ޚަބަރު
ރ އަތޮޅުގެ ބައެއް ރަށްރަށަށް ކުރެއްވެވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ މާލެ ވަޑައިގެންފި

ރައީސުލްޖުމްހޫރިއްޔާ، ރ. ކިނޮޅަހަށް ވަޑައިގަތުން، ފޮޓޯ: ރައީސް އޮފީސް
ހުލާސާ
މި ދަތުރުފުޅުގައި ރައީސުލްޖުމްހޫރިއްޔާ ވަނީ އެ އަތޮޅުގެ 11 ރަށަކަށް ޒިޔާރަތްކުރައްވާފައި.
ރ އަތޮޅުގެ ބައެއް ރަށްރަށަށް ކުރެއްވެވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މާލެ ވަޑައިގެންފިއެވެ.
މި ދަތުރުފުޅުގައި ރައީސުލްޖުމްހޫރިއްޔާ ވަނީ އެ އަތޮޅުގެ 11 ރަށަކަށް ޒިޔާރަތްކުރައްވާފައެވެ. އަދި އެ ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، ރަށްރަށުގެ މުވައްސަސާތަކުގެ އިސްވެރިންނާ ބައްދަލުކުރައްވައި، ރަށްރަށަށް ބޭނުންޖެހިފައިވާ ކަންކަމާއި، ރަށްރަށުގެ ތަރައްޤީއަށް މަސައްކަތްކުރައްވާއިރު، އެންމެ އިސްކަމެއް ދޭންޖެހޭ ކަންކަން އޮޅުންފިލުވާފައި ވެއެވެ.
މީގެ އިތުރުން، ރައްޔިތުންގެ ޙާލު ބައްލަވާ، އެ ރައްޔިތުންނަށް އެންމެ ބޭނުންޖެހިފައިވާ ކަންކަން ވެސް ވަނީ އޮޅުންފިލުއްވާފައެވެ.
އަދި، މި އަހަރަކީ ޢަމަލީ ތަރައްޤީގެ އަހަރުކަމަށް ރައީސުލްޖުމްހޫރިއްޔާ ވިދާޅުވެފައިވާއިރު، މިކަންކަމުގެ ތެރެއިން ރައްޔިތުން އުއްމީދުކުރަންވީ ކަންކަން އެ މަނިކުފާނު ޙިއްސާކުރެއްވެވިއެވެ. އަދި އެކި ރަށްތަކަށް އެންމެ ބޭނުން ޖެހިފައިވާ ދާއިރާތަކުން މަޝްރޫޢުތައް ހިންގުމަށްޓަކައި ސަރުކާރުން ދެއްވަންޖެހޭ އެއްބާރުލުން ދެއްވާނެކަމުގެ ޔަޤީންކަން ކައުންސިލްތަކަށާއި ރައްޔިތުންނަށް ރައީސުލްޖުމްހޫރިއްޔާ ދެއްވާފައިވެއެވެ.
ހަމައެއާއެކު، ބައެއް ރަށްރަށުގެ ތަރައްޤީޤެ މަޝްރޫޢުތައް ފައްޓަވައި، ބައެއް ރަށްރަށުގައި ޤާއިމުކޮށް ނިމިފައިވާ ޚިދުމަތްތައް ރައީސުލްޖުމްހޫރިއްޔާ އިފުތިތާހުކޮށްދެއްވިއެވެ.
ރައީސުލްޖުމްހޫރިއްޔާގެ މި ދަތުރުފުޅުތަކުގައި އެ މަނިކުފާނުގެ ކެބިނެޓް މިނިސްޓަރުން ބައިވެރިވެ ވަޑައިގަންނަވާ ސަބަބު ޙިއްސާކުރައްވަމުން ވިދާޅުވީ، އެއީ ތަރައްޤީގެ ދުވެލި ބާރު ކުރެއްވުމަށް ކަމަށާއި، އެ ގޮތުން ރަށްރަށުގެ ކައުންސިލާއި އެހެނިހެން މުއައްސަސާތަކާއި ވަޒީރުންނާއި ބައްދަލުވެ، އެ ބޭފުޅުންނާ ސީދާ ވާހަކަ ދެކެވިގެން، މައްސަލަތައް ހައްލުކުރެވި، އަވަހަށް ކުރިއަށް ދެވޭނެގޮތާއި ނަތީޖާއާ ހަމައަށް ވާސިލުވެވޭނެގޮތްކަމަށް ވާތީކަމަށެވެ.