ރައީސް މުޢިއްޒު ހޯރަފުށީގެ ތަރައްޤީއަށް އެހީތެރިވެދެއްވުމަށް މަޝްވަރާކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ރޭ ހޯރަފުށީ ކައުންސިލް އިދާރާގައި ބޭއްވުނު ބައްދަލުވުމެއްގައި، ހޯރަފުށީގެ ތަރައްޤީއަށް އެންމެ ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުވުމުގައި ހޯރަފުށީ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.

ބައްދަލުވުމުގައި ހޯރަފުށީ ކައުންސިލުން ގިނަ ކަންބޮޑުވުންތަކެއް ފާޅުކުރެއްވިއެވެ. އޭގެ ތެރޭގައި ހޮސްޕިޓަލްގެ މަސައްކަތް އަވަސްކުރުމާއި، ކުނީގެ މައްސަލައަށް ހައްލެއް ހޯދުމާއި، ބޯހިޔާވަހިކަމުގެ މައްސަލަ ހައްލުކުރުމަށް ބިން ހިއްކުން ހިމެނެއެވެ. މީގެ އިތުރުން، ބަނދަރުގެ ޖާގައިގެ ދަތިކަން ހައްލުކުރުމާއި، ހޯރަފުށީ އެއަރޕޯޓް ބައިނަލްއަޤްވާމީ ކުރުމާއި، އިސްލާމިކް ސެންޓަރެއް ޤާއިމުކުރުމަށް ވެސް އެދިވަޑައިގެންނެވިއެވެ. އަދި ރަށުގެ އިޚްތިޞާޞްގައި ހުވަންދޫ ހިމެނުމަށް ވެސް ކައުންސިލުން އެދިވަޑައިގެންނެވިއެވެ.

ރައީސް މުޢިއްޒު ވިދާޅުވީ، ކައުންސިލުން ފާހަގަކުރެއްވި ކަންކަމަށް ހައްލު ހޯދުމަށް މަސައްކަތްކޮށްދެއްވާނެ ކަމަށެވެ. އަދި ބައްދަލުވުމުގައި ބައިވެރިވެވަޑައިގެންނެވި ވަޒީރުން، ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިން ފާޅުކުރެއްވި ކަންބޮޑުވުންތަކާ ގުޅޭ އެންމެ ފަހުގެ މަޢުލޫމާތު ހިއްސާކުރެއްވިއެވެ.

މި ބައްދަލުވުމަކީ ރައީސް މުޢިއްޒުގެ ހއ. އަތޮޅަށް ކުރައްވާ ދަތުރުފުޅުގެ ތެރެއިން ބޭއްވުނު ބައްދަލުވުމެކެވެ.