ޚަބަރު
ދިވެހީންގެ ގޮތުގައި ދިވެހީން ދެމިތިބުމުގެ ސިއްރަކީ ދިވެހިބަސް: ޑރ. މުޙައްމަދު މުޢިއްޒު

ޑރ. މުޙައްމަދު މުޢިއްޒު/ ފޮޓޯ: ޕްރެސިޑެންސް އޮފީސް
ދިވެހީންގެ ގޮތުގައި އަޅުގަނޑުމެން ދެމިތިބުމުގެ ސިއްރަކީ ދިވެހި ބަސްކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ފާހަގަކުރަމުންދާ ބައިނަލްއަގުވާމީ މާދަރީ ބަހުގެ ދުވަހާ ގުޅިގެން ރައީސުލް ޖުމްހޫރިއްޔާ އެކްސްގައި ކުރެއްވި ޕޯސްޓެއްގައި، ދިވެހިވަންތަ އާއި، ދިވެހިރާއްޖެ އާއި، ދިވެހިދިދަ ފަދަ، ދިވެހީންގެ އަމިއްލަވަންތަކަމާއި ސިޔާދަތު ރަމްޒުކޮށްދޭ ކޮންމެ ލަފްޒެއް ވެސް " ދިވެހި" ބަހާ ގުޅިފައިވާކަމަށް ރައީސުލް ޖުމްހޫރިއްޔާ ވިދާޅުވެފައިވެއެވެ.
— Dr Mohamed Muizzu (@MMuizzu) February 20, 2025
ހަމައެހެންމެ، މި ޕޯސްޓުގައި، މާޒީ އާއި، މިއަދާއި، މާދަމާ ވެސް، ދިވެހީން ދިވެހީންގެ ގޮތުގައި ދެމިތިބުމުގެ ސިއްރަކީ ދިވެހިންގެ މާދަރީ ބަސް، ދިވެހިބަސް ކަމުގައި އެމަނިކުފާނު ފާހަގަކުރަށްވާފައިވެއެވެ.
ޑރ. މުހައްމަދު މުޢިއްޒު ކުރިން ވިދާޅުވެފައިވާގޮތުގައި އެމަނިކުފާނު ބޭނުންފުޅުވަނީ ދިވެހި ބަހުން ވިސްނާ ޖީލުތަކެއް ބިނާކުކުރެއްވުމަށެވެ. ހަމައެހެންމެ، ޚާއްސަކޮށް ޒުވާން ޖީލުގެ ކުދިންގެ މެދުގައި، އެހެން ބަސްބަހަށް ހުންނަ ޝައުޤާއި ފޯރި ދިވެހި ބަހަށް ވެސް ބެހެއްޓުމަށާއި، ދިވެހިބަހަށް ލޯބިކޮށް، ދިވެހިބަހަށް ފަރިތަކަން ލިބިގަތުމަށް ވެސް ރައީސް ވަނީ ޢިލްތިމާޒްކުރަށްވާފައެވެ.
އަމިއްލަ މާދަރީ ބަހަށް މޮޅުވުމަކީ އެހެން ބަސްބަހުގެ ހުނަރި ތަރައްޤީކުރުމަށް އެޅޭ މުހިންމު ފިޔަވަޅެއްކަމަށް، ރައީސުލްޖުމްހޫރިއްޔާގެ އިތުރުން، ބަހަވީ ޢިލްމު ދިރާސާކުރަށްވާ ގިނަ ފަރާތްތަކަކުން އިއްތިފާޤުވެފައިވެއެވެ.