Ads by Exprox

ޚަބަރު

ދަނޑުވެރިކަމުގެ ޚާއްޞަ އިޤްތިޞާދީ ސަރަހައްދުގެ މަސައްކަތް މިއަހަރު ފެށޭނެ: ރައީސް މުޢިއްޒު

ދަނޑުވެރިކަމުގެ ޚާއްޞަ އިޤްތިޞާދީ ސަރަހައްދުގެ މަސައްކަތް މިއަހަރު ފެށޭނެ: ރައީސް މުޢިއްޒު

ރާއްޖޭގައި ދަނޑުހައްދާ ރަށެއް ފޮޓޯ:އެގްރޯނެޓް

އާމިނަތު ޔުމްނާ

އާމިނަތު ޔުމްނާ

06 ފެބްރުއަރީ 2025، 12:17

06 ފެބްރުއަރީ 2025، 12:17

ދަނޑުވެރިކަމުގެ ޚާއްޞަ އިޤްތިޞާދީ ސަރަހައްދުގެ މަސައްކަތް މިއަހަރު ފެށިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިއީ ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް ސަރުކާރުން ކުރިއަށް ގެންދާ މުހިންމު މަޝްރޫޢެކެވެ.

ރިޔާސީ ބަޔާން އިއްވަވަމުން ރައީސް މުޢިއްޒު ވިދާޅުވީ، މަސްވެރިކަމާ އެއްގޮތަށް ދަނޑުވެރިކަން ޒަމާނީ ކުރުމަކީ އެމަނިކުފާނުގެ ސަރުކާރުގެ އަމާޒެއް ކަމަށެވެ. އަދި މި މަސައްކަތުގެ ތެރެއިން ދިވެހިއިން ދިވެހި އިޤްތިޞާދުގެ މުހިންމު ބައިވެރިއަކަށް ދަނޑުވެރިކަން ހެއްދެވުމަކީ އެމަނިކުފާނުގެ އަމާޒެއް ކަމުގައިވެސް ވިދާޅުވިއެވެ.

ދިވެހި އިޤުތިޞާދުގެ މުހިންމު ބައިވެރިއަކަށް ދިވެހި ދަނޑުވެރިކަން ބަދަލުކުރަން އަޅުގަނޑު ބޭނުން. އެ ގޮތުން ދަނޑުވެރިކަމުގެ ދާއިރާއިން ޚާއްޞަ ތަރައްޤީގެ މަސައްކަތްތަކެއް މިއަހަރު ކުރުމަށް ވަނީ ރޭވިފައި. އޭގެ ތެރޭގައި ދަނޑުވެރިކަމުގެ ޚާއްޞަ އިޤްތިޞާދީ ޒޯނެއް ޤާއިމުކުރެވޭނެ

 ރައީސް މުޢިއްޒު

މި މަޝްރޫޢުގެ ދަށުން، ރާއްޖޭގައި އުފެއްދޭ މައިގަނޑު ބާވަތްތައް ފުޑް ސެކިއުރިޓީ ޤާއިމުކުރެވޭ މިންވަރަށް އުފެއްދުމުގެ ޚާއްޞަ މަސައްކަތެއް މިއަހަރު ފެށިގެންދާނެ ކަމަށާއި، މި މަޝްރޫޢު 2028 ގައި ނިމި އޭގެ ފައިދާ ރާއްޖޭގެ އިޤްތިޞާދަށް ލިބޭނެ ކަމަށް ރައީސް މުޢިއްޒު ވިދާޅުވިއެވެ.

ދަނޑުވެރިކަމުގެ ޚާއްޞަ އިޤްތިޞާދީ ސަރަހައްދު ޤާއިމްކުރުމަށް ފުރަތަމަ ނިންމާފައިވަނީ އުތުރު ތިލަފަޅުގައި ނަމަވެސް، މިހާރު އެ މަސައްކަތް ފުށިދިއްގަރުފަޅަށް ބަދަލުކުރުމަށް ވަނީ ނިންމާފައެވެ. މި މަސައްކަތް ކުރިއަށް ގެންދިއުމަށްޓަކައި މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނި (މިޑްއެފްޒީ) އިން ޗައިނާގެ ހާބަރ އިންޖިނިއަރިންގ ކޮމްޕެނީ ލިމިޓެޑާއެކު އެއްބަސްވުމެއްގައި ސޮއިކޮށްފައިވަނީ މިދިޔަ އަހަރުގެ މާރިޗު މަހުއެވެ.

މި މަޝްރޫޢުގެ ދަށުން 100 ހެކްޓަރުގެ ބިމުގައި ދަނޑުވެރިކަން ކުރުމަށް ގްރީން ހައުސްތައް އަޅާނެއެވެ. އަދި އިތުރު 100 ހެކްޓަރުގެ ބިމުގައި އަޑިއަށް ފައިބާ ތަރުކާރީއާއި މޭވާ ހެއްދުމަށް ޚާއްޞަކުރާނެއެވެ. މީގެއިތުރުން، މަޝްރޫޢުގެ ދެވަނަ ފިޔަވަހީގައި ރާއްޖެއަށް ބޭނުންވާ ކުކުޅުބިސް އުފެއްދުމަށް ޚާއްޞަ ޕޯލްޓްރީ ފާމެއް ޤާއިމްކުރުމަށް ހަމަޖެހިފައިވާކަމަށް ދަނޑުވެރިކަމާ ބެހޭ ވުޒާރާއިން ވަނީ ވިދާޅުވެފައެވެ.

މި މަޝްރޫޢަކީ ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް އަދި ދަނޑުވެރިކަމުގެ ދާއިރާ ތަރައްޤީކޮށް ފުޅާކުރުމަށް އަޅާ މުހިންމު ފިޔަވަޅެކެވެ. މިކަމުގެ ސަބަބުން ރާއްޖޭގައި އުފައްދާ ތަރުކާރީއާއި މޭވާގެ މިންވަރު އިތުރުވެ، ބޭރުން އެތެރެކުރާ މިންވަރު މަދުވެގެންދާނެ ކަމަށް ބެލެވެއެވެ.

ސަރުކާރުން މި މަޝްރޫޢަށް ދެއްވާ އިސްކަމަކީ ދިވެހިރާއްޖޭގެ އިޤްތިޞާދީ ދާއިރާ އިތުރަށް ފުޅާކޮށް، ވަޒީފާގެ ފުރުޞަތުތައް އިތުރުކުރުމަށް އެޅޭ މުހިންމު ފިޔަވަޅެއް ކަމުގައިވެސް ފާހަގަކުރެވެއެވެ. ޚާއްޞަކޮށް ދަނޑުވެރިކަމުގެ ދާއިރާއިން ޒުވާނުންނަށް އިތުރު ފުރުޞަތުތަކެއް ހުޅުވިގެންދާނެއެވެ.

މި ލިޔުން ކިޔާލުމުން

Ads by MSS