ޚަބަރު
ރައީސް މުޢިއްޒު އޭސީސީއަށް ދެ މެންބަރުން ޢައްޔަން ކުރައްވައިފި

އޭސީސީއަށް ދެ މެންބަރުން ޢައްޔަން ކުރެއްވުން ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެންޓި-ކޮރަޕްޝަން ކޮމިޝަނުގެ (އޭސީސީ) މެންބަރުކަމަށް މިއަދު ދެ ބޭފުޅަކު ޢައްޔަން ކުރައްވައިފިއެވެ. މިގޮތުން ޢައްޔަން ކުރެވުނީ މއ. ގޯލްޑަންމޫން އަޙްމަދު ނާޝިދު އަދި ރ. އަލިފުށި، ފަސާނާ ޢަބްދުﷲ ނާޝިދެވެ.
އަޙްމަދު ނާޝިދަކީ ޕޮލިސް ބޯޑުގެ މެންބަރުކަމާއި، ކުރީގެ އެސިސްޓަންޓް ކޮމިޝަނަރ އޮފް ޕޮލިސްގެ މަޤާމު ފުރުއްވާފައިވާ ބޭފުޅެކެވެ. އަނެއް ބޭފުޅާ ކަމަށްވާ ޢަބްދުﷲ ނާޝިދަކީ އިންޑިއާގެ ރީޖަނަލް އިންސްޓިޓިއުޓް އޮފް އެޑިއުކޭޝަން އިން މާސްޓަރ އޮފް އެޑިއުކޭޝަން (ސްކޫލް މެނޭޖްމަންޓް) ޙާޞިލްކުރައްވާފައިވާ ބޭފުޅެކެވެ. އަދި އޭނާއަކީ އާސަންދަ ކުންފުނީގެ އެކި ޑިޕާޓްމަންޓުގެ މެނޭޖަރުކަންވެސް ކުރައްވާފައިވާ ބޭފުޅެކެވެ.
މި ދެ ބޭފުޅުން އޭސީސީގެ މެންބަރުކަމަށް ޢައްޔަން ކުރެއްވުމުގެ ކުރިން، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު މަހާޒް ޢަލީ ޒާހިރުގެ ކުރިފުޅުމަތީގައި އެންޓި-ކޮރަޕްޝަން ކޮމިޝަންގެ މެންބަރުކަމުގެ ހުވައި ކުރެއްވިއެވެ. އަދި ރަސްމިއްޔާތުގައި ރައީސުލްޖުމްހޫރިއްޔާ މި ދެ ބޭފުޅުންނާ އޭސީސީގެ މެންބަރުކަމަށް ޢައްޔަން ކުރެއްވި ކަމުގެ ލިޔުން ޙަވާލުކޮށްދެއްވިއެވެ.