ގުއަޓެމާލާގެ ހިތާމަވެރި ބަސް އެކްސިޑެންޓާ ގުޅިގެން ރައީސް މުޢިއްޒު އެ ޤައުމުގެ ރައީސަށް ތަޢުޒިޔާ ފޮނުއްވައިފި

ގުއަޓެމާލާ ސިޓީން ބޭރުގައި ހިނގި ނުރައްކާތެރި ބަސް އެކްސިޑެންޓެއްގައި މަރުވި މީހުންގެ ޢާއިލާތަކަށް ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ.

ގުއަޓެމާލާގެ ރައީސް ސެސަރ ބަރނާޑޯ އަރެވަލޯ ޑި ލިއޯންއަށް ފޮނުއްވި މެސެޖެއްގައި، މި ހިތާމަވެރި ހާދިސާގައި ފުރާނަ ގެއްލުނު މީހުންގެ ޢާއިލާތަކަށް ރައީސް މުޢިއްޒު  ތަޢުޒިޔާ ރައްދުކުރެއްވިއެވެ. މި ހާދިސާގައި ބަހެއް ހައިވޭ ބްރިޖަކުން ބޭރަށް ވެއްޓި، ގިނަ އަދަދެއްގެ މީހުން ވަނީ މަރުވެފައެވެ.

މި ހާދިސާއާ ގުޅިގެން ގުއަޓެމާލާގައި ތިން ދުވަހުގެ ޤައުމީ ހިތާމައެއް ފާހަގަކުރަމުންދާއިރު، ރައީސް މުޢިއްޒު ވަނީ ގުއަޓެމާލާގެ ސަރުކާރަށާއި ރައްޔިތުންނަށް އެމަނިކުފާނުގެ ހަމްދަރުދީ ފާޅުކުރައްވާފައެވެ.