ތަޢުލީމީ ނިޒާމުގައި ފަންނިއްޔާތު އެކުލެވިގެންދިއުމަކީ ލާޒިމު ކަމެއް: ރައީސުލްޖުމްހޫރިއްޔާ

ޓެކްނޮލޮޖީގެ ގޮތުން ދުނިޔެ ކުރިއަރާފައިވާ މިފަދަ ޒަމާނެއްގައި، ތަޢުލީމީ ނިޒާމުގައި ފަންނިއްޔާތު އެކުލެވިގެންދިއުމަކީ ލާޒިމު ކަމެއްކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ދުނިޔޭގެ ތަޢުލީމީ ދުވަހާ ގުޅިގެން ހިއްސާކުރެއްވި ޚާއްޞަ މެސެޖުގައެވެ.

ޑިޖިޓަލް ވަސީލަތްތަކާއެކު ދިވެހިރާއްޖޭގައި ތަޢުލީމު އުނގަންނައި ދިނުމުގެ ތަޞައްވަރަށް އަލިއަޅުވާލައްވަމުން އެ މަނިކުފާނު ވިދާޅުވީ، މަތީފަންތީގެ އީ-ލަރނިންގ ވަޞީލަތްތަކާއި، އާޓިފިޝަލް އިންޓެލިޖަންސާއި އަދި ވަރޗުއަލް ރިއަލިޓީ ތަޢުލީމީ ނިޒާމުގެ ތެރޭގައި ހިމަނައިގެން މުސްތަޤްބަލުގެ ޖީލުތަކަށް އުނގަންނައިދެވޭނެ ކަމަށާއި، އަދި މިއީ ރާއްޖެ ފަދަ ޖަޒީރާ ޤައުމަކަށް ރަގަޅު ގޮތެއް ކަމަށް އެ މަނިކުފާނު ވިދާޅުވިއެވެ.

ނަމަވެސް، މިހާ ފުޅާ ދާއިރާއެއްގައި އާޓިފިޝަލް އިންޓެލިޖެންސްގެ އެހީގައި ތަޢުލީމީ ނިޒާމަށް ފުރުޞަތުތައް ފަހިވެފައިވާ މި ދަނޑިވަޅުގައި، މި ނިޒާމުގައި އިންސާނީ ސިފަ ދެމެހެއްޓުމަކީ މުހިންމުކަމެއް ކަމަށް އެ މަނިކުފާނު ވަނީ ވިދާޅުވެފައެވެ. 

އަދި މި ޤައުމުގައި ދޭ ތަޢުލީމަކީ ފެންވަރު ރަގަޅު ތަޢުލީމަކަށް ހަދައި، ކޮންމެ ކުއްޖަކީ ބަދަލުވަމުންމިދާ ދުނިޔޭގައި ފައިހަމަކޮށްލުމުގެ ޤާބިލުކަން ލިބޭފަދަ ރަނގަޅު ފެންވަރުގެ ތަޢުލީމު ލިބޭ ކުއްޖެއްކަން ކަށަވަރުކުރައްވާނޭކަމުގެ ޔަޤީންކަން އެމަނިކުފާނުގެ މެސެޖުގައި ދެއްވެވިއެވެ.

މެސެޖު ނިންމަވާލެއްވުމުގެ ކުރިން، ކުޑަކުދިންނާއި ޒުވާނުންގެ ޢިލްމާއި ހުނަރުތައް އިތުރުކުރުމަށް، ތަޢުލީމީ ދާއިރާގައި އިޚުލާސްތެރި މަސައްކަތްތައްކޮށްދެއްވާ ދިވެހި އަދި ބޭރުގެ ތަޢުލީމީ މުވައްސަސާތަކާއި ވަކިވަކި ފަރުދުންނަށް ޝުކުރު އަދާކުރައްވާފައިވެއެވެ.