ޚަބަރު
ރައީސް މުޢިއްޒު ފައިނަށް: ރައްޔިތުންގެ މަރުޙަބާއާއެކު ތަރައްޤީގެ މަސައްކަތްތަކަށް އައު ފެށުމެއް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރ. ފައިނަށް ވަޑައިގެންފިއެވެ. ރައީސްގެ ޒިޔާރަތާ ގުޅިގެން ރަށުގެ ގިނަ އަދަދެއްގެ ރައްޔިތުން މަރުޙަބާ ދެންނެވުމަށް ބަނދަރު ސަރަޙައްދަށް ނުކުމެފައިވެއެވެ.
މި ދަތުރުފުޅަކީ ރައްޔިތުންގެ ހާލު ބެއްލެވުމާއި، ރަށްރަށުގެ ތަރައްޤީއަށް ކުރެވޭ މަސައްކަތްތަކާ ގުޅޭގޮތުން ރައްޔިތުންނާއި ކައުންސިލްގެ ޚިޔާލު ހޯއްދެވުމަށް ކުރައްވާ ދަތުރުފުޅެއްކަން ފާހަގަކުރެވެއެވެ. ފައިނަކީ ރައީސްގެ މި ދަތުރުފުޅުގައި ވަޑައިގަންނަވާ 11 ރަށުގެ ތެރެއިން 10 ވަނަ ރަށެވެ.
ރައީސްގެ މި ދަތުރުފުޅުގެ ތެރޭގައި ފައިނުގެ އާ ކައުންސިލް އިމާރާތުގެ ބިންގާ އެޅުމުގެ ރަސްމިއްޔާތު ކުރިއަށްދާނެ ކަމަށް ވެއެވެ. މީގެ އިތުރުން، ރަށުގެ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، މުއައްސަސާތަކުގެ އިސްވެރިންނާ ބައްދަލުކުރައްވާނެ ކަމަށް ބެލެވެއެވެ. އަދި ރަށުގެ ރައްޔިތުންނާވެސް ރައީސް ބައްދަލުކުރައްވާނެއެވެ.
ރައީސްގެ މި ދަތުރުފުޅުގެ ތެރެއިން، ކޮންމެ ރަށެއްގައިވެސް ރައްޔިތުންނާ ބައްދަލުކުރައްވައި، އެ ރަށްތަކުގައި ކުރިއަށް ގެންދަވަން ރާވާފައިވާ ތަރައްޤީގެ މަސައްކަތްތަކާ ގުޅޭ މަޢުލޫމާތު ޙިއްސާކުރައްވަމުން ގެންދަވާކަން ފާހަގަކުރެވެއެވެ. މި ދަތުރުފުޅަކީ ރަށްރަށުގެ ތަރައްޤީއަށް އައު ހިތްވަރަކާއި ފެށުމެއް ގެނެސްދޭނެ ދަތުރުފުޅެއް ކަމަށް ރައްޔިތުން އުންމީދުކުރެއެވެ.