ވަޢުދުތައް ވަނީ ޕްލޭނާއެކު، ތަރުތީބުން ފުއްދާނަން : ރައީސް މުޢިއްޒު

ޕްލޭނެއް ނެތި ވަޢުދުތަކެއް ވެވަޑައިގަންނަވަމުންދާކަމަށް ކުރާ ތުހުމަތުތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްދުދެއްވައިފިއެވެ. މުރައިދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވެވަޑައިގެންނެވި ކޮންމެ ވަޢުދަކީ، އެކަމެއް ފުއްދާނެގޮތުގެ ޕްލޭން ކުރެވި، ކުރިއަށްދާނެގޮތް ދެނެގަނެގެން ވެވަޑައިގަންނަވާ ވަޢުދުތަކެއްކަމަށެވެ.

ދެން ފެނިގެންދާނީ އަޅުގަނޑުމެން ފާސްކުރި ބަޖެޓުގެ ތެރެއިން މަޝްރޫޢުތައް ފަށައިގަންނަތަން. ހުއްޓިފައިވާ މަޝްރޫޢުތަކާ އަލަށް ފަށާ މަޝްރޫޢުތައް ހިނގައިގަންނަތަން. މިއަހަރާ އަންނަ އަހަރު ފެންނާނީ މި ދެބާވަތުގެ މަޝްރޫޢުތައް ކުރިއަށްދާތަން

 ރައީސް 

ރައީސް އިތުރަށް ވިދާޅުވީ، މިދިޔަ އަހަރު މަޝްރޫޢުތައް ކުރިއަށް ނުގެންދެވުނީ އިޤްތިޞާދީ ކަންކަމަށް އިސްކަންދިނުމާއި ބަޖެޓުގެ ތާށިކަން އޮތުމުންކަމަށެވެ. ނަމަވެސް މިހާރު އެ ދަތިތައް ހައްލުވެ، މަޝްރޫޢުތައް ކުރިއަށްދާނެ މަގުތައް ހޯދާފައިވާކަމަށް އެމަނިކުފާނު ވިދާޅުވިއެވެ.

މުރައިދޫގެ ތަރައްޤީއަށް ވަޢުދުތަކެއް ވެވަޑައިގެންފައިވާކަން ފާހަގަކުރައްވައި ރައީސް ވިދާޅުވީ، އެރަށުގެ ބަނދަރުގެ މައްސަލައަށް ދާއިމީ ހައްލެއް ގެނެސްދެއްވާނެކަމަށެވެ. އަދި ބަނދަރުގެ މައްސަލަ ހައްލުކުރެއްވުމަށްފަހު، މަގުތައް ޒަމާނީ ފެންވަރަށް ތަރައްޤީކުރުމާއި، ސިއްޙީ އަދި ތަޢުލީމީ ދާއިރާގެ ޚިދުމަތްތައް ފުޅާކުރެއްވުމުގެ އިތުރުން ކުޅިވަރުގެ ވަސީލަތްތައްވެސް ޤާއިމްކޮށްދެއްވާނެކަމުގެ ޔަޤީންކަން ރައީސް ދެއްވިއެވެ.

ރައީސް ވިދާޅުވީ ރައްޔިތުން އެންމެ އެދޭކަންކަމަށް އިސްކަންދެއްވައިގެން ކަންކަންކުރާއިރު މެދުރާސްތާއާއި ދުރުރާސްތާގެ ޕްލޭނާއެކު ކުރިއަށްދާކަމަށާއި، ކޮންމެ ކަމެއްވެސް ކުރައްވަނީ ޕްލޭނަކާއެކުކަމަށެވެ. އަދި އެކަންކަން ފުރިހަމަކުރާނެ ތަރުތީބު ސަރުކާރުގައި އެބައޮތްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.