ޚަބަރު
ރައީސް މުޢިއްޒު އިލެކްޝަންސް ކޮމިޝަނަށް ދެ މެންބަރުން ޢައްޔަނުކުރައްވައިފި

އިލެކްޝަންސް ކޮމިޝަނަށް ދެ މެންބަރުން ޢައްޔަނުކުރެއްވުން ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު ހެނދުނު އިލެކްޝަންސް ކޮމިޝަނުގެ މެންބަރުކަމަށް ދެ ބޭފުޅަކު ޢައްޔަންކުރައްވައިފިއެވެ. މި ދެ ބޭފުޅުންނަކީ މުޙައްމަދު ޒާހިދު (ދަފުތަރު ނަންބަރު ރސ 1548) އަދި ޢަބްދުއްރަޙްމާން ޞަލާޙް ރަޝީދު (ކ.ހުރާ، ރޯޒް) އެވެ.
މި ދެ ބޭފުޅުން ޢައްޔަނުކުރެއްވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 168 ވަނަ މާއްދާގެ (ށ) އާއި، ޤާނޫނު ނަންބަރު 8/2008 (އިލެކްޝަންސް ކޮމިޝަނުގެ ޤާނޫނު) ގެ 4 ވަނަ މާއްދާގެ (ހ) ގައިވާ ގޮތުގެމަތީންނެވެ. އިލެކްޝަންސް ކޮމިޝަނަކީ ޤާނޫނުއަސާސީގެ 167 ވަނަ މާއްދާގެ (ހ) ގެ ދަށުން އުފައްދާފައިވާ މުއައްސަސާއެކެވެ.
މެންބަރުކަމަށް ޢައްޔަންކުރެއްވިކަމުގެ ލިޔުން ހަވާލުކުރެއްވުމަށް މިއަދު ރައީސުލްޖުމްހޫރިއްޔާގެ އޮފީހުގައި ޚާއްޞަ ރަސްމިއްޔާތެއް ބޭއްވުނެވެ. މި ރަސްމިއްޔާތުގައި މެންބަރުކަމުގެ ލިޔުން ހަވާލުކުރެއްވުމުގެ ކުރިން، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު މަހާޒް ޢަލީ ޒާހިރުގެ ކުރިފުޅުމަތީގައި، އައު މެންބަރުން ދެބޭފުޅުން ވަނީ އިލެކްޝަންސް ކޮމިޝަނުގެ މެންބަރުކަމުގެ ހުވައި ކުރައްވައި، ހުވައިގެ އިޤުރާރުގައި ސޮއިކުރައްވާފައެވެ.