ރައްޔިތުންނަށް އުފާވެރި ޚަބަރެއް: ވެލާނާއިން ފުރާ ދިވެހިންނަށް ދޫކުރާ ޑޮލަރު އަންނައަހަރު ދެގުނަ ކުރައްވަނީ

މިއަންނަ އަހަރުގެ ފުރަތަމަ ކުއާޓަރުން ފެށިގެން ދިވެހިންނަށް ވެލާނާ އިންޓަރނޭޝަނަލް އެއަރޕޯޓުން ފުރާ ކޮންމެ މީހަކަށް ދޫކުރާ ޑޮލަރުގެ އަދަދު ދެގުނަ ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.  އެމަނިކުފާނު މިކަން އިޢުލާން ކުރެއްވީ މިއަހަރުގެ ރައްޔިތުންގެ މަޖިލީހުގެ ދައުރު ފެށޭ ޖަލްސާގައި ރިޔާސީ ބަޔާން އިއްވަވަމުންނެވެ.

ރައީސުލްޖުމްހޫރިއްޔާ ވިދާޅުވި ގޮތުގައި، 2026 ވަނަ އަހަރުގެ ފުރަތަމަ ކުއާޓަރުގައި މިހާރު ދޫކުރާ 500 ޑޮލަރު 1000 ޑޮލަރަށް އިތުރުކުރެވޭނެއެވެ. އަދި ހަމަ އެ އަހަރުގެ ދެވަނަ ކުއާޓަރުގައި ކްރެޑިޓް ކާޑު ލިމިޓްތައް 1400 ޑޮލަރަށް ބޮޑުކޮށްދެވޭނެ ކަމަށްވެސް އެމަނިކުފާނު ވިދާޅުވިއެވެ.

މި ބަދަލުތައް ގެނެވެނީ މިއަހަރު ފެށުނު އިރު ޢަމަލުކުރަން ފެށި ބޭރުފައިސާގެ އައު ޤާނޫނުގެ ސަބަބުންނެވެ. ރައީސުލްޖުމްހޫރިއްޔާ ވިދާޅުވި ގޮތުގައި، މި ޤާނޫނު ތަންފީޒުވާން ފެށުމުން ރަސްމީ ރިޒާވަށް އޭގެ އަސަރު އަވަސް މުސްތަޤުބަލެއްގައި ކުރާނެއެވެ. 2023 ވަނަ އަހަރު 590.5 މިލިއަން ޑޮލަރުގައި ހުރި ރަސްމީ ރިޒާވް، 2024 ވަނަ އަހަރުގެ ނިޔަލަށް 673 މިލިއަން ޑޮލަރަށް އިތުރުވެފައިވާ ކަމަށް އެމަނިކުފާނު ވިދާޅުވިއެވެ. އަދި މިއަހަރުގެ އަމާޒަކީ މި އަދަދު 705.1 މިލިއަން ޑޮލަރަށް އިތުރުކުރުން ކަމަށްވެސް ވިދާޅުވިއެވެ.

މީގެ އިތުރުން، ބޭރުފައިސާގެ ކަޅުބާޒާރުގެ މައްސަލަ ހައްލުކުރުމަށް ސަރުކާރުން މަސައްކަތް ފަށާފައިވާ ކަމަށް ރައީސުލްޖުމްހޫރިއްޔާ ވިދާޅުވިއެވެ. މިގޮތުން، 2025 ވަނަ އަހަރުގެ ސެޕްޓެންބަރު މަހުން ފެށިގެން ސަރުކާރު ހިއްސާވާ ކުންފުނިތަކަށް ރަސްމީ ރޭޓުގައި ޑޮލަރު ލިބޭނެ އިންތިޒާމެއް ޤާއިމުކުރެވޭނެ ކަމަށާއި، 2026 ވަނަ އަހަރުގެ ޖަނަވަރީ މަހުން ފެށިގެން ދިވެހި ވިޔަފާރިވެރިންނަށް މުދާ އިަށް މުދާ އިމްޕޯޓްކުރުމަށް ބޭންކުތަކުން ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރުކުރެވޭނެ ކަމަށްވެސް އެމަނިކުފާނު ވިދާޅުވިއެވެ.

މި ބަދަލުތަކުގެ ސަބަބުން ރައްޔިތުންނަށް ގިނަ ފައިދާތަކެއް ލިބި، ފުދުންތެރިކަން އިތުރުވެގެންދާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.