ޢިއްޒުއްދީން ފާލަމުގެ މަސައްކަތް ނިމުމަކާ ގާތްވެއްޖެ

ޢިއްޒުއްދީން ފާލަން އަލުން ތަރައްޤީކުރުމުގެ މަޝްރޫޢުގެ ދަށުން މިހާރު ކުރަމުންދަނީ މަސައްކަތް ނިންމުމުގެ ފަހުގެ މަސައްކަތްތައްކަމަށް، އެ މަސައްކަތުގެ ކޮންޓްރެކްޓަރ އެމްޓިސީސީން ވިދާޅުވެއްޖެއެވެ.

އެމްޓީސީސީން ވިދާޅުވީ، މި މަޝްރޫޢުގެ ބޮޑެތި މަސައްކަތްތައް ނިމިފައިވާކaމަށެވެ. އެގޮތުން ފާލަމުގެ ސްޓްރަކްޗަރއާއި ފުރާޅު އަދި ތަނބުތަކާއި ސީލިންގގެ މަސައްކަތްތައް ވެސް މިހާރު ވަނީ ނިންމާފައެވެ. މިހާރު ކުރަމުންދަނީ ފާލަމުގެ ފްލޯރިން އެޅުމުގެ މަސައްކަތާއި އަދި ފާލަމުގެ ފިނިޝިންގ މަސައްކަތްތައްކަމަށް އެކުންފުނިން ވިދާޅުވެފައިވެއެވެ. 

ފާލަމުގަ މަސައްކަތް ނިންމުމަށް ހަމަޖައްސާފައިވާ ތާރީޙުކަމުގައިވާ 31 ޖަނަވަރީ 2025 ވަނަ ދުވަހަށް ފާލަން ނިމިފައި ނުވިނަމަވެސް، މަސައްކަތްކުރަމުން ދަނީ ވީހާވެސް އަވަހަށް މި ޕްރޮޖެކްޓު ނިންމުމަށް ކަމަށް އެ ކުންފުނިން މަޢުލޫމާތުދެއްވައެވެ. 

ދިވެހި ޖުމްހޫރިއްޔާގެ ޢިއްޒަތާއި، ސިޔާދަތާއި، ދިވެހިންގެ އަމިއްލަވަންތަކަން ރަމުޒުކޮށްދޭ މުހިންމު ބިނާއެއް ކަމަށްވާ އިއްޒުއްދީން ފާލަމަކީ، ބޭރުގެ ޤައުމުތަކުން އިސްވެރިންނާއި އިއްޒަތްތެރިން މާލޭއަށް
ފައިބައިވަޑައިގަތުމަށް ބޭނުންކުރައްވާ މުހިންމު ފާލަމެކެވެ. 

ޢިއްޒުއްދީނު ފާލަން އެންމެ ފަހުން ބިނާކުރި ފަރުމާއަކީ ރާއްޖޭގެ މިނިވަންކަމަށް 50 އަހަރުފުރުމުގެ މުނާސަބާތާއި ގުޅިގެން، އޭރު ބޭނުންކުރަމުންދިޔަ ރަސްމީ ފާލަމުގެ ބަދަލުގައި ޒަމާނީ ފަރުމާއަކަށް ބަދަލު ގެނެސް، ތަރައްޤީކުރި ފާލަމެކެވެ. އޭރު ފާލަމުގެ ޑިޒައިން ހުރީ، ރިޔާ ނެގި ނާލު ބައްތެއްޔެއްގެ ސިފަ ދުރުން ފެންނަ ގޮތަށެވެ.