ރަސްމާލެ ބިންހިއްކުމަށް މުރަކަތައް އެހެން ސަރަޙައްދަކަށް ބަދަލުކުރުމުގެ މަސައްކަތް އެޗްޑީސީ އިން ފަށައިފި

ރަސްމާލެ ބިންހިއްކުމަށް މުރަކަތައް އެހެން ސަރަޙައްދަކަށް ބަދަލުކުރުމުގެ މަސައްކަތް އެޗްޑީސީ އިން ފަށައިފިއެވެ. މިމަޝްރޫޢުގެ ދަށުން ބައެއް ސަރަހައްދުތައް ހިއްކުމުގެ މަސައްކަތް މިހާރު ދަނީ ކުރަމުންނެވެ. 

ރައީސުލްޖުމްހޫރިއްޔާގެ އުއްމީދީ މަޝްރޫޢުތަކުގެ ތެރޭގައި ހިމެނޭ ރާއްޖޭގައި އޮތް ބޯހިޔާވަހިކަމުގެ މައްސަލައަށް އިންޤިލާބީ ބަދަލެއް ގެނައުމަށް، ސަރުކާރުން ކުރިއަށްގެންދާ މިމަޝްރޫޢުގައި ހިއްކަމުންދަނީ އެކި ސަރަޙައްދުތައް، އެކި މަރުޙަލާތަކަށް ބަހާލައިގެންނެވެ. 12 ސަރަހައްދަކަށް ބަހާލައިގެން ހިއްކުމަށް ހަމަޖެހިފައިވާ މިމަޝްރޫޢުގައި މިހާތަނަށްވަނީ "އޭރިއާ ޖޭ"ގައި ހިމެނޭ 29 ހެކްޓަރު ހިއްކާ ނިންމާލާފައެވެ.

މިވަގުތު "އޭރިއާ ޑީ، އެފް، ޖީ އަދި އެލް"ގެ މަސައްކަތް ކުރަމުންދާއިރު މިސަރަޙައްދު ހިއްކުމުގެ މަސައްކަތުގެ 9 އިންސައްތަ މަސައްކަތް މިހާރު ވަނީ ނިމިފަ. އަދި "އޭރިއާ އޭ، ބީ، އެޗް، އައި އަދި ކޭ"ގައި ހިމެނޭ 5 ސަރަޙައްދު ހިއްކުމަށްޓަކައި އެތަނުގައި ހުރި މުރަކައިގެ ދިރުންތައް އެހެން ސަރަޙައްދަކަށް ބަދަލުކުރުމުގެ މަސައްކަތް ވެސް ކުރަމުން އެބަދޭ.  

ޕީއެސްއެމްނިއުސްއަށް މަޢުލޫމާތު ދެއްވަމުން އެޗްޑީސީން ވިދާޅުވެފައިވެއެވެ.

2023 ވަނަ އަހަރުގެ ޑިސެމްބަރު މަހުގެ 18 ވަނަ ދުވަހު ރަސްމާލޭގެ މި މަޝްރޫޢުގެ ޢަމަލީ މަސައްކަތް ފަށާފައިވާއިރު، ރަސްމާލެ މަޝްރޫޢު ހިއްކުމުގެ މަސައްކަތް ކުރަމުންދަނީ، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ)އާއި ނެދަލޭންޑްސްގެ ބޮސްކާލިސް ކުންފުންޏަކާއި ހަވާލުކޮށްގެންނެވެ. އިތުރު ކުންފުނިތަކާއި ގުޅިގެން މި މަސައްކަތް އަވަސްކުރުމަށް ސަރުކާރުންދަނީ މިހާރު މަސައްކަތް ކުރަމުންނެވެ. އެހެންކަމުން، އިތުރު ޑްރެޖަރުތަކާއެކު މިއަހަރުގެ ތެރޭގައި ބިން ހިއްކުމުގެ މަސައްކަތް ދެތިންގުނަ އަވަސްކުރުމަށް މަސައްކަތްކުރައްވަމުންދާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވެސްވަނީ ވިދާޅުވެފައެވެ.