ބައި-އިލެކްޝަންތަކުގެ ނަތީޖާއަކީ ބޮޑު ކާމިޔާބެއް: ރައީސުލްޖުމްހޫރިއްޔާ

ލޯކަލް ކައުންސިލްތަކުގެ ބައި-އިލެކްޝަންގައި ސަރުކާރު ހިންގާ ޕާޓީ، ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ)އަށް 33 ގޮނޑި ލިބުމަކީ ބޮޑު ކާމިޔާބެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

އިއްޔެ ބޭއްވި ބައި-އިލެކްޝަންތަކުގެ ވަގުތީ ނަތީޖާ ދައްކާގޮތުން، އެ އިންތިހާބުގެ 12 ގޮނޑީގެ ތެރެއިން 9 ގޮނޑި ކާމިޔާބުކޮށްފައި ވަނީ ކޮންގްރެސް ޕާޓީއެވެ. 

ރައީސުލްޖުމްހޫރިއްޔާ ވިދާޅުވީ، ލޯކަލް ކައުންސިލްތަކުގެ ބައި-އިލެކްޝަންގައި އިއްޔެ ބާއްވަން ކަނޑައެޅި 37 ގޮނޑީގެ ތެރެއިން، އިންތިޙާބަކާ ނުލައި 24 ގޮނޑި އަދި އިންތިޙާބުގައި ވާދަކުރި 12 ގޮނޑީގެ ތެރެއިން 9 ގޮނޑި ކޮންގްރެސް ޕާޓީއަށް ލިބުމަކީ ކާމިޔާބެއް ކަމަށެވެ.

pic.twitter.com/mwLLCkCzVo

— Dr Mohamed Muizzu (@MMuizzu) February 8, 2025

އެގޮތުން އަތޮޅު ކައުންސިލް ރައީސްކަމުގެ 1 ގޮނޑި، ރަށު ކައުންސިލް ރައީސްކަމުގެ 1 ގޮނޑި، ރަށު ކައުންސިލް މެންބަރުކަމުގެ 2 ގޮނޑި، އަންހެނުންގެ ތަރައްޤީއަށް މަސައްކަތްކުރާ ކޮމެޓީ 29 ގޮނޑި އެ ޕާޓީން ވަނީ ކާމިޔާބުކޮށްފައެވެ. 

އަދި މި ކާމިޔާބާ ގުޅިގެން ރައީސުލްޖުމްހޫރިއްޔާ ވަނީ އިންތިޙާބު ކާމިޔާބުކުރެއްވި ކެންޑިޑޭޓުންނަށް މަރުހަބާ ދަންނަވައި، އިންތިޙާބު ކާމިޔާބު ކުރެއްވުމަށް މަސައްކަތްކޮށްދެއްވި ފަރާތްތަކަށާއި އަދި ވޯޓުގައި ބައިވެރިވެ ވޯޓުދެއްވި ފަރާތްތަކަށް ޝުކުރު ދަންނަވާފައެވެ.

އިލެކްޝަންސް ކޮމިޝަނުން އާންމުކޮށްފައިވާ ތަފާސްހިސާބުތަކަށް ބަލާއިރު މި އިންތިހާބުގައި 6،275 މީހަކު ވޯޓުލި އެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 55.41 ޕަސެންޓް މީހުންނެވެ.