ޚަބަރު
އަންހެނުންގެ ކޮމިޓީގެ މެންބަރުންނަށް ރޯދަ އެލަވެންސް ދިނުމަށް އިޞްލާހު ހުށައަޅައިފި

ގއ. ވިލިނގިލީ އަންހެނުންގެ ކޮމިޓީ/ ފޮޓޯ: ދަރިވަރު
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް މުސާރަދެއްވައި، ރޯދަ އިނާޔަތް ދެއްވައި، މާލީ އިދާރާތަކުގެ އެކިސްކީމްތަކަށް ޝަރުޠު ހަމަވާ ބައެއްކަމުގައި ހެދުމަށްޓަކައި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމާބެހޭ ޤާނޫނަށް އިސްލާހު ހުށައަޅުއްވައިފިއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދު ފުއްދެވުމަށް ޤާނޫނަށް އިޞްލާހު ހުށައަޅުއްވާފައި ވަނީ މައްޗަންގޮޅި މެދު ދާއިރާގެ މެންބަރު އަހުމަދު ޟަމީރެވެ.
ރަށްތަކާއި ސިޓީތަކުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ދައުރު އިތުރަށް ސާފުކޮށް، އެ ކޮމިޓީތައް ބާރުވެރިކުރުމަށްޓަކައި ޤާނޫނަށް ގެންނަންޖެހޭ އިސްލާހުތައް ގެނައުމަކީ، އިދާރީ ދާއިރާތައް ލާމަރުކަޒީ އުސޫލުން ހިންގުމާބެހޭ ޤާނޫނަށް އިޞްލާހު ހުށަހެޅުއްވި ސަބަބެއްކަމަށް ސަރުކާރުން ހާމަކުރައްވާފައިވެއެވެ. އެގޮތުން އަންހެނުންގެ ކޮމިޓީތަކުގެ މަސްއޫލިއްޔަތު އިތުރަށް ތަފްސީލުކޮށް މަސްއޫލިއްޔަތު އަދާކުރުމަށް ބޭނުންވާ ވަސީލަތްތަކާއި ތަމްރީނުފަދަ ކަންކަން ކައުންސިލްތަކާއި، ލޯކަލް ގަވަރުމަންޓް އޮތޯރިޓީ، އެލްޖީއޭއިން ހަމަޖައްސައިދިނުމުގެ އުސޫލުތަކާއި، މާލީގޮތުން ދިމާވާ ދަތިތައް ހައްލުކޮށް، ކައުންސިލްތަކުން ދޭ ފައިސާ ދޭނެ ގޮތާއި އެ ފައިސާ ޚަރަދުކުރާނެ ގޮތުގެ އުސޫލުތައް މި އިސްލާޙުގައި ވަނީ ބަޔާންކުރައްވާފައެވެ.
މި އިސްލާޙުގައި ހިމަނާފައިވާ ކަންތައްތަކުގެ ތެރޭގައި، އެކަށީގެންވާ އުޖޫރައަކާއެކު، ރަމަޟާން މަހުގެ އެލަވަންސް، އަންހެނުންގެ ކޮމިޓީގެ ކޮންމެ މެންބަރަކަށްވެސް ދޭންޖެހޭނެއެވެ. މިގޮތުން، މެންބަރުންގެ ތެރެއިން އެހެން ޤާނޫނެއްގެ ދަށުން ރަމަޟާން މަހުގެ އެލަވެންސް ނުލިބޭ ކޮންމެ މެންބަރަކަށް އެ އެލަވެންސްގެ ގޮތުގައި 3،000 ރުފިޔާ ދިނުމަށް ވަނީ ބަޔާންކޮށްފައެވެ. ހަމައެހެންމެ، ކޮމިޓީތަކުގެ މަސްޢޫލިއްތުތައް ތަފްސީލުކޮށް ބަޔާކުރާއިރު، މި މަސްޢޫލިއްޔަތުތައް ތަންފީޒުކުރުމުގައި މަދަނީ އަދި ބައިނަލްއަޤުވާމީ ޖަމުޢިއްޔާތަކާ ގުޅުންބަދަހިކޮށް އެކިޕްރޮގްރާމްތައް ހިންގުމުގެ ބާރު އެ ކޮމިޓީތަކަށް ލިބުމާއި، ކުރިން ކޮމިޓީތަކުގެ ހިންގާ ޤަވާއިދު އެ ރަށެއްގެ ކައުންސިލްގެ ލަފާގެ ދަށުން ހަދަން އޮތް ނަމަވެސް އެލްޖީއޭގެ ލަފަޔާއެކު އެ ޤަވާއިދު ހެދުމަށް މި އިސްލާހުގައި ޝަރުތުކޮށްފައިވެއެވެ.
ރަށްތަކާއި ސިޓީތަކުގައި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުންނަކީ މުސާރަ ލިބޭ، ރަމަޟާން މަހުގެ އިނާޔަތް ލިބޭ، އަދި މާލީ އިދާރާތަކުގެ އެކި ސްކީމްތަކަށް ޝަރުޠު ހަމަވާ ބައެއްކަމުގައި ހެދުމަށްޓަކައި، ލާމަރުކަޒީ ޤާނޫނަށާއި، ވަޒީފާއާ ބެހޭ ޤާނޫނަށް ގެންނަން ޖެހޭ އިސްލާޙުތައް ގެންނަވާނެކަމަށް ރައީސް ވިދާޅުވީ، މިދިޔަ ޑިސެމްބަރު މަހުގެ 14 ވަނަ ދުވަހު އދ. ދަނގެތީގައި ވާހަކަފުޅު ދައްކަވަމުންނެވެ. އެ ވަޢުދުފުޅާ އެއްގޮތަށް، ޤާނޫނަށް ހުށައަޅާފައިވާ އިޞްލާހަށް ސަރުކާރުން އަމަލުކުރަން ފެށުމުން، އަންނަ ރަމަޟާންމަހުގެ އިނާޔަތް އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނަށް ލިބިވަޑައިގަންނަވާނެއެވެ.
ކޮންމެ ރަށެއްގެވެސް ރަށު ތަރައްޤީއަށް އެންމެ ހަރަކާތްތެރިކޮށް މަސައްކަތްކުރާ ފަރާތްތައް ކަމަށްވާއިރު، އެކަމުގެ އަގުވަޒަންކުރައްވަން ބޭނުންފުޅުވާކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.