ޚަބަރު
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް އޮކްޓޫބަރުގެ ކުރިން ހުޅުވާނެ: ރައީސް މުޢިއްޒު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް މިއަހަރު އޮކްޓޫބަރު މަހުގެ ކުރިން ހުޅުވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިއަދު ރައްޔިތުންގެ މަޖިލީހުގައި އިއްވެވި ރިޔާސީ ބަޔާނުގައެވެ.
ރައީސް މުޢިއްޒު ވިދާޅުވީ، އާންމު ރައްޔިތުންނަށް ޒަމާނުއްސުރެ އޮތް ދަތުރުފަތުރުގެ ދަތިކަމަށް ޙައްލު ހޯދައިދިނުމަށާއި، ފަތުރުވެރިކަމުގެ ސިނާޢަތް ކުރިއެރުވުމަށް ރާއްޖޭގެ ވައިގެ ދަތުރުފަތުރުގެ ނިޒާމު ފުޅާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމުގެ އިތުރުން، ހަނިމާދޫ އެއަރޕޯޓާއި ސ. ގަން އެއަރޕޯޓް މިއަހަރު ހުޅުވައި، މ. މުލީގައި ތަރައްޤީކުރަމުން އަންނަ އެއަރޕޯޓް އޭޕްރީލް މަހު ހުޅުވުމުގެ މަސައްކަތް ކުރަމުންދާ ކަމަށް ރައީސް ވިދާޅުވިއެވެ.
މީގެ އިތުރުން، ފ. ނިލަންދޫ، ތ. ގުރައިދޫ، ތ. ވިލުފުށި، އއ. މަތިވެރި، ގދ. ކާޑެއްދޫ، ގއ. ވިލިނގިލި، ށ. މިލަންދޫ، ށ. ކޮމަންޑޫ، ށ. ބިލެތްފަހި، ރ. ފައިނު، ހއ. ދިއްދޫ، ރ. އަލިފުށި، ބ. ތުޅާދޫ އަދި ލ. ކައްދޫ އެއަރޕޯޓުގެ މަސައްކަތް މިއަހަރު އެކި މަރުޙަލާގައި ކުރިއަށްދާނެކަމަށް ރައީސް މުޢިއްޒު ވިދާޅުވިއެވެ.
ސަރުކާރުން އިތުރަށް ތަރައްޤީކުރުމަށް ނިންމާފައިވާ ހދ. ކުޅުދުއްފުށި އަދި ށ. ފުނަދޫ އެއަރޕޯޓުގެ ޚިދުމަތްތައް ތަރައްޤީކުރުމުގެ މަސައްކަތްވެސް މިއަހަރު ފެށިގެންދާނެކަމަށް ރައީސް ވިދާޅުވިއެވެ.
އެއަރޕޯޓްތައް ތަރައްޤީކުރުމުގެ އިތުރުން، ކަނޑުމަގުން ދަތުރުފަތުރުގެ ނިޒާމު ފުޅާކޮށް ރައްޔިތުންނަށް ލުއިފަސޭހަވާނެ ގޮތް ފަހިކޮށްދިނުމަކީވެސް ސަރުކާރުގެ ސިޔާސަތެއްކަމަށް ރައީސް މުޢިއްޒު ވިދާޅުވިއެވެ. އެގޮތުން މިއަހަރު ނިމުމުގެ ކުރިން ރާއްޖޭގެ ހުރިހާ އަތޮޅެއްގައި އާރުޓީއެލްގެ ޚިދުމަތް ދޭން ފަށައި، މިއަހަރުގެ ޖޫން މަހު ރ. އަތޮޅުގައި އަދި ޖުލައި މަހު ބ. އަތޮޅުގައި އެ ޚިދުމަތް ފައްޓަވާނެކަމަށްވެސް ރައީސް މުޢިއްޒު ވިދާޅުވިއެވެ.