ހއ. ފިއްލަދޫގައި "މަގޭ ސޯލާ" ޕްރޮގްރާމް ރަސްމީކޮށް ފައްޓަވައިފި

ސޯލާ ހަކަތައިން ކަރަންޓު އުފައްދައި ބޭނުންކުރުމަށް ގޭބިސީތަކަށް ފުރުސަތު ފަހިކޮށްދިނުމުގެ ގޮތުން ހިންގުމަށް ރާވާފައިވާ "މަގޭ ސޯލާ" ޕްރޮގްރާމުގެ ޢަމަލީ މަސައްކަތް ރަސްމީކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހއ. ފިއްލަދޫގައި އިފްތިތާހްކޮށް ދެއްވައިފިއެވެ.

މި ޕްރޮގްރާމަކީ ގޭބިސީތަކުން ކަރަންޓު ބިލަށް ކުރާ ހޭދަ ކުޑަކުރުމަށާއި، އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓުގެ މިންވަރު އިތުރުކުރުމަށް އަމާޒުކޮށްގެން ސަރުކާރުން ހިންގާ ޕްރޮގްރާމެކެވެ. މި ޕްރޮގްރާމުގެ ސަބަބުން، 2028 ވަނަ އަހަރުގެ ކުރިން ދިވެހިރާއްޖޭގައި ބޭނުންކުރާ ކަރަންޓުގެ 33 އިންސައްތަ އިއާދަކުރަނިވި ހަކަތައިގެ ވަސީލަތްތަކުން އުފެއްދުމުގެ އަމާޒަށް ވާސިލުވުމަށް މަގުފަހިވެގެންދާނެއެވެ.

މި ޕްރޮގްރާމުގެ ފުރަތަމަ ފިޔަވަހީގެ ދަށުން ޖުމްލަ 750 ގޭބިސީއަކަށް ސޯލާ ޕީވީ ނިޒާމު ފޯރުކޮށްދެވޭނެއެވެ. ފެނަކަ ކޯޕަރޭޝަން މެދުވެރިކޮށް، ސޯލާ ޕީވީ ނިޒާމުތައް އިންސްޓޯލްމަންޓް އުސޫލުން ގަތުމުގެ އިންތިޒާމު ވަނީ ހަމަޖެހިފައެވެ. މި ނިޒާމުތައް ގާއިމުކުރެވޭނީ ނެޓް މީޓަރިންގ އުޞޫލުގެ ދަށުންނެވެ.

ސަރުކާރުގެ އަމާޒަކީ މި ޕްރޮގްރާމުގެ ދަށުން ވީހާވެސް ގިނަ ފަރާތްތަކަށް އަމިއްލަ ގޭގައި ސޯލާ ޕީވީ ސިސްޓަމް ޤާއިމުކުރެވޭނެ މަގު ފަހިކޮށްދިނުމެވެ. މި ޕްރޮގްރާމު އިތުރަށް ފުޅާކުރުމަށްޓަކައި، އިތުރު ސޯލާ ޕީވީ ސިސްޓަމްތައް ހޯދުމަށް ފުރަތަމަ ކްއާރޓަރުގެ ތެރޭގައި ބީލަން ހުޅުވާލުމަށް ސަރުކާރުން ދަނީ ތައްޔާރުވަމުންނެވެ.