މަޑުއްވަރީއަށް އުފުލަންދޫ، މީދޫއަށް ތާވަތާ، ރައީސްގެ ވަޢުދާ އެއްގޮތަށް

ރ. މަޑުއްވަރީއަކީ، އާބާދީ އިތުރުވެ، ތޮއްޖެހި، ބިމުގެ ގޮތުން ކުޑަރަށެކެވެ.  އެރަށުގެއާބާދީގެ %60 އިންސައްތަ މީހުން އާމްދަނީ ހޯދުމަށް ކުރާ މަސައްކަތަކީ މަސްވެރިކަމެވެ. އެހެންކަމުން އެރަށަކީ އޮޑިދޯނިފަހަރު އިންތިހާއަށް ގިނަ އަދި ގިނަވަމުން އަންނަ ރަށެކެވެ.

މަޑުއްވަރީގައި އޮޑި ދޯނިފަހަރު އެހެލާ މަރާމާތު ކުރުމަށް އެކަށޭނަ ސަރަހައްދެއް ނެތެވެ. އޮޑިދޯނިފަހަރު އެހެލުމަށް ޚާއްސަކުރާނެ އިތުރު ޖާގައެއް އެ ރަށުގައި ނެތުމުގެ ސަބަބުން އެރަށާ ކައިރީގައި އޮތް "އުފުލަންދޫ" އެރަށުގެ އިޚްތިޞާޞްގެ ތެރޭގައި ހިމަނައިދިނުމަށް އެ ރަށުގެ ރައްޔިތުން އެދެމުންދާތާ ގިނަ ދުވަސްތަކެއްވެއްޖެއެވެ. 

މަޑުއްވަރީއަކީ ބޯހިޔާވަހިކަމުގެ ދަތިކަން ވަރަށް ބޮޑަށް ކުރިމަތިވެފައިވާ ރަށެކެވެ. އިޤްތިޞާދީގޮތުން ކުރަންޖެހޭ މަސައްކަތްތައް ކުރުމަށް ވެސް އެ ރަށުގައި ތަން ނެތްކަން ސަރުކާރަށް ވަނީ ފާހަގަކުރެވިފައެވެ. ރަށުގެ ރައްޔިތުން އުޅޭ ސަރަހައްދުގައި ފައިބަރުފަދަ މަސައްކަތްކުރުމަކީ ރައްޔިތުންގެ ސިއްޙަތަށްވެސް ނުރައްކާއޮތްކަމަކަށްވާތީ އެކަމުގައިވެސް ރައްޔިތުންގެ ކަންބޮޑުވުން އެބައޮތެވެ.

ރައްޔިތުންގެ މިހުރިހާ ކަންބޮޑުވުމަކަށް ހައްލު ގެނެސްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިތާ މަހެއް ފާއިތުނުވަނީސް ރައްޔިތުންގެ އުންމީދު ރައީސުލްޖުމްހޫރިއްޔާ ވަނީ ހާސިލުކޮށްދެއްވަފައެވެ.

އެހެންވީމާ، އަޅުގަނޑު ތިޔަބޭފުޅުންނަށް ދަންނަވަން ބޭނުންވަނީ، ތިޔަބޭފުޅުންގެ މިހިރަ ހުރިހާ މައްސަލައެއް އިރާދަކުރެއްވިއްޔާ ޙައްލުކުރެވޭ ގޮތަށް، "އުފުލަންދޫ"، މިރަށުގެ އިޚްތިޞާޞްގެ ތެރޭގައި ހިމަނައިދޭން އަޅުގަނޑު ނިންމި ވާހަކަ. އިރާދަކުރެއްވިއްޔާ، އެކަމާ ގުޅޭ ޤާނޫނީ ލިޔެކިޔުމުގެ ކަންތައްތައް ކުރިއަށް ގެންގޮސް، އެކަން ހަމަޖެހިގެންދާނެ. ހަމަޖެހުމުން، ތިޔަބޭފުޅުންގެ އިޤްތިޞާދީ ހުރިހާ ކަމެއް، ދިރިއުޅޭ ސަރަޙައްދެއްގައި ހުންނަން ނުޖެހޭނެ ހުރިހާ ކަމެއް، އެތަނަށް ބަދަލުކުރެއްވުމަކީ އަޅުގަނޑު ތިޔަބޭފުޅުންގެ ކިބައިން އެދެން އޮތް ކަމަކީ. އެކަން ކުރެއްވުމުން ރަށަށް ބިން އިތުރުވެގެން ދިޔައީ. ގޯތިގެދޮރު، ހައުސިންގ މަޝްރޫޢުތަކަށްވެސް ޖާގަ އިތުރުވީ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާގެ ޤަރާރުން އެކަން ހަމަޖެހުނީއެވެ. ކުރިއަށް އޮތީ އެ ދެރަށުގެ ރައްޔިތުންގެ އިޤްތިޞާދީ ހަރަކާތްތައް އިތުރަށް ފުޅާކޮށް އާމްދަނީ އިތުރުކުރުމުގެ ފުރުޞަތެވެ. ރަށުގައި ބިން ނެތުމުގެ ސަބަބުން އޮތް އިޖުތިމަޢީ މައްސަލައަކަށް އޮތީ ފަހި ޙައްލެކެވެ. ރައްޔިތުންގެ އެ އުންމީދު ހާސިލުވުމުގެ ހުރިހާވެސް ޝުކުރެއް އޮތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށެވެ.