ރައީސް މުޢިއްޒު އިންނަމާދޫ ވޮލީ ކޯޓު ހުޅުއްވައިދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު އުތުރުބުރީގެ ރަށްތަކަށް ކުރައްވަމުންގެންދަވާ ދަތުރުފުޅުގައި އެ އަތޮޅު އިންނަމާދޫ ވޮލީ ކޯޓު މިއަދު ހެނދުނު ހުޅުއްވައިދެއްވައިފިއެވެ.

އިންނަމާދޫ ވޮލީ ކޯޓު ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ އެތަން ބައްލަވާލައްވާފައެވެ. މި ދަތުރުފުޅުގައި އިންނަމާދޫ ރައްޔިތުންނާއެކު ރޭ ބޭއްވެވި ބައްދަލުކުރެއްވުމުގައި، ޒުވާނުންނަށް ކުޅިވަރުގެ ދާއިރާއިން ބޭނުންވާ ވަޞީލަތްތައް ޤާއިމުކޮށްދެއްވުމަށް ޚާއްޞަ އަހަންމިއްޔަތުކަމެއް ދެއްވައިގެން މަސައްކަތް ކޮށްދެއްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރ. އަތޮޅުގެ ވޮލީގެ ގިނަ ހަރަކާތްތަކެއް އިންނަމާދޫގައި ފަހަކަށްއައިސް ކުރިއަށްގެންދާއިރު، އިންނަމާދޫ ވަނީ އެ އަތޮޅުގައި އެންމެ ފަހުން ބޭއްވި އަތޮޅު ވޮލީ މުބާރާތުގައި ވެސް ވާދަކޮށްފައެވެ. އިންނަމާދޫ ވޮލީ ކޯޓުގެ މަޝްރޫޢަކީ ކުރީގެ ސަރުކާރުން ހުއްޓާލާފައި އޮތް މަޝްރޫޢެކެވެ. ނަމަވެސް މިހާރުގެ ސަރުކާރުން ވަނީ މަސައްކަތް ހުއްޓިފައި ކުރިއަށްނުގެންދެވި ހުރި މަސައްކަތްތައް ދެ އަހަރުގެ ތެރޭގައި ނިންމަވާނެކަމަށް ހާމަކޮށްފައެވެ.

ރާއްޖޭގެ އެކި ކަންކޮޅުތަކުގައި ކުޅިވަރު ވަސީލަތްތައް ގާއިމުކުރުމަކީ ރައީސުލްޖުމްހޫރިއްޔާ ޚާއްޞަ އިސްކަމެއް ދެއްވައިގެން ކުރައްވަމުން ގެންދަވާ މަސައްކަތްތަކެކެވެ. މިގޮތުން ސަރުކާރުން ވަނީ އަތޮޅުތެރޭގެ ކުޅިވަރު ކުޅޭތަންތަނުގެ ހާލަތު ރަނގަޅުކުރުމަށްޓަކައި ގިނަ މަސައްކަތްތަކެއް ކޮށްފައެވެ. އެގޮތުން ވަސީލަތްތައް ގާއިމުކުރުމާއި ކުޅިވަރު ދަނޑުތަކުގެ މަރާމާތާއި ކުޅިވަރު ކުރިއަރުވާ ތަރައްޤީކުރުމަށް ސަރުކާރުން ވަނީ 255 މިލިއަން ރުފިޔާ ވޭތުވެދިޔަ އެއް އަހަރު ހޭދަކޮށްފައެވެ.