ރައީސުލްޖުމްހޫރިއްޔާގެ ދަތުރުފުޅުތަކަކީ ލާމަރުކަޒީ ނިޒާމަށް އޮތް ކުރިއެރުމެއް: މިނިސްޓަރ ޝަރީފް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ދައުރުގެ ކުރީކޮޅު ރަށްރަށަށް ދަތުރުފުޅު ކުރައްވަމުން ގެންދިއުމަކީ، ލާމަރުކަޒީ ނިޒާމު ތަންފީޒުކުރުމަށް ލިބިގެންދާ ކުރިއެރުމެއް ކަމުގައި، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯކްސް، އަލްފާޟިލް އާދަމް ޝަރީފް އުމަރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ނޫސްވެރިންނަށް މަޢުލޫމާތު ދެއްވުމަށް މިއަދު ރައީސް އޮފީހުގައި ބޭއްވެވި ބައްދަލުވުމުގައެވެ. 

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިވަނީ އެ މަނިކުފާނުގެ ދަޢުރުގެ ވަރަށް ކުރީކޮޅު އަތޮޅުތެރެއަށް ދަތުރުފުޅުތައް ކުރައްވަން ފައްޓަވާފައި. މި ދަތުރުފުޅުތައް މި ފާހަގަކުރެވެނީ ރާއްޖޭގެ ލާމަރުކަޒީ ނިޒާމަށް ވަރަށް ބޮޑު ކުރިއެރުމެއް އަންނަމުންދާކަމެއްގެ ގޮތުގައި. 

މިނިސްޓަރ އާދަމް ޝަރީފް ޢުމަރު ވިދާޅުވިއެވެ.

މިނިސްޓަރު ވިދާޅުވީ، ރައީސުލްޖުމްހޫރިއްޔާގެ މި ދަތުރުފުޅުތަކުގައި ރަށްރަށުގެ ކައުންސިލްތަކާއި ރައްޔިތުންނާ ބައްދަލުކޮށް، ރަށްރަށުގެ ތަރައްޤީގެ ކަންކަމުގައި އެ ފަރާތްތަކުގެ ޚިޔާލާއި މަޝްވަރާ ރައީސުލްޖުމްހޫރިއްޔާ ހޯއްދަވާ ކަމަށާއި، އަދި މި ޚިޔާލުފުޅުތައް އަޑުއައްސަވައި، އެ ރަށްރަށުގެ ތަރައްޤީއާ ގުޅޭ ކަންކަމުގެ ރޭވުންތަކަށް ބަދަލު ގެންނަވާ ކަމަށެވެ. 

މިނިސްޓަރ މިކަން މާނަކުރެއްވީ، މިއީ ހަޤީޤީ މާނައިގައި ލާމަރުކަޒީ ނިޒާމު ތަންފީޒުކުރުން ކަމުގައެވެ.

ރައީސުލްޖުމްހޫރިއްޔާ ރަށްރަށުގެ ކައުންސިލްތަކާއި ރައްޔިތުންނާ ބައްދަލުކުރެއްވުމަށްފަހު ރައްޔިތުންނާ ކައުންސިލްތަކުގެ މަޝްވަރާގެ މަތިން ކަންކަން ބަދަލުކޮށްދެއްވާފައި އެބަހުރި. މިއީ ހަޤީޤީ މާނައިގައި، ދިވެހި ރާއްޖޭގެ ޤާނޫނު އަސާސީން ދަންނަ ލާމަރުކަޒީ ނިޒާމު އެންމެ ފުރިހަމައަށް، ރައްޔިތުން ބާރުވެރިކުރުވައިގެން ރައްޔިތުން ބޭނުންވާގޮތަށް، މިކަން ކުރުމުގައި އެންމެ ރަގަޅު ނިޒާމު ކަމުގައި އަޅުގަނޑަށް ޤަބޫލުކުރެވެނީ.

ރައީސުލްޖުމްހޫރިއްޔާގެ ދަތުރުފުޅުތަކުގެ ފައިދާއަށް އަލިއަޅުވާލައްވައި މިނިސްޓަރ ޝަރީފް ވިދާޅުވިއެވެ.

