ކުދި އަދި މެދު ފަންތީގެ ވިޔަފާރިތަކަކީ އިގްތިޞާދުގެ ހަކަތަ : ރައީސް މުޢިއްޒު

ކުދި އަދި މެދު ފަންތީގެ ވިޔަފާރިތަކަކީ ދިވެހިރާއްޖޭގެ އިޤްތިޞާދުގެ ހަކަތަ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރައްޔިތުންގެ މަޖިލީހުގައި މިއަހަރުގެ ރިޔާސީ ބަޔާން އިއްވަވަމުން ވިދާޅުވެއްޖެއެވެ. މި ވިޔަފާރިތަކަށް އެހީތެރިކަން ފޯރުކޮށްދިނުމުގެ ގޮތުން ސަރުކާރުން ވަނީ ގިނަ މަސައްކަތްތަކެއް ކޮށްފައިކަން ރައީސް ފާހަގަކުރެއްވިއެވެ.

ރައީސް ވިދާޅުވިގޮތުގައި، 374 ވިޔަފާރިއަކަށް ޖުމްލަ 198 މިލިއަން ރުފިޔާގެ ލޯނު ދޫކުރެވިފައިވެއެވެ. އަދި ކޮވިޑް-19 އާ ގުޅިގެން ދޫކުރެވުނު ލޯނުތަކުގެ އިންޓަރެސްޓް މަޢާފުކޮށް، ލޯނު އަނބުރާ ދެއްކުމުގެ މުއްދަތު 8 އަހަރުން 10 އަހަރަށް އިތުރުކުރެވިފައިވާކަން ވެސް ރައީސް ހާމަކުރެއްވިއެވެ.

މީގެ އިތުރުން، 2133 ފަރާތަކަށް 55 މިލިއަން ރުފިޔާގެ އިންޓްރެސްޓް މަޢާފުކުރެވި، 1811 ފަރާތަކަށް ލޯނު އަނބުރާ ދައްކަންޖެހޭ މުއްދަތު އިތުރުކޮށްދެވިފައިވާކަމަށް ރައީސް ވިދާޅުވިއެވެ. އަދި 17 ނޮވެމްބަރ 2024 ގެ ކުރިން ލޯނު އެއްކޮށް ދައްކާފައިވާ 316 ފަރާތަކަށް، ކުރިން ދައްކާފައިވާ އިންޓްރެސްޓަށްވާ 3.36 މިލިއަން ރުފިޔާ އަނބުރާ ރައްދުކުރެވިފައިވާކަންވެސް ރައީސް ފާހަގަކުރެއްވިއެވެ.

ފަތުރުވެރިކަމުގެ ދާއިރާއަށް އަމާޒުކޮށް، ޗައިނާ އަދި އިންޑިއާގެ ފަތުރުވެރިންނަށް ދިވެހިރާއްޖޭގައި ދެވޭ ޚިދުމަތްތަކަށް ފައިސާ ބަލައިގަތުން ފަސޭހަކޮށްދިނުމަށް މަސައްކަތްތަކެއް ކުރެވިފައިވާކަމަށް ރައީސް ވިދާޅުވިއެވެ. މިގޮތުން، ވީ-ޗެޓް ޕޭ އަދި ރުޕޭ ކާޑު ތަޢާރަފުކުރެވި، އިންޑިއާގެ ނޭޝަނަލް ޕޭމަންޓް ކޯޕަރޭޝަން އާއެކު ޔުނިފައިޑް ޕޭމަންޓް އިންޓަރފޭސް ދިވެހިރާއްޖޭގައި ޤާއިމުކުރުމުގެ މަސައްކަތް ކުރެވެމުންދާކަން ރައީސް ހާމަކުރެއްވިއެވެ.

ރައީސް އިތުރަށް ވިދާޅުވީ، ދިވެހިރާއްޖޭގެ ކްރިއޭޓިވް އިކޮނޮމިކް ސްޓްރެޓެޖިކް އެކްޝަން ޕްލޭން އެކުލަވާލެވި، މިހާރު ވަނީ ލޯންޗުކުރެވިފައި ކަމަށެވެ. މި ހުރިހާ ފިޔަވަޅުތަކަކީ ދިވެހިރާއްޖޭގެ އިޤްތިޞާދު ވަރުގަދަކޮށް، ކުދި އަދި މެދު ފަންތީގެ ވިޔަފާރިތަކަށް އިތުރު ފުރުޞަތުތައް ހޯދައިދިނުމަށް އެޅިފައިވާ މުހިންމު ފިޔަވަޅުތަކެއް ކަމުގައި ރައީސް ފާހަގަކުރެއްވިއެވެ.