ޚަބަރު
ސަޢޫދީ ޕްރިންސްގެ ސެކްރެޓަރީ ޖެނެރަލްގެ މަޤާމަށް އައްޔަންކުރެއްވި ބާދިރު ޢަލީއަށް މަރުޙަބާ ވިދާޅުވެއްޖެ

ބާދިރު ޢަލީ އަލްކަހައިލް ސަޢޫދީ ޢަރަބިއްޔާއިން ރާއްޖެއަށް ކަނޑައަޅާފައި ހުންނެވި ސަފީރެއްގެ މަޤާމުގައި ހުންނެވި އިރު އޭރުގެ ނައިބު ރައީސްއާ ބައްދަލުކުރެއްވުން، ފޮޓޯ: ރައީސް އޮފީސް
މުޙައްމަދު ބިން ސަލްމާން ފައުންޑޭޝަނުގައި ހުންނެވި ބާދިރު ޢަލީ އަލްކަހައިލް، ސަޢޫދީ ޕްރިންސް މުޙައްމަދު ބިން ސަލްމާންގެ ޕްރައިވެޓް އެފެއާރޒްގެ ސެކްރެޓަރީ ޖެނެރަލްގެ މަޤާމަށް އައްޔަންކުރެއްވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ މަނިކުފާނަށް މަރުހަބާ ވިދާޅުވެއްޖެއެވެ.
ބާދިރު ޢަލީ މި މަޤާމަށް އައްޔަނުކުރައްވާފައިވާކަން އެ މަނިކުފާނު ވަނީ އިއްޔެ އިޢުލާންކުރައްވާފައެވެ.
ރައީސުލްޖުމްހޫރިއްޔާގެ މެސެޖުގައި، ބާދިރު ޢަލީ އެ މަޤާމަށް އައްޔަނު ކުރެއްވީ އެ މަނިކުފާނުގެ ތެދުވެރިކަމަށް ޝާޙީ ހާންދާނުން އިތުބާރުކުރައްވާތީ ކަމަށާއި، އެކަމަށް ވަރަށް ހޫނު މަރުހަބާއެއް ދަންނަވާފައިވެއެވެ. އަދި އެއީ ޤައުމާއި ދީނުގެ ކަންކަމުގައި އެ މަނިކުފާނު ދެއްވާ އަޙައްމިއްޔަތުކަން ރަމްޒުކޮށްދޭ ހެއްކެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލެއްވީ، އެ މަނިކުފާނަށް ދެ ދުނިޔޭގެ ކާމިޔާބަށް އެދިވަޑައިގެން، އެ މަނިކުފާނާއި ޤައުމު ނުރައްކާތަކުން ސަލާމަތްކުރެއްވުމަށް އެދި ދުޢާދަންނަވަމުންނެވެ.
ރައީސުލްޖުމްހޫރިއްޔާގެ މި މެސެޖަށް ބާދިރު ޢަލީ ވަނީ ޝުކުރު ދަންނަވާފައެވެ. އަދި ރައީސުލްޖުމްހޫރިއްޔާއަށާއި، އެ މަނިކުފާނު ދުވަސްތަކެއް އެކީގައި ހޭދަކުރެއްވި ދިވެހި ރައްޔިތުންނަށް ކާމިޔާބާއި ތަނަވަސްކަމަށް އެދިވަޑައިގެންފައިވެއެވެ.
ބާދިރު ޢަލީއަކީ ރާއްޖެއާ ވަރަށް ގާތްބޭފުޅެކެވެ. އެ މަނިކުފާނު ވަނީ މީގެކުރިން ސަޢޫދީ ޢަރަބިއްޔާއިން ރާއްޖެއަށް ކަނޑައަޅާފައި ހުންނެވި ސަފީރެއްގެ މަޤާމު ފުރުއްވާފަވެއެވެ. އެ މަޤާމަށް އައްޔަންކުރެއްވުމާ ގުޅިގެން، މަޤާމުގެ ފަތްކޮޅު ރާއްޖޭގެ ރައީސުލްޖުމްހޫރިއްޔާއަށް އަރުއްވާފައިވަނީ 2015 ނޮވެންބަރު 5ވަނަ ދުވަހެވެ.