ސިނގިރޭޓުގެ އަގު ބޮޑުކުރުމުން ލިބޭ އާމްދަނީ ދުންފަތުގެ ނުރައްކާތެރިކަމާ ދެކޮޅަށް ޚަރަދުކުރަން ރައީސް ނިންމަވައިފި

ސިނގިރޭޓުގެ އަގަށް ގެނެވުނު ބަދަލާ ގުޅިގެން އިތުރަށް ލިބޭ އާމްދަނީ ޚަރަދުކުރާނީ ދުންފަތުގެ އިސްތިޢުމާލުކުރުމުން ޖެހޭ ބަލިތަކުން ދުރުވުމަށް އަޅަންޖެހޭ ފިޔަވަޅުތައް އެޅުމަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

މިއަހަރުގެ ރައްޔިތުންގެ މަޖިލިސް ހުޅުވައިދެއްވުމުގެ ރަސްމިއްޔާތުގައި އިއްވެވި ރިޔާސީ ބަޔާނުގައި ރައީސް މުޢިއްޒު މިވާހަކަ ވިދާޅުވިއެވެ. ދުންފަތުގެ ވަބާއިން ޤައުމު ސަލާމަތްކުރެއްވުމަށް އެމަނިކުފާނު ފައްޓަވާފައިވާ މަސައްކަތްޕުޅުތަކަށް އަލިއަޅުއްވާލައްވަމުން، ދުންފަތާ ދެކޮޅަށް އަޅުއްވާފައިވާ ފިޔަވަޅުތަކުގެ ތެރެއިން ސިނގިރޭޓުގެ އަގަށް ގެނެވުނު ބަދަލާ ގުޅިގެން އިތުރަށް ލިބޭ އާމްދަނީ ބޭނުންކުރާނެ ގޮތް ހާމަކުރެއްވިއެވެ.

ރައީސް މުޢިއްޒު ވިދާޅުވީ މި އާމްދަނީ ބޭނުންކުރާނީ ދުންފަތުގެ އިސްތިޢުމާލުކުރުމުން ޖެހޭ ބަލިތަކުން ދުރުވުމަށް އަޅަންޖެހޭ ފިޔަވަޅުތައް އެޅުމަށާއި، ދުންފަތާ ދުރުހެލިކުރުމަށް ކުރިއަށްގެންދަންޖެހޭ ހޭލުންތެރިކަމުގެ އެކި ޕްރޮގްރާމްތައް ހިންގުމަށް ކަމަށެވެ. އަދި ދުންފަތާ ދެކޮޅަށް ފައްޓަވާފައިވާ ޤައުމީ މަސައްކަތުގައި ރައްޔިތުން އެކަތިގަނޑަކަށްވެގެން މަސައްކަތްކޮށްދެއްވުމަށް އެދިވަޑައިގަތެވެ.

ދުންފަތުގެ އިސްތިޢުމާލުކުރުމުގެ އާދަ އަށަގެންފައިވާ އެންމެހާ ރައްޔިތުން ދުންފަތުގެ އިސްތިޢުމާލުކުރުމުން ދުރުވުމަށް ގަދައަޅާ މަސައްކަތް ކުރެއްވުމަށް އަޅުގަނޑު އެދެން

 ރައީސް މުޢިއްޒު 

މީގެއިތުރުން، ދުންފަތާ ދުރުހެލިވުމަށް އެދޭ ފަރާތްތަކަށް އެހީތެރިވުމަށްޓަކައި ރާއްޖޭގެ ކޮންމެ ރަށެއްގައި މަދުވެގެން އެއް ޓޮބޭކޯ ސިޒޭޝަން ކްލިނިކް ޤާއިމުކުރުމަށް ނިންމަވާފައިވާ ކަމަށާއި، ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ބޭސް، އެސްޓިއޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލްތައް ޤާއިމުކޮށްފައިވާ ރަށްރަށުން ލިބޭނެ އިންތިޒާމު ހަމަޖައްސަވާފައިވާކަމަށްވެސް ރައީސް މުޢިއްޒު ވިދާޅުވިއެވެ.