ޚަބަރު
އެސީސީގެ ނައިބަކަށް ކުރިން ހުށަހެޅުއްވި ނަން ބަދަލުކުރައްވައިފި
އޭސީސީގެ ނައިބަކަށް އައްޔަންކުރެއްވުމަށް ނިންމަވާފައިވާ އަބްދުﷲ ނާޝިދު، ފޮޓޯ: ރައީސް އޮފީސް
އެންޓި-ކޮރަޕްޝަން ކޮމިޝަން، އެސީސީގެ ނައިބު ރައީސްގެ މަޤާމަށް ކުރިން ހުށަހެޅުއްވި އަޙުމަދު ނާޝިދުގެ ބަދަލުގައި، އެ މަޤާމަށް އަބްދުﷲ ނާޝިދު އައްޔަންކުރެއްވުމަށް ރައީސުލްޖުމްޙޫރިއްޔާ ޑޮކްޓަރ މުޙައްމަދު މުޢިއްޒު މަޖިލީހަށް ފޮނުއްވައިފިއެވެ.
މިދިޔަ ޖެނުއަރީ މަހުގެ 26ވަނަ ދުވަހު މަޖިލީހަށް ފޮނުއްވެވި ނަން ބަދަލުކުރެއްވުމަށްފަހު އެކަން ރައްޔިތުންގެ މަޖިލީހަށް ރައީސުލްޖުމްހޫރިއްޔާ އަންގަވާފައިވަނީ ހޯމަ ދުވަހެވެ.
އެންޓިކޮރަޕްޝަން ކޮމިޝަންގެ ޤާނޫނަށް ގެނައި އިސްލާޙާ ގުޅިގެން، އެ ކޮމިޝަނުގެ ރައީސް އާއި ނައިބު ރައީސްއަށް ބޭފުޅުން އައްޔަން ކުރެއްވުމުގެ ބާރު އޮންނަވަނީ ރައީސުލްޖުމްހޫރިއްޔާގެ އަތްޕުޅުގައެވެ. ނަމަވެސް، ބޭފުޅަކު އައްޔަން ކުރެއްވުމުގެ ކުރިން މަޖިލީހުގެ ރުހުން ހޯއްދަވަން ޖެހިވަޑައިގަންނަވާނެކަމަށް އެ އިސްލާޙުގައި ވެއެވެ.
ކޮމިޝަނުގެ ރައީސާއި ނައިބު ކުރިން ހޮވަނީ މެންބަރުންގެ މެދުގައި ނަގާ ވޯޓަކުންނެވެ.
އަބްދުﷲ ނާޝިދުގެ ނަންފުޅު ރައީސުލްޖުމްހޫރިއްޔާ މަޖިލީހަށް ހުށަހެޅުއްވި މައްސަލަ ދިރާސާކުރެއްވުމަށް މިނިވަން މުއައްސަސާތަކުގެ ކޮމިޓީއަށް ވަނީ މިހާރު ފޮނުވާފައެވެ.
އެންޓި-ކޮރަޕްޝަން ކޮމިޝަނަކީ، 07 އޯގަސްޓް 2008 ގައި ތަޞްދީޤުކުރެވުނު ޤާނޫނުއަސާސީގެ ދަށުން އުފައްދަވާފައިވާ މިނިވަން މުއައްސަސާއެކެވެ. އެ ކޮމިޝަނުން ކޮރަޕްޝަނުގެ މައްސަލަތައް ބަލައި ތަޙުޤީޤުކުރުމާއި ކޮމިޝަނުން ތަޙުޤީޤުކުރާ ކަންތައްތަކުގެ ތެރެއިން އެހެނިހެން އިދާރާތަކުން އިތުރަށް ބަލައި ސާފުކުރަންޖެހޭ ކަންތައްތައް އެ ފަރާތްތަކަށް ހުށަހަޅައި، ޝަރީޢަތަށް ހުށަހަޅަންޖެހޭކަމަށް ފެންނަ ކަންތައްތައް ޝަރީޢަތަށް ހުށަހެޅުމަށްޓަކައި ޕްރޮސިކިއުޓަރ ޖެނެރަލަށް ފޮނުވުމުގެ މަސައްކަތް ކުރަންޖެހެއެވެ.
