ސައިންސްގެ ދާއިރާތަކުން އަންހެނުންގެ ބައިވެރިވުން އިތުރުކުރަންޖެހޭ: ރައީސުލްޖުމްހޫރިއްޔާ

ސައިންސް ނުވަތަ ސައިންސްގެ ދާއިރާތަކުން އަންހެނުންގެ ބައިވެރިވުން އިތުރުކުރުމަށް ހިތްވަރާއެކު މަސައްކަތްކުރަންޖެހޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ބައިނަލްއަޤުވާމީ ފެންވަރުގައި މިއަދު ފާހަގަކުރަމުންދާ އިންޓަރނޭޝަނަލް ޑޭ އޮފް ވިމެން އެންޑް ގަރލްސް އިން ސައިންސް ނުވަތަ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ދުވަހުގެ މުނާސަބަތުގައި ފޮނުއްވި ޚާއްޞަ މެސެޖުގައެވެ. 

ރައީސުލްޖުމްހޫރިއްޔާ ވިދާޅުވީ، ދުނިޔެއަށް ކުރިމަތިވާ މޫސުމީ ގޮންޖެހުންތަކާއި، ދެމެހެއްޓެނިވި ތަރައްޤީގެ މަސައްކަތްތަކުގައި އަންހެން ސައިންސްވެރިންނާއި ފަންނީ ތަޖުރިބާކާރުންނާއި އިސްވާރުންގެ ދައުރު ވަރަށް މުހިންމު ކަމުގައެއެވެ. 

ރައީސުލްޖުމްހޫރިއްޔާގެ މެސެޖުގައި އިތުރަށް ފާހަގަކުރައްވާފައިވާ ގޮތުގައި، މިފަދަ ދުވަހެއް ފާހަގަކުރުމުގެ ބޭނުމަކީ، އަންހެނުން ސައިންސްގެ ރޮނގުން ހޯދާފައިވާ މުހިންމު ކާމިޔާބީތައް ފާހަގަކޮށް، އެ ފަރާތްތަކުގެ ބައިވެރިވުމާއި، ހަމަހަމަ ފުރުޞަތުތައް ހޯދައިދިނުމާއި، ކުރިއެރުމާއި ކާމިޔާބީ ފާހަގަކޮށް، އެއްބާރުލުންދީ، ބާރުއެޅުމުގެ ގޮތުން ކަމަށެވެ.

އެގޮތުން ސައިންސާއި ސައިންސްގެ ދާއިރާއިން އަންހެނުންނާއި އަންހެން ކުދިން، އީޖާދީ އަދި ވިލުންތެރި ގޮތެއްގައި ބާރުވެރިކުރުވައި، މަސައްކަތްތައް ކުރުމާއި އެ ކަންކަމުގެ ވައްޓަފާޅިއަށް އަންނަ ބަދަލުތަކަށް ހާނުވައި އެ ފަރާތްތަކުގެ ބާރުވެރިކަން އިތުރުކުރުމަށް ދިވެހި ސަރުކާރުން އަބަދުވެސް އިސްކަން ދެއްވާނެކަމަށް ހާމަކުރައްވާފައިވެއެވެ. 

އަދި ހިލޭ ޑިގްރީ ޕްރޮގްރާމުގެ ދަށުން،  ސައިންސް، ޓެކްނޯލޮޖި، އިންޖިނިއަރިންގ އަދި މެތަމެޓިކްސް، (ސްޓެމް)ގެ ދާއިރާގެ ކޯސްތައް ފުރިހަމަކޮށް މި ދާއިރާތަކުން އަންހެނުންގެ ބައިވެރިވުން އިތުރުވެ، ތަޢުލީމީ ދާއިރާގައި މިންތީގެ ފަރަގު ކުޑަކުރުމުގައި، ދެމެހެއްޓެނިވި ތަރައްޤީގެ އަމާޒު، ނުވަތަ އެސް.ޑީ.ޖީއަށް ވާޞިލުވެވުމީ، ތަޢުލީމީ ދާއިރާގައި މިންތީގެ ހަމަހަމަކަމަށް ރާއްޖެއިން ދޭ އަހައްމިއްޔަތުކަން ހާމަވެގެންދާ ކަމެއްކަމުގައި ރައީސުލްޖުމްހޫރިއްޔާގެ މެސެޖުގައި ފާހަގަކުރައްވާފައިވެއެވެ. 

ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ވަނީ، އެ މަނިކުފާނުގެ ރަސްމީ "އެކްސް" އެކައުންޓްގައިވެސް ޕޯސްޓެއް ހިއްސާކުރައްވާފައެވެ.