ރޯދަ ހަދިޔާގެ ގޮތުގައި ދޫކުރާ މަސްދަޅުކޭސް ހދ. އަތޮޅުގެ ރަށްތަކަށް ބަހަން ފަށައިފި

ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ރަމަޟާންމަހާ ގުޅިގެން ގޭބީސީތަކަށް ދެއްވާ ރޯދަ ހަދިޔާ ހދ. އަތޮޅުގެ ރަށްތަކަށް ބަހަން ފަށައިފިއެވެ. މި މަޢުލޫމާތު ދެއްވާފައިވަނީ އެ އަތޮޅުގެ ކަންކަން ބެލެހެއްޓެވުމާއި ޙަވާލުވެ ހުންނެވި މިނިސްޓްރީގެ ނާއިބު ޢަލީ ޝަމީމެވެ.

ޢަލީ ޝަމީމް ވިދާޅުވި ގޮތުގައި މިހާތަނަށް ހދ. އަތޮޅުގެ ކުޅުދުއްފުށި ސިޓީ، ނޮޅިވަރަންފަރު، ހަނިމާދޫ އަދި ކުރިނބީގެ ގޭބީސީތަކަށް ރައީސުލްޖުމްހޫރިއްޔާ ދެއްވާ ރޯދަ ހަދިޔާގެ ގޮތުގައި މަސްދަޅު ކޭސް ބަހައި ނިމިފައިވެއެވެ. އަދި މަސްދަޅު ކޭސް ނުލިބި ހުރި ހދ. އަތޮޅުގެ އެހެން ރަށްތަކަށް މި ހަފުތާ ތެރޭގައި މަސްދަޅު ކޭސް ލިބިގެންދާނެ ކަމަށްވެސް އޭނާ ވިދާޅުވިއެވެ.

ލިބިފައިވާ މަޢުލޫމާތުގެ މަތިން، ހދ. އަތޮޅުގެ ރަށްރަށަށް ރޯދަ ހަދިޔާ ހިފައިގެން ދަތުރުކުރާ ދޯނި މިއަދުވެސް އެ މަސައްކަތުގައި ޙަރަކާތްތެރިވަމުން ދާކަން ފާހަގަކުރެވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގައި، ރަމަޟާންމަހާ ގުޅިގެން ދިވެހި ރައްޔިތުންނަށް ގިނަގުނަ ޢިނާޔަތްތަކެއް ސަރުކާރުން ފޯރުކޮށްދެމުން އަންނަކަން ފާހަގަކުރެވެއެވެ. މީގެ ތެރޭގައި ރަމަޟާންމަހުގެ ފަހު 10 ދުވަހު ސަރުކާރުގެ އޮފީސްތައް ބަންދުކުރުމާއި، ގޭބީސީތަކަށް ރައީސުލްޖުމްހޫރިއްޔާ ދެއްވާ ރޯދަ ހަދިޔާ ހިމެނެއެވެ. މީގެ އިތުރުންވެސް ބައެއް ޢިނާޔަތްތައް ރޯދަމަހާ ގުޅިގެން ފާއިތުވި އަހަރު ރައީސުލްޖުމްހޫރިއްޔާ ދެއްވާފައިވާކަން ފާހަގަކުރެވެއެވެ.