Ads by Exprox

ޚަބަރު

ރާއްޖޭގައި އީ-ސިނގިރޭޓު މަނާކުރުމުން ދުނިޔޭގެ ސިއްޙަތު ޖަމްޢިއްޔާއިން ރައީސުލްޖުމްހޫރިއްޔާއަށް ތަޢުރީފުކުރައްވައިފި

ރާއްޖޭގައި އީ-ސިނގިރޭޓު މަނާކުރުމުން ދުނިޔޭގެ ސިއްޙަތު ޖަމްޢިއްޔާއިން ރައީސުލްޖުމްހޫރިއްޔާއަށް ތަޢުރީފުކުރައްވައިފި

ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމް ޑަބްލިޔުއެޗްއޯގެ ޑިރެކްޓަރ ޖެނެރަލް، ޑރ. ޓެޑްރޮސް އަދޮނަމް ގެބްރިޔޭސަސްއާ ބައްދަލުކުރެއްވުން، ފޮޓޯ: ސިއްޙީ ވުޒާރާ

މިފްތާޙް މުޙައްމަދު

މިފްތާޙް މުޙައްމަދު

06 ފެބްރުއަރީ 2025، 07:23

06 ފެބްރުއަރީ 2025، 07:23

ރާއްޖޭގައި އީ-ސިނގިރޭޓު މަނާކުރުމުން ދުނިޔޭގެ ސިއްޙަތު ޖަމްޢިއްޔާއިން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ތަޢުރީފުކުރައްވައިފިއެވެ.

ވޯލްޑް ހެލްތު އޯގަނަޒިޒޭޝަން (ޑަބްލިޔުއެޗްއޯ)ގެ ޑިރެކްޓަރ ޖެނެރަލް، ޑރ. ޓެޑްރޮސް އަދޮނަމް ގެބްރިޔޭސަސް ރައީސުލްޖުމްހޫރިއްޔާއަށް ތަޢުރީފުކުރައްވައި ވާހަކަފުޅުދެއްކެވީ، ސުވިޓްޒަލޭންޑްގެ ޖެނީވާގައި މިހާރު ކުރިއަށްދާ ދުނިޔޭގެ ސިއްޙަތު ޖަމްޢިއްޔާގެ 156 ވަނަ އެގްޒެކެޓިވް ބޯޑުގެ މެންބަރުންގެ ބައްދަލުވުމުގެ ހަވާސާގެ ތެރެއިން ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމްއާ ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ.

ދުންފަތުގެ ނުރައްކާތެރި ވަބާއިން މުޖުތަމަޢު ދުރުހެލިކުރުމަށްޓަކާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަޅުއްވަމުންގެންދަވާ ހަރުދަނާ ފިޔަވަޅުތަކަށް ތަޢުރީފުކުރައްވައި ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް ވިދާޅުވީ، ދުންފަތް ކޮންޓްރޯލްކުރުމަށް ކުރާ މަސައްކަތްތައް ހަރުދަނާކުރުމުގައި އެ ޖަމްޢިއްޔާގެ ފުރިހަމަ އެހީތެރިކަން ލިބިގެންދާނެކަމަށެވެ.

މީގެ އިތުރުން، މި ބައްދަލުކުރެއްވުމުގައި ސިއްޙަތާ ބެހޭ ވަޒީރު ނާޡިމް ވަނީ ރާއްޖޭގެ ޞިއްޙީ ނިޒާމު ހަރުދަނާކުރުމުގައި ސަރުކާރުން އަހަންމިއްޔަތުކަންދޭ ދާއިރާތަކުގެ މައްޗަށް އަލިއަޅުއްވާލައްވައި ވާހަކަފުޅުދައްކަވާފައެވެ. 

އަދި ޓެލެމެޑިސިންގެ ދާއިރާއިން އިންވެސްޓްމަންޓްތައް އިތުރުކުރުމަށާއި، ޑިޖިޓަލް ހެލްތުގެ ދާއިރާއާއި، އިމަޖެންސީ މެޑިކަލް ސަރވިސްގެ ކަންކަން އިތުރަށް ތަރައްޤީކުރުމުގައި ދުނިޔޭގެ ޞިއްޙަތު ޖަމްޢިއްޔާގެ އެހީތެރިކަން ރާއްޖެއަށް ލިބިގެންދާނެކަމުގެ ޔަޤީންކަން، މި ބައްދަލުކުރެއްވުމުގައި އެ ޖަމްޢިއްޔާގެ ފަރާތުން ވަނީ ދެއްވާފައެވެ.

ރާއްޖޭގައި ދުންފަތް އުފެއްދުމަކީ މިހާރު ޤާނޫނީ ކުށެކެވެ. އަދި މި ޤާނޫނުގެ ދަށުން ދުންފަތް އުފެއްދުމުގެ އެއްވެސް ބާވަތެއް ރާއްޖެއަށް އެތެރެކުރިޔަ ނުދިނުމަށް ހެލްތު މިނިސްޓްރީން ކަސްޓަމްސްއަށް ވެސް ވަނީ އަންގާފައެވެ.

މި ލިޔުން ކިޔާލުމުން

Ads by MSS