ޚަބަރު
ރިޔާސީ ބަޔާން: ޑްރަގާއި ގޭންގުތަކާ ދެކޮޅަށް ފުލުހުން ފަށާފައިވާ އޮޕަރޭޝަނަށް ބޭނުންވާ ވަސީލަތްތައް މި އަހަރު އިތުރުކުރެވޭނެ

ފުލުހުންގެ ކާރެއް--
ޑްރަގާއި ގޭންގުތަކާ ދެކޮޅަށް ފުލުހުން ފަށާފައިވާ އޮޕަރޭޝަނަށް ބޭނުންވާ ވަސީލަތްތައް މި އަހަރު އިތުރުކުރެވޭނެކަމަށް، މި އަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
އެ ގޮތުން އެ މަނިކުފާނު ވިދާޅުވި އެއް ކަމަކީ އެކަމަށް ބޭނުންވާ މުވައްޒަފުންނާއި އެހެނިހެން ވަސީލަތް އިތުރުކުރުމެވެ.
ޑްރަގާއި ގޭންގުތަކުގެ މައްސަލައަށް ދާއިމީ ޙައްލެއް ގެނައުމަށް މި ސަރުކާރުން ފަށާފައިވާ ބޮޑު މަސައްކަތަށް ބޭނުންވާ ކެޕޭސިޓީ ދިވެހި ފުލުހުންގެ ޚިދުމަތުގައި، އިންސާނީ ވަސީލަތުގެ ގޮތުންނާއި، އެހެނިހެން ވަސީލަތްތަކުގެ ގޮތުން މި އަހަރު އިތުރުކުރެވިގެންދާނެ.
ރައީސުލްޖުމްހޫރިއްޔާ ވިދާޅުވިއެވެ.
އަދި މިފަދަ ކުށްތައް ހުއްޓުވުމަށް ސަރުކާރުގެ ފަރާތުން މަޖިލީހަށް ހުށަހަޅާފައިވާ ދެ ބިލުގެ މަސައްކަތް މި ދައުރުގެ ކުރީކޮޅު ނިމި، އަވަހަށް ތަންފީޒުކުރަން އެދޭކަމަށް އެ މަނިކުފާނު ވިދާޅުވިއެވެ.
ރައީސުލްޖުމްހުރިއްޔާ ވިދާޅުވީ، ދިވެހިރާއްޖޭގައި މަސްތުވާތަކެތީގެ ވިޔަފާރިކުރުމާއި މަސްތުވާތަކެތި ވިއްކައި ޓްރެފިކްކޮށް އެ ގެންގުޅުމާއި ބޭނުން ކުރުން ހުއްޓުވުމަށް ބޭނުންވާ މުހިންމު އިސްލާޙުތަކެއް ޤާނޫނަށް ގެނެވޭނެކަމަށެވެ. އަދި މިއާއެކު، މިފަދަ ކުށްތައް ހުއްޓުވުމަށް ޤާނޫނު ތަންފީޒުކުރާ ފަރާތްތަކަށް އިތުރު ބާރުތައް ވެސް ލިބިގެންދާނެކަމަށެވެ.
ދިވެހިރާއްޖޭގައި މަސްތުވާތަކެތިން ވިޔަފާރިކުރުމާއި މަސްތުވާތަކެތި ޓްރެފިކްކުރުމުގެ ވިޔަފާރި އާއި މަސްތުވާތަކެތި ގެންގުޅުމާއި ބޭނުންކުރުން ހުއްޓުވުމަށް، އަދި މަސްތުވާތަކެއްޗާގުޅޭ ކުށްތައް ހިންގުން ހުއްޓުވުމަށާއި ޤާނޫނު ތަންފީޛުކުރާ ފަރާތްތަކަށް އިތުރު ބާރުތައް ދިނުމަށް، އަދި މަސްތުވާތަކެއްޗަށް ދެވިހިފާފައިވާ މީހުންނަށް ފަރުވާދިނުމުގެ ނިޒާމު އިތުރަށް ހަރުދަނާކުރުމަށްޓަކައި މިހާރު ޢަމަލުކުރަމުންދާ މަސްތުވާތަކެއްޗާބެހޭ ޤާނޫނަށް މުހިންމު އިޞްލާޙުތަކެއް ގެނައުމަށްޓަކައި، ސަރުކާރުން ވާނީ ރައްޔިތުންގެ މަޖިލީހުގެ ނިމިދިޔަ އަހަރުގެ ތިންވަނަ ދައުރުގެ ތެރޭގައި ބިލެއް ހުށަހަޅާފަ.
ރައީސުލްޖުމްހޫރިއްޔާ ވިދާޅުވިއެވެ.
މީގެއިތުރުން ރައީސް ވިދާޅުވީ ޑްރަގުގެ ވިޔަފާރީގެ ތެރެއިން ބާރު ލިބިދޭ ގޭންގު ކުށްތަކާއި މާރާމާރީތަކުގެ މައްސަލައިގައި ވެސް ”ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ބިލު“ ގެ މަސައްކަތް ނިމި މަޖިލީހަށް ހުށަހަޅާފައިވާނެކަމަށެވެ. މި އިސްލާހާއެކު، ގޭންގުތަކާއި އެ ނޫންވެސް އިންތިޒާމުވެގެން ހިންގާ ކުށްކުރާ ގުރޫޕުތަކުން ހިންގާ ޤާނޫނާ ޚިލާފު އަމަލުތައް ކުށުގެ ގޮތުގައި ކަނޑައެޅުމަށް ފަސޭހަވެގެން ދާނެކަަމަށް ވިދާޅުވިއެވެ.
އަދި ކުޑަކުދިންނާއި ޒުވާނުން އެފަދަ ނުރައްކާތެރި ކުށްތައް ކުރާ ވެށި ދުރުކުރެވި ރައްކާތެރިކަންދީ ހެޔޮގޮތުގައި މުޖްތަމައުއަށް ރުޖޫއަވުމަށް މަގުފަހިވެގެންދާނެކަމަށް ވިދާޅުވިއެވެ. އެކަމަށްޓަކައި ހާއްސަ ފިޔަވަޅުތައް އެޅުމަށް މަގުފަހިކުރުމަށާއި، ކުށްތަކުން ރައްޔިތުންނާއި މުޖުތަމައު ރައްކާތެރިކުރުމަށްޓަކައި، އެފަދަ ކުށްތައްކުރާ މީހުން އުޅޭނޫޅޭގޮތް ބަލައި މޮނީޓަރ ކުރެވޭނެކަމަށް ވިދާޅުވިއެވެ.