މިފަދަ ކަމެއްގެ މިސާލަކަށް އަލިއަޅުވާލައްވަމުން މިނިސްޓަރ ވިދާޅުވީ، ރަށްރަށުގެ ރައްޔިތުންނަށް މަންފާ ލިބޭގޮތަށް ފަޅުރަށްތައް ދޫކުރެއްވުމަކީ، ކައުންސިލްތަކާއި ރައްޔިތުންގެ ޚިޔާލާއި މަޝްވަރާގެ ތެރެއިން ރައީސުލްޖުމްހޫރިއްޔާ ނިންމަވާ ނިންމެވުންތަކެއް ކަމުގައެވެ. އަދި މިއީ ކުރީގެ ސަރުކާރުތަކުން ޢަމަލު ކުރައްވާފައިވާ ގޮތެއް ނޫންކަމަށް ވެސް މިނިސްޓަރ ވިދާޅުވިއެވެ.

ދިވެހިރާއްޖޭގައި މިހާތަނަށް އަޅުގަނޑުމެނަށް އަޑުއިވެމުން އައީ ފަޅުރަށްތައް އާންމުގޮތެއްގައި ހުންނާނީ ވަކި ގިންތިތަކެއްގެ ބަޔަކަށް ދެވިފާކަމަށް. އެއްވެސް ހާލެއްގައި ރަށެއްގެ ރައްޔިތުންނަށް އޭގެ މަންފާ ލިބޭގޮތަށް، ފަޅުރަށެއް ދެވިފަ އޮތްކަމެއް އަޅުގަނޑުމެނަށް މި ފަހުގެ ތާރީޙެއްގައި ފެންނާކަށް ނެތް.

މިނިސްޓަރ ވިދާޅުވިއެވެ.

މީގެ އިތުރުން، މީގެ ކުރިން ދަޢުލަތުގެ ހަރު މުދަލެއް ކައުންސިލްތަކާއި އަދި ރައްޔިތުން ބާރުވެރި ކުރުމަށްޓަކާ ދޫކޮށްފައި ނުވިނަމަވެސް، ރަށްރަށުގެ އިޙްތިޞާސްގެ ތެރޭގައި ފަޅުރަށްރަށް ހިމެނުއްވުމަކީ، ލާމަރުކަޒީ ނިޒާމު ފުރިހަމައަށް ތަންފީޒު ކުރެއްވުމަށް ރައީސުލްޖުމްހޫރިއްޔާ ދެއްވާ އަހައްމިއްޔަތު ހާމަވެގެންދާކަމެއްކަމަށް މިނިސްޓަރު ފާހަގަކުރެއްވެވިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޒަޢާމަތަށް ވަޑައިގެންނެވުމަށްފަހު އަޅުގަނޑުމެނަށް ފެނިގެން މިދަނީ، ޙާއްސަކޮށް ރަށްރަށުގެ އިޙްތިޞާސްގެ ތެރޭގައި ހިމެނޭ ގޮތަށް ވެސް ބައެއް ފަޅުރަށްތައް ހަމަޖައްސައިދެއްވާތަން... މިއީ ރާއްޖޭގައި ފަހުގެ ތާރީޙެއްގައި ހިނގާފައިވާކަމެއް ނޫން. އަދި ޙާއްސަކޮށް ކައުންސިލްތައް އަދި ރައްޔިތުން ބާރުވެރި ކުރުމަށްޓަކާ މީގެ ކުރިން ދައުލަތަށް ހަރު މުދަލެއްގެ ގޮތުގައި ހުރި ބައެއް ތަކެތި، ރައްޔިތުންނަށް އޭގެ މަންފާވާގޮތަށް ހަމަޖައްސަން މި ފެއްޓެވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޒަޢާމަތުގައި.

މިނިސްޓަރ ޝަރީފް ވިދާޅުވިއެވެ.

ކައުންސިލްތަކަށް ފަޅު ރަށްތައް ދޫކުރުމަށް ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ނިންމެވީ، ބިން ކުޑަ ރަށްތަކަށް އިޤްތިޞާދީ މަސައްކަތްތައް ކުރެވޭނެ މަގު ފަހިކޮށްދިނުމަށާއި ކައުންސިލްތައް ޒިންމާދާރުކުރުވައި މާލީ ގޮތުން ބާރުވެރި މަސައްކަތްތަކެއް ކުރާ ބަޔަކަށް ހެދުމަށް ގެންގުޅުއްވާ ވިސްނުންފުޅުގެތެރެއިންނެވެ. މިއީ ލާމަރުކަޒީ ނިޒާމުގައި މިފަދަ މަސައްކަތެއް ކުރާ ފުރަތަމަ ފަހަރެވެ.