވެ. ކިނޮޅަހަކީ މި ދަތުރުފުޅުގައި ރައީސް ވަޑައިގެންނެވި 9 ވަނަ ރަށެވެ.

މި ދަތުރުފުޅުގައި ކިނޮޅަހުގައި ރައީސް ކުރައްވާ މުހިންމު މަސައްކަތްތަކުގެ ތެރޭގައި ކިނޮޅަހު ކައުންސިލް އިދާރާގެ އައު އިމާރާތުގެ ބިންގާ އެޅުމާއި، ބޭންކް އޮފް މޯލްޑިވްސްގެ އޭޓީއެމް އެ ރަށުގައި ބެހެއްޓުމުގެ މަސައްކަތް ރަށު ކައުންސިލާ ހަވާލުކުރުން ހިމެނެއެވެ.

މީގެ އިތުރުން، ރައީސުލްޖުމްހޫރިއްޔާ ވަނީ ރަށުގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ރަށުގެ ރައްޔިތުންނާ ބައްދަލުކުރެއްވުމަށް ހަމަޖެހިފައެވެ. މި ބައްދަލުވުންތަކުގައި ރަށުގެ ތަރައްޤީއާ ގުޅޭ މުހިންމު މަޝްވަރާތަކެއް ކުރެވޭނެ ކަމަށް ބެލެވެއެވެ.