ރާއްޖެއަށް މިއަހަރު 2.3 މިލިއަން ފަތުރުވެރިން ގެނައުމަކީ ސަރުކާރުގެ އަމާޒު : ރައީސް މުޢިއްޒު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިއްވެވި ރިޔާސީ ބަޔާނުގައި، މިއަހަރުގެ ނިޔަލަށް 2.3 މިލިއަން ފަތުރުވެރިން ރާއްޖެއަށް ގެނައުމަކީ ސަރުކާރުގެ އަމާޒު ކަމުގައި ވިދާޅުވެއްޖެއެވެ.

ނިމިދިޔަ 2024 ވަނަ އަހަރަކީ ރާއްޖޭގެ ފަތުރުވެރިކަމުގެ ތާރީޚުގައި ފުރަތަމަ ފަހަރަށް 2 މިލިއަން ފަތުރުވެރިން ޒިޔާރަތްކުރި އަހަރެވެ. މިއީ 2023 ވަނަ އަހަރާ އަޅާބަލާއިރު 9 އިންސައްތައިގެ ކުރިއެރުމެކެވެ.

ރައީސް މުޢިއްޒު ވިދާޅުވީ މި އަމާޒު ހާސިލުކުރުމަށް ގިނަ މަސައްކަތްތަކެއް މިހާރު ފަށާފައިވާ ކަމަށެވެ. މީގެ ތެރޭގައި، މިހާތަނަށް ފަތުރުވެރިކަން ފުޅާކުރެވިފައި ނެތް ހދ އަތޮޅާއި ތ އަތޮޅު ފަދަ އަތޮޅުތަކުގައި އިންވެސްޓްކުރުމަށް ލުއިތަކާއި އިންސެންޓިވްތައް ދީގެން ރިސޯޓުތައް ހެދުމުގެ މަސައްކަތް ފެށުން ހިމެނެއެވެ.

2025 ވަނަ އަހަރުގެ ދައުލަތުގެ ބަޖެޓުގައި 2.2 މިލިއަން ފަތުރުވެރިން ރާއްޖެއަށް އަންނާނެ ކަމަށް ލަފާކޮށްފައިވާއިރު، ފަތުރުވެރިކަމުގެ ބެޑް ނައިޓްސް 14.2 މިލިއަންގައި ހުންނާނެ ކަމަށް ބެލެވެއެވެ.

ފަތުރުވެރިކަމުގެ ސިނާޢަތް އިތުރަށް ފުޅާކުރުމަށްޓަކައި، ޤައުމީ އެއަރލައިން މޯލްޑިވިއަންގެ އުދުހުންތަކަށް ވައިޑް-ބޮޑީ މަތިންދާ ބޯޓެއް ބޭނުންކުރަން ފަށާފައިވާ ކަމަށް ރައީސް ފާހަގަކުރެއްވިއެވެ. މިހާރު ޗައިނާގެ 3 ސިޓީއަކަށް ވައިޑް-ބޮޑީގެ ދަތުރުތައް ފަށާފައިވާއިރު، އިތުރު ސިޓީތަކަށާއި އެހެނިހެން ސަރަޙައްދުތަކަށް ޤައުމީ އެއަރލައިންގެ އިންޓަރނޭޝަނަލް އޮޕަރޭޝަން ފުޅާކުރުމުގެ މަސައްކަތް ކުރިއަށްދާ ކަމަށް ވިދާޅުވިއެވެ.

އަދި މި އަހަރުގެ އޮކްޓޯބަރު މަހުގައި އިތުރު ވައިޑް-ބޮޑީ އެއަރކްރާފްޓެއް ގެނައުމަށް ހަމަޖެހިފައިވާ ކަމަށާއި، ޔޫރަޕުގެ ބައެއް މަންޒިލްތަކަށްވެސް ޤައުމީ އެއަރލައިންގައި ސީދާ ރާއްޖެއިން ދަތުރުތައް ކުރާނެ ކަމަށް ރައީސް މުޢިއްޒު ވިދާޅުވިއެވެ.

މި އަހަރުގެ ފަތުރުވެރިންގެ އަދަދު 2.3 މިލިއަނަށް އިތުރުކުރުމަކީ ނިމިދިޔަ އަހަރާ އަޅާބަލާއިރު 3 ލައްކަ ފަތުރުވެރިންގެ އިތުރުވުމެކެވެ. މި އަމާޒު ހާސިލުކުރެވިއްޖެނަމަ، އެއީ ރާއްޖޭގެ ފަތުރުވެރިކަމުގެ ތާރީޚުގައި އައު ރެކޯޑެއް ކަމުގައި ވެގެންދާނެއެވެ.