ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކުގެ ޑެބިޓް ކާޑުގެ ޑޮލަރު ލިމިޓު އިތުރުކުރެއްވުމަށް ރައީސުލްޖުމްހޫރިއްޔާ ނިންމަވައިފި

ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކުގެ ޑެބިޓް ކާޑަށް 1500 ޑޮލަރުގެ ލިމިޓެއް އިތުރު ކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.

ރައީސުލްޖުމްހުރިއްޔާ ސޯޝަލް މީޑިއާގައި ކުރެއްވެވި ޕޯސްޓެއްގައި ވިދާޅުވީ، އެކަން ހަމަޖައްސަވައިދެއްވުމަށް މޯލްޑިވްސް މަނިޓަރީ އޮތޯރިޓީ އާއި ބޭންކް އޮފް މޯލްޑިވްސްއަށް މިހާރު އަންގަވާފައިވާކަމަށެވެ. 

އެ މަނިކުފާނުގެ މި ނިންމެވުމަކީ ބޭންކު ރޭޓުގައި ޑޮލަރު ލިބުމަށް ދަތިވެފައިވާތީ، އެކަމަށް ލުއިފަސޭހަ ޙައްލެއް ހޯއްދަވައި ދެއްވުމަށް ނިންމެވި ނިންމެވުމެއްކަމަށް އެ މަނިކުފާނު ވަނީ ވިދާޅުވެފައެވެ.

1446ވަނަ އަހަރުގެ ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކަށް ބޭންކްގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ޙައްލެއް ހަމަޖައްސައިދިނުމުގެގޮތުން، ކޮންމެ ޢުމްރާވެރިއެއްގެ ބޭންކް އޮފް މޯލްޑިވްސް ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1500 ޑޮލަރުގެ ލިމިޓެއް ހަމަޖައްސަވައި ދެއްވުމަށް ބޭންކް އޮފް މޯލްޑިވްސް އަށް އަދި MMA އަށް ދަންނަވައިފިން.

ރައީސުލްޖުމްހުރިއްޔާ ކުރެއްވެވި ޕޯސްޓުގައި ވެއެވެ.

ބޭންކު އޮފް މޯލްޑިވްސްގެ ކަސްޓަމަރުންނަށް ރާއްޖެއިން ބޭރުގައި އާންމުކޮށް ބޭނުންކުރެވޭނެ ލިމިޓަކަށް އެ ބޭންކުން ކަނޑައަޅާފައިވަނީ 750 ޑޮލަރެވެ. އެހެންކަމުން، ރައީސުލްޖުމްހޫރިއްޔާގެ މި ނިންމެވުމާ ގުޅިގެން، މި ރަމަޟާންމަހު ޢުމްރާއަށް ވަޑައިގަންނަވާ ހުރިހާ ފަރާތްތަކަށް އެ ކާޑު ބޭނުންކުރުމުގައި 2،250 ޑޮލަރުގެ ލިމިޓެއް ލިބިލައްވާނެއެވެ.