ރާއްޖޭގެ ހުރިހާ ހުއްޓިފައިވާ މަޝްރޫޢުތައް ފެބުރުއަރީގައި ފަށާނެކަމުގެ ޔަޤީންކަން ރައީސް ދެއްވައިފި

ރާއްޖޭގެ އެކި ކަންކޮޅުތަކުގައި ހުއްޓިފައިވާ ހުރިހާ މަޝްރޫޢުއެއް އަންނަ ފެބުރުއަރީ މަހުން ފެށިގެން ބާރު ދުވެލީގައި ހިނގައިގަންނަން ފަށާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ހއ. އުލިގަމު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސް ވިދާޅުވީ، ހުއްޓިފައިވާ މަޝްރޫޢުތައް އަލުން ފެށުމަށްޓަކައި އިދާރީ ގިނަ މަސައްކަތްތަކެއް މިހާރު ކުރިއަށްދާ ކަމަށާއި، މީގެ ތެރޭގައި ކުރީގެ އެއްބަސްވުންތައް ބާޠިލުކުރުންފަދަ ކަންކަން ހިމެނޭ ކަމަށެވެ. އެހެންކަމުން، ކުރިއަށް އޮތް ފެބުރުއަރީމަހު އެ މަޝްރޫޢުތައް ވަރަށް ބާރަށް ހިނގައިގަންނާނެކަމަށް އެމަނިކުފާނު ވިދާޅުވިއެވެ.

މީގެ އިތުރުން، ރައީސް ވަނީ އުލިގަމުގެ ތަރައްޤީއަށް ގިނަ ކަންތައްތަކެއް ކުރުމަށް މިއަހަރުގެ ބަޖެޓުގައި ހިމަނާފައިވާ ކަމަށް ވިދާޅުވެފައެވެ. މީގެ ތެރޭގައި އައު ސިއްޙީ މަރުކަޒެއް އެޅުމާއި، ބަނދަރުގެ ޖާގައިގެ ދަތިކަން ހައްލުކުރުމާއި، ކުނި މެނޭޖުކުރުމުގެ ސެންޓަރެއް ގާއިމުކުރުން ހިމެނެއެވެ. އަދި ކުޅިވަރުގެ ވަސީލަތްތައް ތަރައްޤީކުރުމާއި، ޔޮޓް މެރީނާއެއް ޤާއިމްކުރުންވެސް ހިމެނެއެވެ.

ރައީސް ވިދާޅުވީ، މިދައުރުގެ ދެއަހަރު ދުވަހުގެ ތެރޭގައި ހުރިހާ ރަށެއްގައި ފުރިހަމަ ކުޑަކުދިންގެ ޕާކެއް ތަރައްޤީކުރުމާއި، އިންޑޯ ޖިމާއެކު ފިޓްނަސް އެންޑް ރެކްރިއޭޝަން ސެންޓަރާއި މޫދަށް އެރޭ ސަރަހައްދު ތަރައްޤީކުރުން ކަނޑައަޅާފައިވާ ކަމަށެވެ. އެމަނިކުފާނުގެ ސިޔާސަތަކީ އާބަދީ ކުދި ރަށްރަށްވެސް ހަމަހަމަކަމާއެކު ތަރައްޤީކުރުން ކަމަށް ރައީސް ވިދާޅުވިއެވެ.