ޚަބަރު
ރާއްޖޭގައި 35 މިސްކިތް އިމާރާތްކުރުމުގެ މަޝްރޫޢު މިއަހަރު ކުރިއަށްދާނެ: ރައީސް މުޢިއްޒު

ހއ. ދިއްދޫ އިސްލާމިކް ސެންޓަރުގެ މަސައްކަތުގެ އަދާހަމަ ފޮޓޯ:ވުޒާރާ
ރާއްޖޭގެ އެކި ކަންކޮޅުތަކުގައި މިސްކިތް ބިނާކުރުމުގެ 35 މަޝްރޫޢު މިއަހަރު ކުރިއަށްގެންދެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިއަދު މަޖިލިސް އިފްތިތާޙުކުރައްވައި، ރިޔާސީ ބަޔާން އިއްވަވަމުންނެވެ.
ރައީސް ވިދާޅުވިގޮތުގައި މިސްކިތްތައް ބިނާކުރުމަށް ދައުލަތުގެ ބަޖެޓުން 2024 ވަނަ އަހަރު 7,868,953 ރުފިޔާ ޚަރަދުކުރެވޭނެއެވެ. މީގެ އިތުރުން، މިސްކިތްތައް ބެލެހެއްޓުމާއި މަރާމާތުކުރުމަށްވެސް މި ފައިސާ ބޭނުންކުރެވޭނެ ކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ މިސްކިތްތަކާބެހޭ ޤައުމީ މަޖިލިސް އަލުން އުފައްދައި، މަޖިލީހުގެ ބައްދަލުވުންތައް ބާއްވައި، އަދި މިސްކިތްތަކުގެ ޙާލަތު ދުވަހުން ދުވަހަށް ބަލަހައްޓަމުންދާ ކަމަށެވެ.
"އަޅުގަނޑުގެ މަންހަޖަކީ، ކުރީއަހަރުގެ ވެސް މަންހަޖު. އެއީ ދިވެހި އުންމަތުގެ ހާލާއި، މުސްތަޤުބަލު ކަނޑައެޅުމުގައި އެންމެ މުހިންމު އަސާސްތަކަކީ، މާތްވެގެންވާ އިސްލާމްދީނާއި، ދިވެހީންގެ އަމިއްލަވަންތަކަމާއި، ދިވެހީންގެ މިނިވަންކަމާއި ސިޔާދަތު ރައްކާތެރިކުރުންކަން ކަށަވަރުކުރުން." ރައީސް ވިދާޅުވިއެވެ.
އިސްލާމީ ރިވެތި ސިފަތަކުން ޒީނަތްތެރިވެފައިވާ މުޖުތަމަޢެއް ބިނާކުރުމަށާއި އިސްލާމީ ޝަރީޢަތް ނަގަހައްޓާ، އިސްލާމީ އުސޫލުތައް ހިފަހައްޓާ ގައުމެއްގެ ގޮތުގައި ދެމިތިބުމަށް، ނުގުޑާ ޢަޒުމަކާއެކު ކެނޑިނޭޅި މަސައްކަތްކުރުމަށް ޚާއްސަ އިސްކަމެއްދެއްވާކަމަށް ރައީސް ވިދާޅުވިއެވެ.
މިގޮތުން، މުޅި ރާއްޖެއަށް އަމާޒުކޮށްގެން "ރިސާލަތު" ޕްރޮގްރާމްގެ ނަމުގައި ޚާއްޞަ ޕްރޮގްރާމެއް ފަރުމާކޮށް، މިދިޔަ އަހަރު ރާއްޖޭގެ އެކިކަންކޮޅުތަކުގައި އެ ޕްރޮގްރާމު ހިންގިފައިވާ ކަމަށާއި، މިއަހަރު ވެސް، މި ޕްރޮގްރާމް މެދުކެނޑުމެއް ނެތި ކުރިޔަށް ދާނެކަމަށް ރައީސް ވިދާޅުވިއެވެ.
މީގެ އިތުރުން، "ނަމާދު މަތިވެރިކުރުން" މި ނަމުގައި މުހިންމު މަޝްރޫޢެއް ފަށާފައިވާކަން ރައީސް ފާހަގަކުރެއްވިއެވެ. މި މަޝްރޫޢުގެ މަޤްޞަދަކީ ދިވެހި މުޖުތަމަޢު ފަރުޟު ފަސް ނަމާދަށް އަހުލުވެރިކުރުވުމެވެ.