Ads by Exprox

ޚަބަރު

މޮޅަދޫގެ އާބާދީ ކުޑަނަމަވެސް، އެންމެ ބޮޑެތި އާބާދީތަކާ އެއްވަރަށް ތަރައްޤީކޮށްދޭނަން : ރައީސް މުޢިއްޒު

މޮޅަދޫގެ އާބާދީ ކުޑަނަމަވެސް، އެންމެ ބޮޑެތި އާބާދީތަކާ އެއްވަރަށް ތަރައްޤީކޮށްދޭނަން : ރައީސް މުޢިއްޒު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް

އާމިނަތު ޔުމްނާ

އާމިނަތު ޔުމްނާ

30 ޖެނުއަރީ 2025، 11:31

30 ޖެނުއަރީ 2025، 11:31

ތިލަދުންމަތީ އުތުރުބުރީ މޮޅަދޫގެ އާބާދީ ކުޑަނަމަވެސް، އެންމެ ބޮޑެތި އާބާދީތަކާ އެއްވަރަށް ތަރައްްޤީކޮށްދޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. އެމަނިކުފާނު މި ޔަޤީންކަންދެއްވީ، މިއަދު މޮޅަދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. 

412 މީހުންގެ އާބާދީއެއް ދިރިއުޅެމުންދާ މޮޅަދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ މޮޅަދޫގެ އާބާދީ ކުޑަނަމަވެސް، އެންމެ ބޮޑު އާބާދީތަކުގެ ރައްޔިތުންނާ ހަމަހަމަކަމަށެވެ. އެ ރައްޔިތުންނަށްވެސް ހުރިހާ ހައްގުތަކާއި ޚިދުމަތްތައް މުހިންމުކަމަށް ވިދާޅުވަމުން ރައީސް ވަނީ މޮޅަދޫގެ ރައްޔިތުން އުންމީދުކުރާގޮތަށް ވަރަށް އިސްކަންދީގެން ބާރު ސްޕީޑުގައި ކަންކަން ކުރުމަކީ ސަރުކާރުގެ ސިޔާސަތުކަމަށް ހާމަކުރައްވާފައެވެ.

ރައީސް މުޢިއްޒު ވަނީ މޮޅަދޫގައި ބައެއް މަޝްރޫޢުތައް ހުއްޓިފައި ހުރިކަން ފާހަގަކުރައްވާފައެވެ. އޭގެ ތެރޭގައި 2021 ވަނަ އަހަރު ފެށި ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތް ހިމެނެއެވެ. ރައީސް ވިދާޅުވީ މި މަޝްރޫޢު އަވަސްކޮށް ނިންމައިދެއްވާނެކަމަށެވެ. އަދި ލޯކަލް ޓޫރިޒަމަށް ފީސިބަލް ރަށަކަށްވާތީ، އެ ސަރަހައްދަށްވެސް ފެނާއި ނަރުދަމާގެ ޚިދުމަތް ފުޅާކޮށްދޭނެކަމަށް އެމަނިކުފާނު ވިދާޅުވިއެވެ.

ތަޢުލީމީ ދާއިރާއަށް އިޝާރާތްކުރައްވަމުން ރައީސް ވިދާޅުވީ 2021 ވަނަ އަހަރު ފެށި މޮޅަދޫ ސްކޫލްގެ އައު ޢިމާރާތުގެ މަސައްކަތް ނިންމައި، އައު ވަސީލަތްތައް ހޯދައިދެއްވާނެކަމަށެވެ. މީގެއިތުރުން ސިއްޙީ ދާއިރާއަށްވެސް ވަސީލަތްތައް ހޯދައިދީ، މުވައްޒަފުންނާއި ޢިމާރާތުގެ ގޮތުން ހުރި މައްސަލަތައް ހައްލުކޮށްދޭނެކަމަށް ރައީސް ވިދާޅުވިއެވެ.

ކުނީގެ މައްސަލައަށް ހައްލު ހޯދައިދިނުމުގެ ގޮތުން މޮޅަދޫގައި ޒަމާނީ ކުނި ކޮށްޓެއް ޤާއިމްކުރެއްވުމަށް ރާވާފައިވާކަމަށް ރައީސް ވިދާޅުވިއެވެ. އަދި ކުޅިވަރުގެ ވަސީލަތްތައް ތަރައްޤީކުރުމުގެ ގޮތުން ފިޓްނަސް އެންޑް ރެކްރިއޭޝަން ސެންޓަރަކާއި ފުޓްސަލް ދަނޑަކާއި ވޮލީ ކޯޓެއް ޤާއިމްކޮށްދެއްވާނެކަމުގެ ޔަޤީންކަންވެސް ރައީސް ދެއްވިއެވެ.

ރައީސް މުޢިއްޒުގެ ވާހަކަފުޅު ނިންމަވާލެއްވީ މޮޅަދޫގެ ތަރައްޤީގެ ގިނަ މަޝްރޫޢުތައް މިއަހަރު ކުރިއަށްގެންދަވާނެކަމުގެ ފުރިހަމަ ޔަޤީންކަން ރައްޔިތުންނަށް ދެއްވަމުންނެވެ.

މީގެއިތުރުން، ރައީސް ވަނީ މޮޅަދޫއަކީ ބިން ބޮޑު ރަށެއްކަމުން ކައުންސިލުން ބޭނުންވާ ގޮތަށް ގޯތި ދޫކުރުން ކުރިއަށް ގެންދިއުމުގައި ސަރުކާރުގެ އެއްބާރުލުން ދޭނެކަން ފާހަގަކުރައްވާފައެވެ. އަދި ގެދޮރު ބިނާކުރުމަށް ސަރުކާރުން ހުޅުވާލާފައިވާ ފަހި ލޯނުގެ ފުރުޞަތުގެ ބޭނުންހިފުމަށްވެސް ރައްޔިތުންނަށް އިލްތިމާސް ކުރެއްވިއެވެ.

ރައީސް މުޢިއްޒުގެ މި ދަތުރުފުޅަކީ މޮޅަދޫގެ ރައްޔިތުންނަށް އުއްމީދީ މެސެޖުތަކެއް ދެއްވި ދަތުރުފުޅެކެވެ. ޚާއްޞަކޮށް ހުއްޓިފައިވާ މަޝްރޫޢުތައް އަލުން ފެށުމާއި، އަސާސީ ޚިދުމަތްތައް ފޯރުކޮށްދިނުމަށް ކުރައްވާނެ މަސައްކަތްތަކުގެ ވާހަކަ ވިދާޅުވެ ދެއްވުމުން ރައްޔިތުންގެ މެދުގައި އުފާވެރިކަން ފާޅުކުރިއެވެ.

މި ދަތުރުފުޅުގައި ރައީސް މުޢިއްޒު ވަނީ މޮޅަދޫގެ އެކި ސަރަޙައްދުތަކަށް ޒިޔާރަތްކުރައްވައި، ރަށުގެ ޙާލަތު ބައްލަވާލައްވާފައެވެ. އަދި ރައްޔިތުންގެ ކަންބޮޑުވުންތަކަށް ސީދާ އަޑުއައްސަވައި، އެކަންކަމަށް ޙައްލު ހޯދައިދެއްވުމަށް މަސައްކަތް ކުރައްވާނެކަމުގެ ޔަޤީންކަން ދެއްވާފައިވެއެވެ.


                    

މި ލިޔުން ކިޔާލުމުން

Ads by MSS