އަންހެނުންގެ ކޮމެޓީތަކުގެ ދައުރުފުޅާކޮށް، އިތުރު އިނާޔަތްތައް ލިއްބައިދޭ ބިލު ތަސްދީޤުކުރައްވައިފި

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މަސްއޫލިއްޔަތުތައް އިތުރަށް ތަފްޞީލުކުރުމާއިއެކު ކޮމިޓީތަކުގެ ހިންގުން ހަރުދަނާކުރުމާއި، މާލީ ގޮތުން އެ ކޮމެޓީތަކުގެ މެންބަރުން ބާރުވެރިކުރުން ހިމެނޭ އިސްލާޙު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ތަސްދީޤުކުރައްވައިފިއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް 14  ވަނަ އިޞްލާޙު ގެނައުމުގެ މި ބިލަކީ، 2025 ފެބުރުވަރީ 18 ވީ އަންގާރަ ދުވަހު ބޭއްވެވި 20 ވަނަ ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 06 ވަނަ ޖަލްސާއިން ފާސްކުރެއްވި ބިލެކެވެ.  

މި އިސްލާޙުގެ މައިގަނޑު ކަންކަމުގެ ތެރޭގައި ހިމެނެނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މަސްއޫލިއްޔަތުތައް އިތުރަށް ތަފްޞީލުކުރުމާއިއެކު ކޮމިޓީތަކުގެ ހިންގުން ހަރުދަނާކުރުމާއި، ކޮމިޓީތަކުގެ މަސްއޫލިއްޔަތުތައް އަދާކުރުމުގައި އެ ކޮމިޓީތަކަށް ބޭނުންވާ އިދާރީ އެހީތެރިކަމާއި ވަޞީލަތްތަކާއި ތަމްރީނު ފަދަ ކަންކަން، ކައުންސިލްތަކުންނާއި ލޯކަލް ގަވަރމަންޓް އޮތޯރިޓީއިން ހަމަޖައްސައިދިނުމެވެ.

މީގެ އިތުރުން ކައުންސިލުތަކަށް ސަރުކާރުން ދޭ ހިލޭ އެހީގެ ފައިސާގެ ތެރެއިން، ކޮމިޓީތަކުގެ ހަރަކާތްތައް ހިންގުމަށް އެ ކޮމިޓީތަކަށް ދޭންޖެހޭ ފައިސާ ދޫކުރުމުގައި ދިމާވާ ދަތިތައް ޙައްލު ކުރުމުގެ ގޮތުން، އެ ފައިސާ ދޫކުރާނެ ގޮތްތަކާއި، އެ ފަދައިން ދޫކުރާ ފައިސާ، ކޮމިޓީތަކުން ބޭނުން ކުރުމުގައި ޢަމަލުކުރަންޖެހޭ ގޮތުގެ އުސޫލުތައް ބަޔާންކުރުންވެސް ހިމެނެއެވެ.

އަދި މި އިސްލާހުގެ ދަށުން އަންހެނުންގެ ކޮމިޓީގެ މެންބަރުންނަށް ލޯކަލް ގަވަރމަންޓް އޮތޯރިޓީ، އެލްޖީއޭގެ ލަފާގެމަތިން ނޭޝަނަލް ޕޭ ކޮމިޝަނުން އެކަށީގެންވާ އުޖޫރައަކާއެކު ރަމަޟާން މަހުގެ އެލަވެންސެއް ވެސް ދޭންޖެހޭނެއެވެ. އެގޮތުން، މެންބަރުންގެ ތެރެއިން އެހެން ޤާނޫނެއްގެ ދަށުން ރަމަޟާން މަހުގެ އެލަވެންސް ނުލިބޭ ކޮންމެ މެންބަރަކަށް، އެ އެލަވެންސްގެ ގޮތުގައި 3،000 ރުފިޔާ ދިނުމަށް ވަނީ ބަޔާންކުރައްވާފައެވެ.

ހަމައެއާއެކު، މި އިސްލާހުގައި ސަރުކާރުން ކައުންސިލްތަކަށްދޭ ހިލޭ އެހީގެ %5 އަންހެނުންގެ ކޮމެޓީތަކުގެ މަސްއޫލިއްޔަތުތައް އަދާކުރުމަށް ޙާއްސަކުރަންޖެހެއެވެ. އަދި އެ ކޮމެޓީތަކުން އަހަރުގެ ފުރަތަމަ ކުއާޓާގައި ހިންގަން ރާވާފައިވާ ހަރަކާތްތަކަށް ބޭނުންވާ ފައިސާ، ކައުންސިލަށް ފައިސާ ލިބޭތާ 30 ދުވަހުގެ ތެރޭގައި އެ ކޮމެޓީއާ ހަވާލުކުރަން ޖެހެއެވެ. އެ އިސްލާހުގައިވާ ގޮތުން، މި ފައިސާ ހަވާލުކުރަންޖެހެނީ، އެލްޖީއޭ އިން ހަދާ ޤަވާއިދެއްގެ ތެރެއިންނެވެ. 

އަންހެނުންގެ ކޮމެޓީތަކުގައި މަސައްކަތްކުރާ ފަރާތްތައް ބާރުވެރިކުރުމަކީ ރައީސުލްޖުމްހޫރިއްޔާ އިސްކަންދެއްވާކަމެއްކަމަށް އެ މަނިކުފާނު ވަނީ ހާމަކުރައްވާފައެވެ. އެގޮތުން، މިދިޔަ ޑިސެމްބަރު މަހުގެ 14 ވަނަ ދުވަހު އދ. ދަނގެތީގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ، އަންނަ ރަމަޟާންމަހުން ފެށިގެން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ރަމަޟާންމަހުގެ އިނާޔަތް ދެއްވަން ފަށްޓަވާނެކަމަށެވެ. އަދި އަންހެނުން ކޮމެޓީގެ މެންބަރުންނަކީ މާލީ އިދާރާތަކުގެ އެކި ސްކީމްތަކަށް ޝަރުޠު ހަމަވާ ބައެއްކަމުގައި ހެދުމަށްޓަކައި، ލާމަރުކަޒީ ޤާނޫނަށާއި، ވަޒީފާއާ ބެހޭ ޤާނޫނަށް ގެންނަން ޖެހޭ އިސްލާޙުތައް ގެންނަވާނެކަމަށްވެސް އެ މަނިކުފާނު ވިދާޅުވެފައިވެއެވެ.