ރާއްޖޭގެ ކޮންމެ އަތޮޅެއްގައި ޕަބްލިކް ވަރކްސް ޚިދުމަތް ދޭނެ ޔުނިޓެއް ޤާއިމްކުރަނީ

މި އަހަރުގެ ތެރޭގައި ރާއްޖޭގެ ކޮންމެ އަތޮޅެއްގައި ޕަބްލިކް ވަރކްސް ޚިދުމަތް ދޭނެ ޔުނިޓެއް ޤާއިމްކުރައްވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ، ރ. މާކުރަތުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ޕަބްލިކް ވަރކް ސައިޓްތައް ހެދުމަކީ އިންވެސްޓްމަންޓެއް ކަމަށާއި، ތަރައްޤީއަށް ހިންގާ ގިނަ މަޝްރޫޢުތަކެއްގެ ދުރު ރާސްތާއަށް ބަލާއިރު އެފަދަ ތަންތަން ބެލެހެއްޓުމަށްޓަކައި ޕަބްލިކް ވަރކްސް ޚިދުމަތަކީ އިންތިހާއަށް މުހިންމު ކަމެއްކަމަށެވެ.

އަދި މިކަމަކީ ދައުލަތުން އެތައް ޚަރަދެއް ސަލާމަތްކުރެވޭނެ ކަމެއްކަމަށް ވެސް ރައީސުލްޖުމްހޫރިއްޔާ ފާހަގަކުރެއްވެވިއެވެ. 

މި ޔުނިޓުތަކުގެ ރިޒޯސަސް މެނޭޖުކުރައްވާނެ ގޮތް ޙިއްސާކުރައްވަމުން އެ މަނިކުފާނު ވިދާޅުވީ، ރާއްޖޭގެ އުތުރާއި ދެކުނަށް ޙާއްސަކޮށްގެން، އަތޮޅުތަކުގެ ޕަބްލިކް ވޯކްސް ޔުނިޓުތަކުގެ މަސައްކަތްތަކަށް ބޭނުންވާ ވަސީލަތްތައް އެއް ތަނުން އަނެއްތަނަށް އުފުލައި، ބަދަލު ކުރެވޭ މޯބައިލް ޕަބްލިކް ވަރކްސް 2 ޔުނިޓު ވެސް އުފައްދަވާނެކަމަށެވެ.

މި ކަންކަން ކުރައްވާނީ 2025ވަނަ އަހަރުގެ ބަޖެޓުންކަމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. 

މިހާރަށް ބަލާއިރު، ސަރުކާރުގެ މަޝްރޫޢުތައް ހަވާލުކުރާ ކޮންޓްރެކްޓަރުން މަޝްރޫޢު ހިންގާ ރަށުން ފޭބުމަށްފަހު، ދެން އެ ތަންތަނަށް މަރާމާތެއް ބޭނުންވާ ކަމެއް ދިމާވިޔަސް، އެކަމަށް ބަޖެޓު ކުރުމާއި ހިސާބުން ފެށިގެން ގޮސް އިދާރީ ކަންކަން ހަމަޖެއްސުމަށް ވަރަށް ގިނަ ދުވަސް ހޭދަވެއެވެ. އެހެންވުމުގެ ސަބަބުން، ރައްޔިތުންނަށް ތަކުލީފު އުފުލަންޖެހި، މަޝްރޫޢުތަކުން ހާސިލްކުރަން ބޭނުންވާ ކަންކަމަށް ބުރޫއަރާ ދެއެވެ.

އެހެންނަމަވެސް ޕަބްލިކް ވާރކްސްގެ ޔުނިޓުތައް އަތޮޅު ތެރޭގައި ޤާއިމްވުމަކީ، މި މައްސަލައަށް ޙައްލު ލިބިގެންދާނެ ކަމެކެވެ.