ޚަބަރު
އެޗްއާރުސީއެމްގެ ނާއިބު ރައީސްގެ މަޤާމަށް މުއުމިނާ އައްޔަންކުރައްވައިފި

ހިއުމަން ރައިޓްސް ލޯ މޭކިންގްއާ ގުޅޭ ސެޝަނެއްގައި 2024 ވަނަ އަހަރުގެ ޖުލައި މަހުމުއުމިނާ ވާހަކަފުޅު ދައްކަވަނީ، ފޮޓޯ: އެޗްއާރުސީއެމް
ހުލާސާ
2020 ސެޕްޓެމްބަރު 8 ވަނަ ދުވަހުން ފެށިގެން މުއުމިނާ ހުންނެނީ އެޗްއާރުސީއެމްގެ މެންބަރަކަށް.
މުއުމިނާ ވަނީ އޮސްޓްރޭލިއާގެ ޔުނިވާރސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައި.
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރަކަށް ހުންނެވި، މ. ޖިއެނާ، މުއުމިނާ ވަޙީދު، އެ ކޮމިޝަނުގެ ނާއިބު ރައީސްގެ މަޤާމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އާދީއްތަ ދުވަހު އައްޔަންކުރައްވައިފިއެވެ.
މުއުމިނާ މި މަޤާމަށް އައްޔަނުކުރެއްވީ، ހިއުމަން ރައިޓްސް ކޮމިޝަނުގެ ޤާނޫނުގެ 8 ވަނަ މާއްދާގައިވާ ގޮތުގެމަތީންނެވެ. އެ މާއްދާގައި ބުނާގޮތުން، ކޮމިޝަނުގެ ރައީސަކު ނުވަތަ ނާއިބު ރައީސަކު ޢައްޔަންކުރުމަށް ބޭނުންވާ ކޮންމެ ފަހަރަކު، ކޮމިޝަނަށް ޢައްޔަންކުރެވޭ މެންބަރުންގެ ތެރެއިން މީހެއް ނުވަތަ މީހުންގެ ނަން، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަން ޖެހެއެވެ. އަދި ރައީސުލްޖުމްހޫރިއްޔާ ހުށަހަޅާ ނަންތަކުގެ ތެރެއިން ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވި މެންބަރުންގެ އަޢްލަބިއްޔަތުން ފާސްކުރާ މީހަކު، ކޮމިޝަނުގެ ރައީސްކަމުގެ މަޤާމަށް ނުވަތަ ނާއިބު ރައީސްކަމުގެ މަޤާމަށް ޢައްޔަންކުރެވިގެންދާނެއެވެ.
އެގޮތުން، މުއުމިނާގެ ނަން ރައްޔިތުންގެ މަޖިލީހަށް ރައީސުލްޖުމްހޫރިއްޔާ ފޮނުއްވެވީ މި މަހުގެ 16ވަނަ ދުވަހެވެ. އަދި މުއުމިނާ މި މަޤާމަށް އައްޔަން ކުރުމަށް ފާސްކޮށްފައިވަނީ ޖަލްސާގައި ބައިވެރިވި މެމްބަރުންގެ ތެރެއިން 67 މެންބަރުންގެ ވޯޓުންނެވެ.
އެޗްއާރުސީއެމްގެ މެންބަރުކަމަށް މުއިމިނާ އައްޔަންކޮށްފައި ވަނީ 2020 ސެޕްޓެމްބަރު 8 ވަނަ ދުވަހެވެ.
މުއުމިނާ މަތީ ތަޢުލީމު ހާސިލްކުރެއްވީ އޮސްޓްރޭލިއާގެ ޔުނިވާރސިޓީ އޮފް ސިޑްނީންނެވެ. އެ ޔުނިވަރސިޓީން މުއުމިނާ ވަނީ ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައެވެ.
ކޮމިޝަނުގެ މެންބަރަކަށް އައްޔަން ކުރެއްވުމުގެކުރިން، އެ ކޮމިޝަންގެ އެސިސްޓެންޓް ރިސާރޗް އޮފިސަރުގެ މަޤާމާއި، ޕްލޭނިން އޮފިސަރުގެ މަޤާމުގެ އިތުރުން، ކޯޕަރޭޓް އެފެއާރޒް ޑިޕާޓްމެންޓުގެ ޑިރެކްޓަރުގެ މަޤާމުވެސް މުއުމިނާ އަދާކުރައްވާފައިވެއެވެ.
މީގެ އިތުރުން، އިކޮނޮމިކް މިނިސްޓްރީގައި ކޮންސަލްޓެންޓެއްގެ މަގާމުވެސް ކުރިން އޭނާ އަދާކުރެއްވެވިއެވެ.
އެޗްއާރުސިއެމްއަށް ނާއިބު ރައީސަކު އައްޔަން ކުރެވުމުގެ މަސައްކަތް ރައީސުލްޖުމްހޫރިއްޔާ ފެއްޓެވީ، އެ ކޮމިޝަންގެ ކުރީގެ ނާއިބު ރައީސް ޑރ. އަޙްމަދު އަދުހަމް ޢަބްދުﷲ މަޤާމުން އިސްތިއުފާދެއްވުމާ ގުޅިގެންނެވެ.