ޚަބަރު
އެމެރިކާގައި ހިނގި ނުރައްކާތެރި ވައިގެ ހާދިސާއާ ގުޅިގެން ރައީސް މުޢިއްޒު ތައުޒިޔާ ފޮނުއްވައިފި
އެމެރިކާގައި ބޯޓު ވެއްޓުނު ސަރަޙައްދު ފޮޓޯ:އިންޓަނެޓް
ރޭގަން ވޮޝިންގޓަން ނެޝަނަލް އެއަރޕޯޓު ކައިރީގައި އެމެރިކަން އެއަރލައިންސްގެ މަތިންދާބޯޓަކާއި އެމެރިކާގެ އަސްކަރީ ހެލިކޮޕްޓަރަކާ ޖެހި ހިނގި ނުރައްކާތެރި އެކްސިޑެންޓުގައި ގިނަ ބަޔަކު މަރުވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ފޮނުއްވައިފިއެވެ.
ރައީސުލްޖުމްހޫރިއްޔާ ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ އެމެރިކާގެ ވޮޝިންގޓަން ޑީސީގައި ހިނގި މި އެކްސިޑެންޓުގެ ޚަބަރު އެއްސެވީ ފުން ހިތާމައާއެކުގައި ކަމަށެވެ. އަދި މި ހާދިސާގައި މަރުވި މީހުންގެ އާއިލާތަކަށާއި ގާތް ފަރާތްތަކަށް ތައުޒިޔާ ވިދާޅުވާ ކަމަށްވެސް ރައީސުލްޖުމްހޫރިއްޔާ ކުރެއްވި ޕޯސްޓުގައި ވިދާޅުވިއެވެ.
މީގެ އިތުރުން، މި ހިތްދަތި ދަނޑިވަޅުގައި ދިވެހިން ތިބީ އެމެރިކާގެ ރައީސް ޑޮނަލްޑް ޓްރަމްޕާއި އެ ޤައުމުގެ ރައްޔިތުންނާއެކުގައި ކަމަށް ރައީސުލްޖުމްހޫރިއްޔާ ވިދާޅުވިއެވެ.
Shocked and saddened by the news of tragic air accident in Washington DC.
— Dr Mohamed Muizzu (@MMuizzu) January 31, 2025
My deepest condolences to the families and loved ones of the victims.
Our thoughts are with @POTUS Trump and the people of the United States.
އެމެރިކާގެ ރަސްމީ އިދާރާތަކުން ހާމަކޮށްފައިވާ ގޮތުގައި، މި ނުރައްކާތެރި ހާދިސާގައި އެއްވެސް މީހަކު ސަލާމަތްވެފައި ނުވެއެވެ. މި ހާދިސާ ހިނގާފައިވަނީ ރޭގަން ވޮޝިންގޓަން ނެޝަނަލް އެއަރޕޯޓަށް ޖައްސަން އައި އެމެރިކަން އެއަރލައިންސްގެ މަތިންދާބޯޓެއް އެމެރިކާގެ އަސްކަރިއްޔާގެ ބްލެކް ހޯކްސް ހެލިކޮޕްޓަރެއްގައި ވައިގެ ތެރޭގައި ޖެހިގެންނެވެ.
އެކްސިޑެންޓުގައި ހިމެނޭ އުޅަނދުތައް އެއާޕޯޓު ކައިރީގައި އޮންނަ ޕޮޓޯމެކް ކޯރަށް ވެއްޓިފައިވާއިރު، އެމެރިކަން އެއާލައިންސްއިން މަޢުލޫމާތު ދީފައިވާ ގޮތުގައި ހާދިސާ ހިނގި ވަގުތު މަތިންދާބޯޓުގައި 60 ފަސިންޖަރުންނާއި ހަތަރު ފަޅުވެރިން ދަތުރުކުރަމުންދިޔައެވެ. އެމެރިކާގެ އަސްކަރިއްޔާއިން ބުނެފައިވަނީ އެ ބޯޓުގައި ޖެހުނު ހެލިކޮޕްޓަރުގައި ސިފައިންގެ ތިން މީހުން ތިބި ކަމަށެވެ.
މިއީ 2001 ވަނަ އަހަރުގެ ފަހުން އެމެރިކާގައި ހިނގި އެންމެ ނުރައްކާތެރި ވައިގެ ހާދިސާ ކަމަށް ބެލެވެއެވެ. މަތިންދާބޯޓާއި ހެލިކޮޕްޓަރު ޖެހުނު ވަގުތު ވައިގެ ތެރޭގައި ބޮޑު ގޮވުމެއް އިވި، ރޯވެފައި އޮތް މަތިންދާބޯޓު ޕޮޓޯމެކް ކޯރަށް ވެއްޓެންދާ މަންޒަރު ދައްކުވައިދޭ ބައެއް ވީޑިއޯތައް ވަނީ އާންމުވެފައެވެ.
