ޚަބަރު
ފައިނު އެއަރޕޯޓް ތަރައްޤީކުރުމުގެ އެއްބަސްވުމުގައި އަންނަ މަހު ސޮއިކުރަނީ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ރ. ފައިނުގައި އެއަރޕޯޓް ތަރައްޤީކުރުމުގެ އެއްބަސްވުމުގައި އަންނަ މަހު ސޮއިކޮށް، ވަރަށް އަވަހަށް އަމަލީ މަސައްކަތް ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ފައިނުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް ވިދާޅުވީ ފައިނުގެ ރައްޔިތުން ދެކެމުންދާ އުންމީދުތަކެއް އެބަހުރިކަމަށާއި، ރަށުގެ ތަރައްޤީއަށް ގިނަ ކަންކަން ކުރުމަށް އެބަހުރިކަމަށެވެ. އެމަނިކުފާނު ރިޔާސީ އިންތިޚާބުގެ ކެމްޕެއިންގައި ވަޢުދުވެވަޑައިގެންނެވި އަދި ރައްޔިތުންގެ އުންމީދާ ގުޅިފައިވާ އެންމެ މުހިންމު މަޝްރޫޢުއަކީ އެއަރޕޯޓު ތަރައްޤީކުރުންކަމަށާއި، އެ މަސައްކަތްކުރުމަށް އެމްޓީސީސީއާއެކު އަންނަ ފެބުރުއަރީ މަހު އެއްބަސްވުމުގައި ސޮއިކުރުމަށް ނިންމާފައިވާކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ފައިނު އެއަރޕޯޓް މަޝްރޫޢުއަކީ އެރަށާއި އެ އަތޮޅުގެ ހުރިހާ ރައްޔިތުންގެ އުންމީދާ ގުޅިފައިވާ އަދި އިޤްތިޞާދީ ގޮތުން ކުރިއެރުން އަންނާނެ މަޝްރޫޢުއެއްކަމަށް ވިދާޅުވިއެވެ. ޚާއްޞަކޮށް ވަޒީފާގެ ގިނަ ފުރުޞަތުތަކާއި ގިނަ ރިސޯޓްތައް އެސަރަހައްދަށް އަންނާނެ މަޝްރޫޢުއެއްކަމަށްވެސް ރައީސް ވިދާޅުވިއެވެ.
މީގެ އިތުރުން، ރައީސް ވިދާޅުވީ ފެނާއި ނަރުދަމާގެ މަސައްކަތް ހުއްޓުމެއްނެތި ކުރިއަށްދާނެކަމަށާއި، ބަނދަރު ތަރައްޤީކުރުމާއި، ސިއްޙީ ދާއިރާ ތަރައްޤީކޮށް ވަސީލަތްތައް އިތުރުކުރުމާއި، ފުޓްބޯޅަ ދަނޑެއް ތަރައްޤީކުރުން ފަދަ އިތުރު މަޝްރޫޢުތައްވެސް ކުރިއަށްގެންދާނެކަމަށެވެ.
ރައީސް ވިދާޅުވީ އެމަނިކުފާނު ދެން އެރަށަށް ވަޑައިގަންނަވާނީ އެއަރޕޯޓް ތަރައްޤީކޮށްނިމި ހުޅުވުމަށްކަމަށެވެ.